مۇعالىمدەردى قولداۋ ءۇشىن 5 تريلليون تەڭگەدەن استام قارجى بولىنبەك
كەڭەيتىلگەن وتىرىسقا جەتەكشى پارتيانىڭ باسشىلارى، ۇستازدار قاۋىمى مەن ۋاكىلەتتى مەملەكەتتىك ورگاندار وكىلدەرى قاتىستى، دەپ حابارلايدى قازاقپارات ۇيىمنىڭ باسپا ءسوز قىزمەتىنە سىلتەمە جاساپ.
«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك تاۋەلسىزدىك جىلدارى تۇڭعىش پرەزيدەنت نۇرسۇلتان نازاربايەۆتىڭ باسشىلىعىمەن ەلىمىزدە 2000-عا جۋىق جاڭا مەكتەپ جانە 900 بالاباقشا اشىلعانىن اتاپ ءوتتى.
اپاتتى جاعدايداعى مەكتەپتەر سانى سوڭعى 5 جىلدا 4 ەسەگە ازايدى. مۇعالىمدەردىڭ جالاقىسى 1997 -جىلدان بەرى 17 ەسەگە وسكەن. ەلباسىنىڭ تاپسىرماسىمەن ءاربىر قازاقستاندىق وتباسىعا قاتىسى بار «پەداگوگ مارتەبەسى جايلى» زاڭ جوباسى ازىرلەندى.
«قازىر ءبىلىم سالاسىندا جارتى ميلليوننان استام قازاقستاندىق جۇمىس ىستەيدى. ولاردىڭ % 81 ايەلدەر. تامىز كونفەرەنسياسىندا ەل پرەزيدەنتى قاسىم- جومارت توقايەۆ ۇلتىمىزدىڭ باسەكەگە قابىلەتتىلىگىن ارتتىرۋ ءۇشىن مۇعالىم مارتەبەسى بيىك دەڭگەيگە كوتەرىلۋ كەرەك دەپ اتاپ ءوتتى. جىل سايىن ديپلومدى مامانداردىڭ سانى ارتقانىمەن، پەداگوگتارعا دەگەن سۇرانىس ازايماي وتىر. پەداگوگ مامانداردىڭ % 35 باسقا سالاعا كەتىپ قالادى. بىلىكتى مۇعالىمدەردى مەكتەپتەرگە، اسىرەسە، اۋىلدىق جەرلەرگە تارتۋ مەحانيزمى ماردىمدى جۇمىس ىستەمەي تۇر. بۇل شەشۋگە ءتيىستى ماسەلەلەردىڭ ءبىر بولىگى عانا»، - دەدى باۋىرجان بايبەك.
ونىڭ ايتۋىنشا، زاڭ جوباسىن ازىرلەۋ ءۇشىن عالىمدار، مۇعالىمدەر، زاڭگەرلەر، دەپۋتاتتار جانە ءبىلىم سالاسى كاسىپوداقتارىنىڭ وكىلدەرىنەن قۇرالعان جۇمىس توبى جاساقتالعان. جىل بويى ەلىمىزدە كوپتەگەن كەزدەسۋلەر وتكىزىلدى، 8600 دەن اسا ۇسىنىس ءتۇستى.
«پارتيا مۇشەلەرىنىڭ % 30 - پەداگوگتار، سوندىقتان «Nur Otan» زاڭ جوباسىنىڭ ازىرلەنۋ بارىسىن ەرەكشە باقىلاۋدا ۇستاپ وتىر. پەداگوگ قۇقىعىن كەڭەيتۋ جانە ونىڭ الەۋمەتتىك مارتەبەسىن جاقسارتۋ ماسەلەسى بار. اڭگىمە، بارىنەن بۇرىن، مۇعالىمدەردى ماتەريالدىق تۇرعىدان جانە باسقا دا ىنتالاندىرۋ جاعدايلارىن تۋعىزۋ، قاجەتسىز تەكسەرۋلەردەن ارىلتىپ، شىعارماشىل جانە ناتيجەلى جۇمىس ىستەۋگە جاعداي جاساۋ تۋرالى بولىپ وتىر. قازىرگى ۋاقىتتا ازىرلەنىپ جاتقان زاڭ جوباسى بويىنشا تاياۋ 5 جىلدا جالاقىنى ءوسىرۋ، ۇستازدىق شەبەرلىك پەن سىنىپ جەتەكشىلىگى ءۇشىن ۇستەماقى قوسۋ، ەڭبەك دەمالىسى مەن باسقا دا ىنتالاندىرۋلاردى قامتيتىن 5,2 تريلليون تەڭگە بولىنەدى دەپ مولشەرلەنۋدە. بۇنىڭ بارلىعى ەلباسى مەن پرەزيدەنت ساياساتىنىڭ ساباقتاستىعىنىڭ ناتيجەسى»، - دەپ اتاپ ءوتتى باۋىرجان بايبەك.
پارتيا ءتوراعاسىنىڭ ءبىرىنشى ورىنباسارى ماجىلىستەگى «Nur Otan» پارتياسى فراكسياسى دەپۋتاتتارىنىڭ جانە جۇمىس توبىنىڭ زاڭ جوباسىن تالقىلاۋ قورىتىندىسى بويىنشا قوسىمشا ۇسىنىستار ەنگىزىلگەنىن جەتكىزدى. سونداي- اق، وقۋ جۇكتەمەسىن 16 ساعاتقا تومەندەتۋ، جەر تەلىمدەرىن ءبولۋ جانە «قازاقستاننىڭ ەڭبەك سىڭىرگەن ۇستازى» دارەجەسىنە يە بولعاندارعا ءبىر جولعى 2000 اەك كولەمىندەگى تولەم تولەۋ جانە پرەزيدەنتتىك وليمپيادالار، رەسپۋبليكالىق جانە حالىقارالىق جارىستاردىڭ جۇلدەگەرلەرىن دايىنداعاندارى ءۇشىن 3 ايلىق جالاقى بەرۋ جايلى ۇسىنىس ايتىلدى.
