+7 (701) 759 90 19
26 °С : نۇر-سۇلتان
28 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

الەمدەگى تاريحى كۇماندى 5 ەسكەرتكىش

25 مامىر 21:30
:ءبولىسۋ
الەمدەگى تاريحى كۇماندى 5 ەسكەرتكىش

نۇر- سۇلتان. قازاقپارات - ادەتتە، نەبىر كورىكتى جەرلەردى تاماشالاپ جۇرگەن كەزدە جيھان كەزبەلەرى گيدتىڭ اۋزىنان شىققان ءسوزدىڭ بارىنە ۋىزداي ۇيىيدى. الايدا، تاريحي ەسكەرتكىشتەر مەن ارحيتەكتۋرالىق دۇنيەلەر كوپ جاعدايدا انشەيىن كوزالداۋ عانا بولىپ شىعادى.

بۇل شولۋدا ءتۇپنۇسقاسى كۇدىك تۋدىراتىن بىرنەشە ايگىلى جەرلەر جايلى اڭگىمەلەمەكپىز.

ستوۋنحەندج – ۇلى بريتانياداعى مەگاليتيكالىق تاس قۇرىلىم. فوتو: civilka.ru.

ستوۋنحەندج ەجەلگى ساۋلەت ونەرىنىڭ بىردەن ءبىر ماڭىزدى ەسكەرتكىشى بولىپ تابىلادى. كەيبىرەۋلەر مۇنى استرولوگيالىق كۇنتىزبە دەپ ساناسا، ال تاعى بىرەۋلەرى - درۋيدتىڭ كيەلى جەرى دەپ، ەندى بىرەۋلەر ءۇشىن - بۇل الدەبىر تىلسىم كۇشتىڭ مەكەنى سياقتى. اعىلىپ كەلىپ جاتاتىن ونداعان مىڭ تۋريستەرگە وسى تاستاردىڭ قانشا عاسىرلىق تاريحىن جىرلاعان گيدتەر، 1958 -جىلى ستوۋنحەندجتىڭ رەكونسترۋكتسيادان وتكەنى جايلى الدەنەگە ءتىس جارمايدى.

1958 -جىلعى ستوۋنحەندج رەكونسترۋكتسياسى. فوتو: supercoolpics.com.

جارتى عاسىر بۇرىن ەجەلگى ەسكەرتكىشتى قالىپىنا كەلتىرۋ ماقساتىندا كولەمدى جۇمىس اتقارىلدى. الايدا، وبالى نە كەرەك، ستوۋنحەندجتى ءىز جۇزىندە قايتا سالىپ شىقتى دەسە دە بولعانداي. قۇلاعان تاستاردى ولار ءوز قالاۋلارىنشا رەتتەپ ورنالاستىردى. زاماناۋي تەحنيكا مەن بەتوندى پايدالاندى. وسىنىڭ ءبارىن ەسەپكە الساق، ستوۋنحەندجدى - ەجەلگى ادامداردىڭ مەكەن- جايى دەپ اتاۋعا ەشقانداي نەگىز جوق.

يەرۋساليمدەگىى قاسيەتتى يە تابىتى حرامى. فوتو: myday.net.ua.

ييسۋس حريستوس، يەرۋساليمدەگى قازىرگى كەزدە قاسيەتتى يە تابىتى حرامى تۇرعان تۇستا جەرلەنگەنىن ەكىنىڭ ءبىرى بىلەدى. دەيتۇرعانمەن بۇل تۇجىرىممەن كەلىسپەيتىندەر دە بارشىلىق.

سريناگارا ء(ۇندىستان) قالاسىندا قاسيەتتى يۋز اسافتىڭ كەسەنەسى بار. احماديشى مۇسىلماندار ونى ييسۋس حريستوسقا بالايدى. ولاردىڭ پايىمداۋىنشا ييسۋس كرەستكە كەرىلگەن كەزدە جان تاپسىرماعان. ونى تابىتقا سالعان سوڭ، ءۇش كۇن وتكەننەن كەيىن ەسىن جيىپ، شىعىسقا جاققا ساپارلاپ كەتكەن.

ييسۋس حريستوستىڭ جاپونياداعى بولجامدى مولاسى. فوتو: idominewss.com.

كەيبىرەۋلەر ورتاقولدى فيلمگە سيۋجەت بولارلىق مىناداي بولجامدار ۇسىنادى. گولگوفاداعى ازاپ شەككەن ييسۋس ەمەس، ونىڭ باۋىرى- مىس. ال قۇتقارۋشىنىڭ ءوزى يەرۋساليمنەن كەتىپ، جاپونيادان ءبىر- اق شىعادى. ول سول جەردە وتباسىن قۇرىپ، 106 جاسقا دەيىن عۇمىر سۇرگەن كورىنەدى. جاپوننىڭ سينگو اۋىلى تۇرعىندارىنىڭ ۇلتتىق كيىمدەرىندە داۆيد جۇلدىزى تاڭبالانعان. سونداي- اق وسى وڭىردەگى شىر ەتىپ دۇنيەگە كەلگەن ءار نارەستەنىڭ ماڭدايىنا كرەست تاڭباسىن سىزادى ەكەن. ال ييسۋس حريستوستىڭ ءوزى وسى اۋىلدىڭ ىرگەسىندەگى زيراتتا جەرلەنىپتى- مىس.

