ەلوردادا جاستار 5 مىڭ تەڭگەگە پاتەر جالداپ تۇرا الادى
«قاتىسۋشىلاردان مىنانى ەسكەرۋدى سۇرايمىن: ءار وتباسىنىڭ قۇرامى ءار ءتۇرلى، سوندىقتان مارتەبەسى دە ءارقالاي بولماق. كوپبالالى بولساڭىز دا، ءۇش بولمەلى پاتەردىڭ بەرىلمەيتىنىن، تەك ءبىر جانە ەكى بولمەلىلەر تاراتىلاتىنى ەسكەرۋ كەرەك. تۇرعىن ءۇي ساتىپ الۋ، ۇزارتۋ قۇقىعىنسىز بەس جىلعا بەرىلەدى. ياعني، بەس جىلدان كەيىن ءبىز سىزدەن وسى تۇرعىن ءۇيدى بوساتۋدى سۇراۋعا ءماجبۇر بولامىز. ويتكەنى ءبىز بۇل پاتەرلەردى باسقا جاستارعا بەرەمىز. باسپانالاردىڭ جالدايتىن اقىسى ايىنا 5 تەن 15 مىڭ تەڭگەگە دەيىن بولادى. ءبارى دە ءۇيدىڭ شارشى مەترىنە بايلانىستى. ءبىز دايىن ءتىزىمدى وسى جىلدىڭ 10 - جەلتوقسانىنان كەشىكتىرمەي ورنالاستىرامىز. باسپانالار جەلتوقسان ايىندا بەرىلە باستايدى»، - دەدى نۇر- سۇلتان قالاسى اكىمدىگىنىڭ تۇرعىن ءۇي قورىنىڭ ديرەكتورى نۇرسۇلۋ قوجاحمەتوۆا ەلوردادا وتكەن باسپا ءسوز ءماسليحاتىندا.
ايتا كەتسەك، 5-10 - قاراشا ارالىعىندا ەلوردادا جۇمىس ىستەيتىن جاستاردان ساتىپ الۋ قۇقىعىنسىز جالدامالى پاتەر بويىنشا ءوتىنىش قابىلدانادى. ءوتىنىش تەك ەلەكتروندى تۇردە Smart Astana پورتالى ارقىلى قابىلدانادى.
نۇر- سۇلتاندا بيىل ءبىر جانە ەكى بولمەلى 1050 پاتەر بەرىلەدى (30-70 شارشى مەترگە دەيىن). قۇرىلىس باسقارماسىنىڭ مالىمەتى بويىنشا، جاستارعا 202 ەكى بولمەلى جانە 848 ءبىر بولمەلى پاتەر تاپسىرىلادى.
ايتا كەتسەك، جاستار جىلىنا وراي ەلباسىنىڭ تاپسىرماسىمەن ق ر اقپارات جانە قوعامدىق دامۋ مينيسترلىگى مەملەكەتتىك ورگاندارمەن بىرلەسە وتىرىپ، نۇر- سۇلتان، الماتى جانە شىمكەن قالالارىندا جۇمىسشى جاستارعا تۇرعىن ءۇيدى بەرۋ بويىنشا ەرەجەلەردى بەكىتكەن بولاتىن. اتالعان بۇيرىقتى ق ر تۇڭعىش پرەزيدەنتى ن. ءا. نازاربايەۆ 2019 -جىلدىڭ 23 - قاڭتارىندا جاستار جىلىنىڭ اشىلۋ سالتاناتىندا بەرگەن ەدى.