قىزداردىڭ باقىتتى بولۋىنىڭ 5 سەبەبى

None
None
نۇر-سۇلتان. قازاقپارات - ۇلىقپان جولداسوۆ ورىندايتىن «ءسابي باقىتى» انىندە (ءانى: ب. وماروۆ، ءسوزى: س. قاليەۆ) ايتىلعانداي «ءسابيدىڭ ءبارى باقىتتى بولۋى ءۇشىن جارالعان».

باقىتسىز ءومىردىڭ ءمانى جوق. الەمدە بارلىق پەندە وزىنشە باقىتتى. ال بۇگىنگى قىزداردىڭ باقىتتى بولماۋعا حاقى جوق. نەگە؟

21 -عاسىر - عىلىم مەن تەحنولوگيانىڭ دامىعان زامانى. بۇرىنعىداي كىر جۋۋ، ءۇي تازالاۋ، تاماق ءپىسىرۋ دەگەن قيىندىقتار جوق. بۇل جۇمىستاردى ارنايى قۇرىلعىلار اتقارادى. كىر جۋاتىن ماشينا، شاڭسورعىش، ىدىس جۋاتىن ماشينا ءاربىر ۇيدە بار جابدىق. زاماننىڭ العا جىلجىعانى - ادام ويىنىڭ دامىعانى. جاسالعان قۇرالدار ايەل قاجەتتىلىكتەرىنىڭ ناتيجەسى. «Samsung»، «LG» كومپانيالارىنىڭ قۇرالدارى ادام ويىنىڭ جەمىسى.

قازاق حالقىندا قىز بالانى «توعىز جاستا وتاۋ يەسى» دەپ جاتادى. بۇرىنعىلار قىز بالانى ءوز ەركىنەن تىس جاستاي تۇرمىسقا بەرگەن، سۇيگەن ادامىمەن بىرگە بولۋىنا رۇقسات ەتپەگەن. مىسال رەتىندە «اباي جولى» ەپوپەياسىنداعى توعجان اتتى كەيىپكەردى قاراستىرۋعا بولادى. ول ابايدى سۇيەدى، الايدا ولاردىڭ قوسىلۋىنا «توعجاننىڭ باسىنداعى نوقتا مەن ابايدىڭ اياعىنداعى تۇساۋ» كەدەرگى بولادى. قازىرگى زاماندا مۇنداي قاتىگەزدىك جوق. قىزدىڭ ءوز سۇيگەنىنە قوسىلۋىنا جول اشىق. تەك اتا-اناسىنىڭ اق باتاسىن السا جەتىپ جاتىر.

الەمدە ءار ەر ادامنىڭ باسىنا جەتى قىزدان كەلەدى. بۇل دالەلدەنگەن كوزقاراس. دەمەك كەز كەلگەن ەركەككە بىرنەشە رەت شاڭىراق كوتەرۋگە مۇمكىندىك بار. ءتىپتى بۇل پىكىردى ءدىن دە قولدايدى. ءبىرىنشى ايەلى - بايبىشە، ال ودان كەيىنگىلەرى - توقالدار توبىنا جاتقىزىلادى. توقال الۋدى بۇرىنعى ادامدار قالىپتى ءىس- ارەكەت دەپ ەسەپتەدى. بايلار ءبىر-بىرىنەن قالماۋ ءۇشىن توقال الدى. ءبىز ءومىر ءسۇرىپ جاتقان زاماندا مۇنداي «ناداندىق» جوق.

ءبىلىم - تەڭىز. ونىڭ تۇڭعيىعىنا ەنىپ، بويلاي ءجۇزۋ - ءاربىر جاس جەتكىنشەكتىڭ مىندەتى. بۇل مۇمكىندىك بۇرىن ەر بالالاردا عانا بولدى. قازىر بارىمىزگە ورتاق. مىندەتتى 9 جىلدىق ءبىلىمدى بۇكىل جاستاردىڭ الۋعا قۇقىعى بار.

قازىر ءبىلىم ەرلەرگە، ايەلدەرگە دەپ بولىنبەيدى. زاماننىڭ العا جىلجىپ، قىز بالالاردىڭ ءبىلىم الۋىنىڭ ناتيجەسىندە جاڭا اقىندار مەن جازۋشى ايەلدەر ومىرگە كەلۋدە. وعان دالەل - ف. وڭعارسىنوۆا، ك. احمەتوۆا. ت. ب. قىزدارعا ءبىلىم الۋعا رۇقساتتى ەرتە بەرگەندە تاريحتا قالعان ايەل ادامداردىڭ ەسىمدەرى كوبەيەر ما ەدى؟!

ايەل تەڭدىگى - بارلىق زاماننىڭ نەگىزگى قيىندىعى. نەبىر ايگىلى جازۋشىلارىمىز ايەلدەرگە تەڭدىك الىپ بەرەمىز دەپ جۇرگەندە، دۇنيەدەن ءوتتى. مىسال رەتىندە م. دۋلاتوۆتىڭ «باقىتسىز جامال»، ج. ايماۋىتوۆتىڭ «اقبىلەك» روماندارىن الۋعا بولادى. ەكى پروزانىڭ دا نەگىزگى يدەياسى - ايەلگە تەڭدىك الىپ بەرۋ. قازىر بۇل قيىندىق ءوز شەشىمىن تاپتى. گەندەرلىك ساياسات قالىپتاستى. ايەل ادام ەر ادامنان كەم ەمەس دەگەن تۇجىرىم پايدا بولدى. ايەل ەر اداممەن تەڭ قۇقىققا يە بولدى.

تارازىعا سالىپ ويلانساق، ەر ادامدارعا قاراعاندا باقىتتى بولۋعا سەبەپتەرىمىز كوپ ەكەن. الايدا ءبىز وسى باقىتتارىمىزدى باعالاي المايتىن سەكىلدىمىز. ايتىلعان مۇمكىندىكتەردى باقىت دەپ سانامايتىندارىمىز قانشاما. باعالاي بىلمەگەنگە باق قونبايدى. بار باقتىڭ قادىرىن ءبىلىپ، باعاسىنا جەتسەك قانا باقىتقا جەتۋىمىزگە سەبەپ جانە سەبەپكەرلەر بۇدان دا كوبەيەر.


سوڭعى جاڭالىقتار