1869 -جىلعى قازان ايىنداعى كارديففتىك الىپتى جەر قۇشاعىنان ارشىپ العان كەز. فوتو: antropogenez.ru.

1869 -جىلى 16 - قازاندا كارديفف ەلدى مەكەنىندە (ا ق ش، نيۋ- يورك شتاتى) قۇدىق قازىپ جاتقان ەكى جۇمىسشى، تۇرقى ءۇش مەترلىك، تاسقا اينالعان ادام دەنەسىن تابادى. بۇل تابىستى سەنساتسيا دەپ جاريا ەتەدى. الىپتى ءوز كوزدەرىمەن كورۋگە ىنتىققاندار جان- جاقتان اعىلادى. وسى جەردىڭ يەسى ۋيليام نيۋەلل دەگەن پىسىق، كەلۋشىلەردەن اقى الا باستادى.

تابىلعان ستاتۋيانىڭ بويى 3,2 مەتردى قۇرادى. فوتو: chert-poberi.ru.

ءبىراز ۋاقىت وتكەن سوڭ نيۋەلل، ءۇش مەترلىك الىپتىڭ انشەيىن ەلدى الداعان كوزبوياۋ ەكەنىن مويىندايدى. ونىڭ دجوردج حالل دەگەن باۋىرى اتالمىش ستاتۋيانى گيپستەن جاساپ، بايىرعى بيبليالىق زاماندا وسى جەردى الىپتار مەكەن ەتتى دەپ، اڭگىمەلەۋشى ءدىنداردى - مازاق ەتكەن قىلاپاتى بولىپ شىقتى. ستاتۋيا جۇمىسشىلار «كەزدەيسوق» قازىپ العانشا جەر قوينىندا ءبىر جىل جاتادى. ءبىر قىزىعى، ارحەولوگتار بۇنىڭ جالعان جادىگەر ەكەنىن قولما- قول انىقتايدى. الايدا، بۇل جاڭالىقتىڭ سەنساتسياعا اينالىپ، الۋان ءتۇرلى پىكىر تۋىنداۋىنا تىلشىلەر ۇلكەن ۇلەس قوستى.

كەنسينگتوندىق رۋنيكالىق تاس. فوتو: supercoolpics.com.

1898 -جىلى كەنسينگتون قالاسىنىڭ تۇرعىنى، امەريكاندىق شۆەد تۋماسى ۋلوف ەمان ۋچاسكەسىن بۇتا، اعاشتان تازالاپ ءجۇرىپ، كونە جازۋ قاشالعان تاس تاۋىپ الادى. بۇنداي ولجانى تەكسەرگەن زەرتتەۋشىلەر تاستاعى جازۋدىڭ - سكانديناۆيالىق رۋنا ەكەنىن انىقتايدى. سونىمەن قاتار تاس تاقتادا «1362» دەگەن داتا قاشالىپتى. اتالمىش تاستى نەبىر كورمەلەرگە اپارادى.

ءبىراز جىلدان سوڭ، ۋولتەر گران دەگەن بىرەۋ، تاستاعى جازۋ بۇدان 10-15 جىل بۇرىن عانا جازىلعان جانە ونى تاسقا تىرناپ تۇسىرگەن ءوزىنىڭ اكەسى مەن ونىڭ جولداسى ەكەنىن باياندايدى. بۇنداي مويىنداۋ - جارىلعان بومبادان كەم تۇسپەدى. عالىمدار تاڭبالاردى قايتادان زەرتتەۋگە ءماجبۇر بولدى. ⅩⅩ عاسىردا تاقتاي تاسقا مۇقيات ساراپتامادان وتكىزىلەدى. ءسويتىپ بۇنىڭ راسىندا جالعان نارسە ەكەنى دالەلدەنەدى.

ۆەرونداعى دجۋلەتتانىڭ بالكونى. فوتو: vdvgazeta.ru.

ۆەرونعا تابانى تيگەن تۋريستەردىڭ ەڭ الدىمەن تاماشالاۋعا ىنتىعاتىن ورنى - شەكسپيردىڭ اتاقتى تراگەدياسىنداعى سورماڭداي عاشىق قىز دجۋلەتتانىڭ ءۇيى ەدى. بۇل شىعارمانىڭ سيۋجەتى اۆتوردىڭ قيالى عانا ەكەنى ەشكىمدى الاڭداتپايدى. تاماشالاۋعا كەلگەن ءار ادام: رومەونىڭ دجۋلەتتاعا ورمەلەمەكشى «بالكونىن» اسا ءبىر ىلتيپاتپەن قىزىقتايدى.

دايىنداعان ز. سامالبەك ۇلى

http://madeniportal.kz/


:ءبولىسۋ
پئكئر قالدئرؤ
+7
جئبةرؤ
سونداي-اق... وقىڭىز
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات