الماتىدا سوڭعى ايدا ج ر ۆ ي مەن پنيەۆمونياعا شالدىققاندار سانى 5 ەسە ارتتى
شاھار اكىمى باقىتجان ساعىنتايەۆ مۇنى ەپيدەميا كورىنىسى رەتىندە قاراستىرىپ وتىرعانىن ايتتى، دەپ حابارلايدى قازاقپارات ءتىلشىسى.
«الماتىدا بۇگىندە كوروناۆيرۋستىڭ تارالۋىنا بايلانىستى قالالىق دەنساۋلىق ساقتاۋ جۇيەسىنىڭ بارلىق مۇمكىن رەسۋرستارى جۇمىلدىرىلدى. جۇقپالى جانە پروۆيزورلىق ستاتسيونارلاردان بولەك، نەگىزگى سالماق العاشقى مەديتسينالىق- سانيتارلىق كومەك قىزمەتىنە جۇكتەلدى. بۇگىنگى قالىپتاسقان جاعدايدا «ۆيرتۋالدى جۇقپالى اۋرۋلار اۋرۋحاناسى» اشىلدى. ەمحانالاردا COVID-19 دياگنوزى راستالعان جانە سيمپتومدارى بار پاتسيەنتتەردى مونيتورينگىلەۋ بويىنشا موبيلدى بريگادالار قۇرىلدى. اسفەندياروۆ مەدۋنيۆەرسيتەتىمەن بىرلەسىپ، كارديولوگيا جانە ىشكى اۋرۋلار ع ز ي بازاسىندا پاتسيەنتتەرگە مونيتورينگ جۇرگىزەتىن ورتالىق اشتىق. بۇل بىزگە امبۋلاتورلىق دەڭگەيدە، اسىرەسە قارتتار اراسىنداعى اسقىنۋلاردى ازايتۋعا مۇمكىندىك بەرەدى»، - دەپ جازدى ب. ساعىنتايەۆ Instagram-دا.
اكىمنىڭ ايتۋىنشا، تەك سوڭعى ايدا قالادا ج ر ۆ ي مەن پنيەۆمونيا اۋرۋلارىنىڭ سانى 5 ەسە وسكەن. «مۇنى ەپيدەميانىڭ كورىنىسى رەتىندە قاراستىرىپ وتىرمىز. بۇل رەتتە، جەدەل جاردەم قىزمەتىنە جۇگىنۋشىلەردىڭ سانى كۇرت كوتەرىلگەن. ماۋسىم ايىندا تاۋلىگىنە 4 مىڭعا دەيىن قوڭىراۋ تۇسكەن. تاۋلىگىنە ءبىر بريگادا 19 قوڭىراۋعا شىعادى»، - دەدى اكىم.
بۇعان دەيىن الماتىدا Halyk arena جانە Almaty Arena سپورت نىساندارى كوروناۆيرۋسقا شالدىققانداردى قابىلدايتىن ينفەكسيالىق ستاتسيونارعا اينالاتىنىن جازعان بولاتىنبىز.