الماتىعا كىرۋ ءۇشىن بلوك-بەكەتتى اينالىپ وتپەك بولعان ازاماتتار 5 تاۋلىككە قامالدى
الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جاقىندا ءتورت ازامات الماتى قالاسىمەن شەكتەس بلوك-بەكەتتى زاڭسىز اينالىپ وتۋگە تىرىسقان.
«اتاپ ايتقاندا، 1986-جىلى تۋعان تۇركىستان قالاسىنىڭ تۇرعىنى ەلىمىزدەگى توتەنشە جاعداي ءتارتىبىن بۇزا وتىرىپ، الماتى قالاسىنىڭ اۋماعىنا اقساي وزەنى ارقىلى جاسىرىن وتۋگە تىرىسقان. ەكىنشى جاعدايدا 1968-جىلى تۋعان الماتى وبلىسىنىڭ تۇرعىنى وسى ادىسپەن كارانتين جاريالانعان اۋماققا وتۋگە ارەكەتتەنگەن. تاعى بىرەۋى - الماتى وبلىسىنىڭ تۇرعىنى. ول ىلە اۋدانى پوكروۆكا ەلدىمەكەنىنىڭ ماڭىنداعى 22№ بلوك-بەكەت جانىندا ۇستالدى. ءتورتىنشى قۇقىق بۇزۋشى 2000-جىلعى قىرعىزستان ەلىنىڭ ازاماتشاسى بولىپ شىقتى. شەتەل ازاماتشاسىنىڭ ەشقانداي قۇجاتى جوق بولىپ شىقتى. قازىرگى جاعدايدا اتالعان ازاماتتاردىڭ ارەكەتى قولدانىستاعى زاڭناماعا سايكەس قاتاڭ جازالاناتىنى بەلگىلى»، - دەدى قاراساي اۋدانى پوليتسيا باسقارماسىنىڭ باستىعى پوليتسيا پولكوۆنيگى اسحات دانيار.
ۇستالعان ازاماتتارعا ق ر اكىمشىلىق قۇقىق بۇزۋ تۋرالى كودەكسىنىڭ 476-بابىنا سايكەس حاتتاما تولتىرىلدى. سونداي-اق، مامانداندىرىلعان اۋدانارالىق سوت شەشىمىمەن ولار 5 تاۋلىككە قامالدى. ال، قىرعىز رەسپۋبليكاسىنىڭ ازاماتشاسى بارلىق جاعداي انىقتالعانعا دەيىن قابىلداۋ-تاراتۋ مەكەمەسىنە ورنالاستىرىلدى.