كولگىنوۆ: تۇرعىن ءۇي كەزەگىندەگىلەرگە جالعا بەرىلەتىن باسپانا 5 جىلدان سوڭ بالالارىنا قالادى

نۇر-سۇلتان. قازاقپارات - ەلوردا اكىمى التاي كولگىنوۆ ازاماتتاردى قابىلدادى، دەپ حابارلايدى قازاقپارات قالا اكىمدىگىنىڭ رەسمي سايتىنا سىلتەمە جاساپ.

تۇرعىندار تۇرعىن ءۇي باعدارلامالارىنا قاتىسۋ، مەديتسينالىق كومەك پەن اتاۋلى الەۋمەتتىك كومەك الۋ، جۇمىسقا ورنالاسۋ جانە ت. ب. ماسەلەلەردى كوتەردى. ەلوردا اكىمى التاي كولگىنوۆ جالعا بەرىلەتىن تۇرعىن ءۇيدى بەس جىلدان كەيىن قايتارۋ قاجەت ەمەس ەكەندىگىن ايتتى. «قولجەتىمدى باسپانا - ءبىز ءۇشىن باسىم باعىتتاردىڭ ءبىرى. مەملەكەت باسشىسىنىڭ تاپسىرماسىنا سايكەس بيىل قولجەتىمدى تۇرعىن ءۇي قۇرىلىسىنىڭ كولەمىن ءۇش ەسە ۇلعايتامىز. وتكەن جىلى 2900 تۇرعىن پاتەر الدى.

جالعا بەرىلەتىن تۇرعىن ءۇي تۋرالى ايتاتىن بولساق، ءۇيدى بەس جىلدان كەيىن بوساتۋدىڭ قاجەتى جوق. ءۇي ءسىزدىڭ بالالارىڭىزعا قالادى. تەك 5 جىل وتكەن سوڭ شارتتى ۇزارتۋ قاجەت. ال جۇمىس ىستەيتىن جاستارعا ارنالعان جالعا بەرىلەتىن باسپاناعا كەلسەك، بۇل ۇيلەر 5 جىل مەرزىمگە بەرىلەدى. وسى ۋاقىت ىشىندە جۇمىس ىستەپ جاتقان جاستار اياققا تۇرىپ، باسقا تۇرعىن ءۇي باعدارلامالارىنا قاتىسىپ نە تۇرعىن ءۇي ساتىپ الۋ ءۇشىن تاجىريبە مەن قاراجات جيناي الادى»، - دەدى التاي كولگىنوۆ.

ەلوردا اكىمى 3 كۇن بويى ەسەپتىك كەزدەسۋگە كەلگەن قالا تۇرعىندارىن جەكە قابىلدادى. سۇراقتاردىڭ ءبىر بولىگى سول جەردە شەشىلسە، قالعاندارى جۇمىسقا الىندى.