كوروناۆيرۋسپەن اۋىرىپ جازىلعاندارعا 5 پايدالى كەڭەس
ق ر د س م قوعامدىق دەنساۋلىق ساقتاۋ ۇلتتىق ورتالىعى ، قوعامدىق دەنساۋلىقتى نىعايتۋ ورتالىعىنىڭ باسشىسى جازيرا ەمبەرديەۆا كوروناۆيرۋستى ينفەكسيامەن اۋىرعان ادامدارعا مىنا كەڭەستەردى ۇسىنادى:
1. كۇن سايىنعى تىنىس الۋ گيمناستيكاسى. دەم الۋدى - دەم شىعارۋدى باقىلاۋ ارقىلى قاراپايىم جاتتىعۋ جاساۋ. ولاردى وتىرىپ تا، توسەكتە جاتىپ نەمەسە شالقايىپ وتىرىپ تا جاساۋعا بولادى. اۋرۋدان كەيىن ورگانيزم ءالى دە كۇشەيمەگەندىكتەن، جاتتىعۋدى شامادان تىس كوپ جاساماڭىز، جۇكتەمەلەردى بىرتىندەپ ارتتىرعانىڭىز دۇرىس. تىنىس الۋ گيمناستيكاسى وكپەنىڭ قالىپتى جۇمىس ىستەۋىنە ىقپال ەتەدى جانە ونى وتتەگىمەن قانىقتىرادى.
2. تازا اۋادا كۇن سايىن سەرۋەندەۋ. جاياۋ ءجۇرۋ گاز الماسۋدى جاقسارتادى جانە كوروناۆيرۋس ينفەكسياسىنان سوڭ جانە ورگانيزمنىڭ ۇزاق ۋاقىت السىرەۋىنەن كەيىن سىزگە وتە قاجەت كۇش قۋات بەرەدى.
3. دۇرىس تاماقتانۋ كەرەك! ورگانيزمگە اقۋىز، مايلار جانە كومىرسۋ قاجەت. كوكونىس پەن جەمىس- جيدەك مول بولاتىن جازدا سولارعا كوبىرەك ءمان بەرىڭىز. تاتتىلەردەن دە باس تارتپاڭىز (تەك بەلگىلى ءبىر كولەمدە) - ولار كوڭىل- كۇيىڭىزدى جاقسارتادى.
4. 7-8 ساعاتتان كەم بولمايتىن تولىققاندى ۇيقى. ۇيىقتاردىڭ الدىندا بولمەنى مىندەتتى تۇردە جەلدەتۋ كەرەك جانە 2 - 3 ساعات بۇرىن تاماقتانعان دۇرىس. بۇل تەز قالىپقا كەلۋىڭىزگە كومەكتەسەدى.
5. سترەستىڭ جانە ۇرەيدىڭ الدىن الۋ. قازىر بارلىعىمىز - اۋىرعاندار دا، اۋىرماعاندار دا سترەسس جاعدايىندامىز. اتالعان ينفەكسيانىڭ ەرەكشەلىگى گيپوكسيا، وتتەگىنىڭ جەتىسپەۋى. بۇل قورقىنىشتىڭ جانە دەپرەسسيانىڭ العىشارتى بولۋى مۇمكىن. مۇنداي جاعدايدا پسيحولوگتەن كەڭەس الۋىڭىزعا بولادى. ول سىزگە الاڭداماۋعا جانە سەنىمدى بولۋعا كەڭەس بەرەدى. الدە جاقىن ادامدارىڭىزبەن قارىم- قاتىناستى كۇشەيتىڭىز، تابيعات اياسىنا شىعىڭىز، د ۆيتامينىن ارتتىرۋ ءۇشىن كۇنگە كۇيىڭىز، وڭ ەموتسيا تەزىرەك قالىپقا كەلۋگە كومەكتەسەدى.