قازاقستاندا 5 ميلليون ادام سپورتپەن اينالىسادى - اسقار مامين

نۇر- سۇلتان. قازاقپارات – ق ر ۇلتتىق وليمپيادا كوميتەتى ەلىمىزدە سپورتتىڭ قارقىندى دامۋىنا ۇلكەن ۇلەس قوسىپ وتىر. بۇل تۋرالى بۇگىن ق ر ۇلتتىق وليمپيادا كوميتەتى باس اسسامبلەياسىنىڭ وتىرىسىندا ەل پرەمەر- ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«وزدەرىڭىز جاقسى بىلەسىزدەر، ەلباسى نۇرسۇلتان نازاربايەۆتىڭ ستراتەگيالىق باعىتىنىڭ ارقاسىندا تاۋەلسىزدىك جىلدارى قازاقستاندىق سپورتشىلاردى دايىنداۋدىڭ ءتيىمدى جۇيەسى قۇرىلدى. العاش رەت 1994 -جىلى نورۆەگيالىق ليللەحاممەر قالاسىندا وتكەن وليمپيدا ويىندارىنا قاتىسا باستاعان كەزەڭنەن بەرى ۇلتتىق قۇراما 71 مەدال جەڭىپ الدى. مەملەكەت باسشىسى قاسىم- جومارت توقايەۆ قازاقستان حالقىنا ارنالعان جولداۋىندا بۇقارالىق سپورتتى دامىتۋ مىندەتىن قويدى. بۇگىنگى كۇنى ەلىمىزدە دەنە شىنىقتىرۋ جانە سپورتپەن 5 ميلليونعا جۋىق ادام اينالىسادى»، - دەدى وتىرىس بارىسىندا ۇكىمەت باسشىسى.

پرەمەر- مينيستر ەلىمىزدە حالىقتىڭ اراسىندا سپورتتىڭ جاپپاي تارالۋىنا ۇلكەن ءمان بەرىلەتىندىگىن اتاپ ءوتتى. وعان بارلىق جاعداي جاسالعان. جاڭا سپورت نىساندارى اشىلۋدا. 38 مىڭنان استام ءارتۇرلى دەڭگەيدەگى سپورت كەشەندەرى بار. ال بالالارعا 471 سپورت مەكتەبىندە سپورتپەن اينالىسۋعا مۇمكىندىك جاسالعان.

«وسى ىسكە اسىرىلىپ جاتقان شارالاردىڭ بارلىعى سالاۋاتتى ۇلتتى قالىپتاستىرۋ مەن دامىتۋدىڭ نەگىزى بولىپ سانالادى. قازىرگى تاڭدا بالالار جانە جاستار سپورتى، بۇقارالىق سپورت، كاسىبي سپورت جان- جاقتى دامۋدا. وسى رەتتە سپورتتىڭ ەلىمىزدە قارقىندى دامۋىنا ۇلتتىق وليمپيادا كوميتەتى ۇلكەن ۇلەس قوسۋدا»، - دەدى اسقار مامين.

ەل پرەمەر- ءمينيسترى اسقار مامين اتالعان كوميتەتتىڭ پرەزيدەنتى لاۋازىمىنا تيمۋر  قۇلىبايەۆتىڭ كانديداتۋراسىن ۇسىندى، دەپ حابارلايدى قازاقپارات ءتىلشىسى.

«بۇگىنگى وتىرىستا ءبىز ۇلتتىق وليمپيادا كوميتەتىنىڭ پرەزيدەنتىن سايلاۋىمىز كەرەك. فەدەراتسيالار تاراپىنان كانديدات ۇسىنىلدى. قازاقستاننىڭ شايبالى حوككەي فەدەراتسياسى اتىنان تيمۋر اسقار ۇلى قۇلىبايەۆتىڭ كانديداتۋراسىن ۇسىنعانىمىزدى ايتقىم كەلەدى. ۇوك پرەزيدەنتى سايلاۋ ءبىزدىڭ وليمپيادالىق كوميتەتىمىزدى، وليمپيادالىق سپورت تۇرلەرىن جانە تولىقتاي العاندا ەلىمىزدەگى بۇقارالىق سپورتتى ودان دامىتۋدىڭ ماڭىزدى قادامى سانالادى. بۇل ءبىزدىڭ دۇرىس ءارى جاۋاپت تاڭداۋىمىز بولارىنا سەنىمدىمىن»، - دەدى اسقار مامين.

وسى رەتتە ۇكىمەت باسشىسى ەلىمىزدە سپورتتى دامىتۋعا ۇلكەن قارجىلاي قولداۋ كورسەتىلىپ وتىرعانىن اتاپ ءوتتى.

«بيىل سپورتتى دامىتۋعا رەسپۋبليكالىق بيۋدجەتتەن 31 ميلليارد تەڭگە ءبولىندى. كەلەسى جىلى 51 ميلليارد تەڭگە ءبولۋ جوسپارلانعان. بۇل - رەسپۋبليكالىق بيۋدجەتتەن عانا. مۇنان بولەك، جەرگىلىكتى بيۋدجەتتەن دە قارجىلاندىرىلادى»، - دەدى ول.

ايتا كەتەيىك، تيمۋر قۇلىبايەۆ قازىرگى ۋاقىتتا دا ۇلتتىق وليمپيادا كوميتەتىنىڭ پرەزيدەنتى قىزمەتىن اتقارادى.