جالقاۋلىقتى جەڭۋدىڭ 5 ءادىسى

نۇر-سۇلتان. قازاقپارات - جالقاۋلىق كەز كەلگەن ادامنىڭ ومىرىندە كەنەتتەن پايدا بولادى. جالقاۋلىقتى جەڭۋ، ادەتتە، ونىڭ پايدا بولۋ سەبەبىن انىقتاۋ ارقىلى جۇزەگە اسادى.

جالقاۋلىقتى جەڭۋدىڭ قانداي ادىستەرى بار؟

 1. موتيۆاتسيا ادىستەرىن يگەرۋ ادامداردىڭ قانداي دا ءبىر ءىستى باستاپ كەتە الماۋىنىڭ سەبەبى -  ونى ورىنداعاننان ءلاززات الماۋى نەمەسە ونىڭ ناتيجەسىنىڭ اسا ىنتالاندىرماۋى. كەيدە جۇمىس كولەمىنىڭ كوپ بولعانى سونشالىق نەدەن باستاپ كەتەتىنىن بىلمەيدى. بۇل جاعدايدا جالقاۋلىقتى جەڭۋ ءۇشىن وزىڭىزگە موتيۆاتسيا بەرە ءبىلۋىڭىز كەرەك. موتيۆاتسيانىڭ ءتۇرلى ادىستەرى بار:

 شۆەيتساريالىق ىرىمشىك ءادىسى ول كولەمدى تاپسىرمانى ورىنداۋعا كىرىسە الماي جۇرگەن كەزدە پايدالى. ونى، ءتىپتى، جالقاۋلىق سەزىمى ەمەس، نەدەن باستارىن بىلمەۋشىلىك دەۋگە بولادى. ىرىمشىكتىڭ ۇلكەن بولىگىن جەۋگە تىرىسقان تىشقاننىڭ ارەكەتىن ەلەستەتىڭىز. الدىمەن ول ۇلكەن بولىكتى جەي المايدى. ول ىرىمشىكتىڭ ءار جەرىن تىستەي باستايدى. سودان سوڭ ىرىمشىك كىشىرەيە باستايدى، ناتيجەسىندە تىشقان ونىڭ قالعانىن ءبىر جۇتا سالادى. ۇلكەن تاپسىرمانى دا كىشكەنتاي تاپسىرمالارعا ءبولىپ الۋ كەرەك. سودان سوڭ رەت- رەتىمەن ولاردى ورىنداۋعا كىرىسىڭىز. سول كەزدە تاپسىرمانىڭ جالپى كولەمى قولايلى مولشەرگە دەيىن قىسقارادى. زاكىر بۇل جالقاۋلىقتى جەڭۋگە كومەكتەسەتىن قۋلى ءادىس. ءار ادام اراسىندا ءوزىن ەركەلەتىپ تۇرادى. ونى ناقتى ءبىر ءىستى ورىنداعانى ءۇشىن سىيلىق رەتىندە قولدانۋعا بولادى. مىسالى: تاڭەرتەڭنەن باستاپ 10 كليەنتكە تەلەفون شالىپ شىقسام، ۇيالى تەلەفونىمنان 15 مينۋت ويىن وينايمىن نەمەسە ينستاگرامدا وتىرامىن.

 تاڭعى اسقا «باقا» جەۋ «باقا» -  ۇنەمى كەيىنگە ىسىرىپ جۇرەتىن ماڭىزدى ءىس (نەمەسە تاپسىرما) . بۇل ەڭ جاعىمسىز ءىستى تاڭەرتەڭ ورىنداپ تاستاۋ كەرەك ەكەنىن بىلدىرەدى. سول كەزدە كۇنى بويى قالعان جاعدايلاردى قۋانا- قۋانا قابىلدايسىز. تابىس جۋرنالى تابىس جۋرنالىن باستاۋ -  جالقاۋلىقتى جەڭۋمەن قاتار ءوز- ءوزىڭىزدى باعالاۋ دەڭگەيىڭىزدى ارتتىرۋعا كومەكتەسەدى. بۇل جۋرنالعا كۇندەلىكتى جەتىستىكتەرىڭىزدى، ورىنداعان تاپسىرمالارىڭىزدى جازىپ ءجۇرىڭىز. جالقاۋلىق ورىن العان كەزدە وسى جۋرنالدى اشىپ، ءوز ىستەرىڭىزدەن موتيۆاتسيا الىڭىز.

 2. سپورتپەن اينالىسۋ ادامنىڭ ومىرلىك ۇستانىمى ونىڭ قوزعالىس بەلسەندىلىگىمەن تىكەلەي بايلانىستى. فيزيكالىق جاتتىعۋلار قاندا ىنتالاندىرۋشى زاتتاردىڭ وڭدەلۋىنە ىقپال ەتەدى. سوندىقتان سپورتزالدان شىققاننان كەيىن نەمەسە تاڭەرتەڭ جۇگىرىپ كەلگەننەن كەيىن بارلىق ويلارىڭىز ايقىندالا ءتۇسىپ، بىردەڭە ىستەۋگە ىنتاڭىز بولادى. ونىڭ ۇستىنە سپورتپەن اينالىسۋ ادامدى تارتىپكە ۇيرەتەدى.

 3. دۇرىس دەمالۋ ادام قالپىنا كەلىپ ۇلگەرمەسە، بىردەڭە ىستەۋگە دەگەن قۇلشىنىسى ازايادى. ەگەر دەمالىس پەن بەلسەندىلىكتى دۇرىس كەزەكتەستىرىپ ۇيرەنسەڭىز، جۇمىسقا قاجەتتى ەنەرگيانى ساقتاپ تۇرا الاسىز.

 4. ادەتكە اينالدىرۋ ءبىزدى بالا كەزىمىزدەن ءتىس جۋۋ، جۋىنۋ، تاڭعى اس ءىشۋ نەمەسە تاڭەرتەڭ جاتتىعۋ جاساۋعا ۇيرەتەدى. ياعني، بۇل مىندەتتەر ءبىزدىڭ كۇندەلىكتى ادەتىمىزگە اينالىپ كەتكەن. مىسالى، ءوزىڭىزدى دامىتۋدى (كىتاپ وقۋ، سپورتزالعا بارۋ) ادەتكە اينالدىرىڭىز. سول كەزدە ونى دا اۆتوماتتى تۇردە ورىندايسىز.

5. ەكپىندى ادامدارمەن ارالاسۋ جالقاۋلىقتى جەڭۋدىڭ تاعى ءبىر ءادىسى -  ونى جەڭگەن ادامدارمەن ارالاسۋ. سەبەبى ادامنىڭ ءوز ورتاسىنا قاراي بەيىمدەلىپ كەتەتىنى وتىرىك ەمەس. بەلسەندى ادامداردىڭ ورتاسىندا ءجۇرىپ، ءسىز دە بەلسەندىرەك ءارى ماقساتتى بولا تۇسەسىز.

Massaget.kz