ءوز كەزەگىندە ءبىلىم ءمينيسترى اسحات ايماعامبەتوۆ جاڭا زاڭ جوباسىندا پەداگوگ قۇقىعىن قورعاۋ تۋراسىنداعى 10 جاڭا ۇستانىم قاراستىرىلعانىن حابارلادى. مۇعالىمدەردىڭ ساپالىق قۇرامىن ارتتىرۋ ءۇشىن ماگيستر دارەجەسى بارلارعا 10 ا ە ك كولەمىندە ۇستەمە، بالاباقشالاردا ەڭ الدىمەن ورىن ءبولۋ جانە باسقا دا الەۋمەتتىك كومەكتەر قاراستىرىلماق.
اشىق پىكىرتالاسقا قاتىسۋشىلاردىڭ بارلىعى جاڭا زاڭ جوباسى بويىنشا وزدەرىن قىزىقتىراتىن ساۋالداردى قويا الاتىنىن ايتا كەتۋىمىز كەرەك. وتىرىس بارىسىندا شىمكەنتتەگى №1 مەكتەپ- گيمنازياسىنىڭ بيولوگيا ءپانىنىڭ وقىتۋشىسى الينا سولوۆۆا ءوز ويىن جەتكىزدى.
«مەن قاراپايىم مەكتەپ وقىتۋشىسىمىن. مەن اتا- انالاردىڭ بىزدەن نەنى كۇتەتىنىن بىلەمىن. كەز كەلگەن اتا- انا ونىڭ بالاسىنا تۇسىنىستىكپەن قاراپ، جاقسى كورگەنىمىزدى قالايدى. قوعام مۇعالىمدەردىڭ ەسەپ بەرۋمەن اينالىسپاي، بالالارعا دۇرىس ءمان بەرگەنىن جاقسى كورەدى. مۇعالىمدەردى وليمپيادادا ورىن العان وقۋشىلارى ءۇشىن ماراپاتتاۋ جايىنا كەلسەك، «دارىن»، نزم سياقتى دارىندى بالالار وقيتىن مەكتەپتەردىڭ بار ەكەنىن ەسكەرە كەتكەن ءجون. ال مەنىڭ جاي مەكتەپتىڭ وزىندە 143 جەڭىمپازىم بار. ماقتانايىن دەپ تۇرعان جوقپىن، ءبىراق وسىلاردى دارەجەلەرگە ءبولۋ كەرەك سياقتى. كىمنىڭ وقۋشىسى جۇيەلى تۇردە جەڭىمپاز بولىپ جۇرسە، سولاردى ماراپاتتاۋ كەرەك»، - دەدى ول.
باۋىرجان بايبەك مۇعالىمنىڭ ۇسىنىسىن قولدادى. ونىڭ ايتۋى بويىنشا، وسى تەكتەس مەكتەپتەردىڭ اراسىندا سارالاۋدى ەنگىزۋ قاجەت.
«اۋىلدى جەرلەردە نەمەسە جاعدايى تومەن اۋدانداردان وسىنداي جەڭىمپاز بالالار از شىقپايدى. بۇل ەرەكشە باعالاۋعا تۇرارلىق. بۇل ۇستازداردىڭ زور ەڭبەگى. جاقىندا عانا استانا اكىمىمەن بىرگە ەكى جىل بۇرىن عانا جەكەمەنشىك باسقارۋعا بەرىلگەن №54 مەكتەپ- ليتسەيگە باردىق. ولار ديرەكتوردىڭ كابينەتىن مۇعالىمدەر وتىراتىن بولمە ەتىپ جاساپتى. ديرەكتور بولسا ءوز كابينەتىن ءبىرىنشى قاباتتاعى كىرەبەرىسكە جاقىن ەتىپ شىنىدان جاساتىپتى. ءبىز التاي كولگىنوۆ ەكەۋىمىز بارلىق مەملەكەتتىك مەكتەپ ديرەكتورلارىن وسىنداي باستاماعا شاقىراتىن بولىپ كەلىستىك. ەگەر كىم دە كىم وسى يدەيانى قولدايتىن بولسا، دەمەك وزگەرۋگە دايىن دەگەن ءسوز. كەي مەكتەپ ديرەكتورلارىنىڭ ەشتەڭە وزگەرتكىسى كەلمەي قاشقاقتايتىندارى دا قۇپيا ەمەس. اسىرەسە، استانادا، ارتىندا تىرەگى بار ديرەكتورلار. ەگەر ءار ديرەكتور ارىپتەستەرىمەن جۇمىس ىستەي بىلسە، مۇعالىمدەرىن قورعاسا، كومەكتەسسە، سولار ۇتادى. ءمۇعالىم مارتەبەسى - بۇل ءبىزدىڭ ەلىمىزدىڭ بولاشاعىنىڭ ماسەلەسى، ءبىزدىڭ باسەكەگە قابىلەتتىلىگىمىز»، - دەپ اتاپ ءوتتى باۋىرجان بايبەك.