ونكولوگ قاتەرلى ىسىكتىڭ باستى 5 بەلگىسىن اتادى
دارىگەرلەر بۇگىندە ەلىمىزدە جاتىر موينى وبىرى، ءسۇت بەزى قاتەرلى ىسىگى، اسقازان مەن وڭەش قاتەرلى ىسىگى سياقتى باعىتتار بويىنشا تەگىن سكرينينگ ءجۇرىپ جاتقانىن ەسكە سالعان ەدى.
سكرينينگ اۋرۋ پايدا بولماس بۇرىن ىسىكتى تابۋعا جانە ەرتە دياگنوز قويىلعان كەزدە ىسىك ءتۇرىن انىقتاۋعا، ىسىكتەن بولاتىن ءولىمدى ازايتۋعا باعىتتالعان. سەبەبى، ستاتيستيكاعا سۇيەنسەك، ەلىمىزدە سوڭعى 20 جىلدا قاتەرلى ىسىك اۋرۋلارى ەكى ەسە كوبەيگەن.
ونكولوگ جانسايا ساتيەۆا بۇل دەرتتىڭ باستى بەلگىلەرى مەن ونىڭ قالاي الدىن الۋعا بولاتىنىن ايتىپ بەردى. دارىگەر كوپ جاعدايدا قاتەرلى ىسىكتىڭ بەلگىلەرى بايقالا بەرمەيتىنىن ايتادى. دەگەنمەن دەرتتىڭ كەيبىر بەلگىلەرى قايتالانا بەرگەن جاعدايدا، مامان دارىگەرگە كورىنۋگە كەڭەس بەرەدى.
دەرتتىڭ ماڭىزدى بەلگىلەرى:
- جوتەل؛
- داۋىستىڭ قاتتى قارلىعۋى؛
- سالماق تاستاۋ؛
- تاماقتىڭ جۇتىنعان كەزدە اۋىرۋى؛
- مويىننىڭ ءىسىنۋى، اۋىرۋى؛
- نەسەپ شىعارۋ پروبلەمالارى.
«ەڭ ءبىرىنشى ماڭىزدى ءارى باستى بەلگى دەپ سالقىن تيگەننەن بولاتىن ماۋسىمدىق اۋرۋلارعا قاراماستان، ۇنەمى جوتەل مەن داۋىستىڭ قارلىعۋىن اتار ەدىم. بۇل بەلگىلەر ەكى اپتادان اسا ۋاقىت قايتالانسا، دارىگەرگە قارالعان ءجون. اسىرەسە، داۋىستىڭ قارلىعۋى توقتاماسا بۇل وكپە نەمەسە وڭەش وبىرىنىڭ بەلگىلەرى دەگەن ءسوز.
ال جوتەل ەشقانداي ءدارى- دارمەكتىڭ كومەگىمەن كەتپەسە، ول دا وكپەنىڭ زاقىمدانىپ، ىسىك پايدا بولۋ قاۋپى بار ەكەنىن بىلدىرەدى. قاتەرلى ىسىكتىڭ ەكىنشى بەلگىسى - تاماقتىڭ جۇتىنعان كەزدە اۋىرۋى. كەيبىرەۋلەر ءدال وسى بەلگىنى جۇيكە جۇيەسى اۋرۋلارىنىڭ بەلگىلەرىمەن شاتاستىرادى. ءبىراق جۇتىنعاندا تاماقتىڭ اۋىرۋى اس قورىتۋ جۇيەسىندەگى پروبلەمالاردان بولەك، قاتەرلى ىسىكتى تۋدىرۋى ابدەن مۇمكىن»، - دەيدى ونكولوگ.
دەرتتىڭ تاعى ءبىر بەلگىسى رەتىندە دارىگەر سەبەپسىزدەن- سەبەپسىز سالماق تاستاۋ ەكەنىن ايتادى. «كۇيزەلىسكە ءتۇسىپ، ءبىراز سالماق تاستاپتى» دەگەندى ءجيى ەستىپ جاتامىز. ءبىراق ول فاكتوردان باسقا سەبەپتەر بويىنشا سالماق تۇسىرە باستاسا، ول وتە قاۋىپتى. قالىپتى ءومىر سۇرە وتىرىپ، كەم دەگەندە 5 كەلى سالماق ءتۇسىرۋ بۇل قاتەرلى ىسىكتىڭ بىردەن- ءبىر باستى بەلگىسى. كوبىنە بۇل ۇيقى بەزىنىڭ قاتەرلى ىسىگىنە شالدىقتىرۋ مۇمكىن. ناتيجەسىندە اۋرۋ كوزگە بايقالماي اسقىنىپ، ولىمگە اكەلەدى.
ىسىكتىڭ ءتورتىنشى باستى بەلگىسىنە توقتالساق، ول - مويىننىڭ ۇنەمى اۋىرۋى. اسىرەسە، ول تۇندە جاتار كەزدە بايقالادى. باستى بۇرعاندا نەمەسە ەڭكەيگەندە مويىن ءىسىنىپ تۇرعان سياقتى بولدى. جانە ول اۋىرۋ ەشبىر جاقپا مايدىڭ كومەگىمەن كەتپەيدى. مويىن قاتەرلى ىسىگى وسىلاي باستالادى دا، مويىنداعى ىسىك بىرنەشە سانتيمەترگە وسە بەرەدى»، - دەپ ەسكەرتەدى ساتيەۆا.
سونداي- اق، ونكولوگ نەسەپ شىعارۋ پروبلەمالارى بايقالعان جاعدايدا دارىگەرگە كورىنۋگە كەڭەس بەرەدى.
«قازاقستاندىقتاردىڭ كوبى ءمان بەرمەيتىن پروبلەمالاردىڭ باستىسى - نەسەپ شىعارۋ جۇيەسى اۋرۋلارىنا ءمان بەرمەۋ. اسىرەسە، ول قان ارالاس بولسا نەمەسە نەسەپ شىعارۋ كەزىندە اۋىرسىنۋ بولۋىن گەمورروي دەپ قانا ويلايدى. ءبىراق بۇل جاعداي مىندەتتى تۇردە تەكسەرىلۋ قاجەت. تىك ىشەگى ىسىگى كەزىندە ناجىسپەن بىرگە قان ارالاس ءىرىڭدى سۇيىق شىعادى دا ءىش وتە باستايدى»، - دەيدى دارىگەر.
سوندىقتان دارىگەر دەرتتىڭ الدىن الۋ ءۇشىن جاستار بولسىن، ەرەسەكتەر بولسىن جىلىنا كەم دەگەندە ءبىر رەت سكرينينگتەن تەكسەرىلىپ، شىلىم، الكوگول سياقتى زياندى ادەتتەردەن ارىلۋ كەرەكتىگىن ايتادى.
دەرەككوز: tengrinews.kz