قىتايدا تۇراتىن قانداسىمىز الماتىدا تەڭگە ءىلۋ سايىسىنان 5-ورىنعا يە بولدى

 نۇر-سۇلتان. قازاقپارات - الماتىدا ۇلتتىق ات سپورتىنان ءوتىپ جاتقان 1- ازيا چەمپيوناتىندا تەڭگە ءىلۋ سايىسىنىڭ جەڭىمپازدارى انىقتالدى، دەپ حابارلايدى قازاقپارات ءتىلشىسى.

ق ر ۇلتتىق سپورت قاۋىمداستىعى ءمالىم ەتكەندەي، تەڭگە ءىلۋ سايىسى بويىنشا 7 مەملەكەتتىڭ جەتكىنشەكتەرى جۇلدەلى ورىنداردى ساراپقا سالدى.

تەڭگە ءىلۋ سايىسىندا قازاقستاننان نۇرحان ەلجانوۆ، عالىمجان ءىزجانوۆ باستاعان 2 جىگىتىمىز ەل نامىسىن قورعاسا، موڭعوليادان - 3، اۋعانستاننان - 3، قىتايدان - 2، وزبەكستاننان - 3، رەسەيدەن - 3، تاجىكستاننان - 3، بارلىعى 19 سپورتشى باق سىنادى. 19 سپورتشى ءۇش كەزەڭ بويىنشا باق سىنادى.

العاشقى اينالىمدا 8 سپورتشى وزدەرىنىڭ ەپتىلىگىمەن كوزگە ءتۇسىپ، كەلەسى كەزەڭگە جولداما الدى. ال ەكىنشى اينالىمنان كەيىن تەڭگە ءىلۋ الاڭىندا قازاقستاندىق ەكى ويىنشى، موڭعوليالىق ەكى ويىنشى جانە قىتايلىق ءبىر ويىنشى قالدى.

شەشۋشى سىندا قىتايدا تۇراتىن قانداسىمىز نۇربولات ءتالىپباي ۇلى 5-ورىن السا، بايان- ولگەيلىك جەڭىسبەك سەرىك پەن ايبولات ۇنات 3- جانە 4-ورىنداردى يەلەندى.

باس جۇلدەنى وتانداسىمىز عالىمجان ءىزجانوۆ قانجىعاسىنا بايلاسا، ەكىنشى ورىنعا تاعى ءبىر جەرلەسىمىز نۇرحان ەلجانوۆ قول جەتكىزدى.

جەڭىمپازداردى ماراپاتتاۋ ءراسىمى 21- ءساۋىر كۇنى وتەدى.

ەستەرىڭىزگە سالا كەتەيىك، جاستار جىلىنا وراي ۇيىمداستىرىلىپ جاتقان بىرىنشىلىكتىڭ جالپى جۇلدە قورى 16 ميلليون تەڭگەنى قۇرايدى. چەمپيوناتتى الماتى وبلىسى اكىمدىگىنىڭ قولداۋىمەن ق ر ۇلتتىق سپورت قاۋىمداستىعى ۇيىمداستىرىپ جاتىر. اتالعان دوداعا ازيانىڭ 10 ەلىنەن سپورتشىلار قاتىسۋدا. ولار كوكپار، اۋدارىسپاق، تەڭگە ءىلۋ جانە جامبى اتۋ سپورتىنان باق سىنايدى. جارىس 21- ءساۋىر كۇنى ءوز مارەسىنە جەتەدى.

اۆتور: كۇنسۇلتان وتارباي

سۋرەتتەردى تۇسىرگەن: ەرجان جاۋباي