مارافونعا 5 كۇن قالعاندا

 استانا. قازاقپارات - 21 - ءساۋىر كۇنى الماتىدا مارافون وتەدى. ءداستۇرلى تۇردە ۇيىمداستىرىلىپ كەلە جاتقان جۇگىرۋ جارىسىنا قاتىسۋشىلار سانى دا جىل ساناپ ارتىپ كەلەدى.

 بيىل 8- رەت وتەتىن مارافونعا 17 مىڭعا جۋىق ادام قاتىسادى دەپ كۇتىلۋدە. قازاقستاننان وزگە الەمنىڭ 53 ەلىنەن اۋەسقوي سپورتشىلار كەلمەك. الماتى مارافونىندا ءارتۇرلى قاشىقتىقتار بويىنشا جۇگىرۋگە بولادى. قاتىسۋشىلاردى تىركەۋ اياقتالىپ ۇلگەردى. ال قاتىسۋعا نيەت بىلدىرگەندەر دايىندىقتارىن الدەقاشان باستاپ كەتكەن. ءبىز جارىسقا 5 كۇن قالعاندا قالاي دايىندالۋ جايىن ايتا كەتپەكپىز.

 1. كۇشىڭىزدى ساقتاڭىز مارافون جاقىنداعان سايىن كۇشىڭىزدى ساقتاۋعا تىرىسىڭىز. بۇرىنعىداي كوپ جاتتىعۋدى ازايتىپ، تەك فيزيكالىق قالپىڭىزدى ساقتاۋعا كوڭىل ءبولىڭىز. ياعني ازداپ جۇگىرىپ، كوپ كۇش تۇسىرمەيتىن جاتتىعۋلار جاساڭىز.

2. كوپ تاماقتانباڭىز جاتتىعۋدى ازايتقان سوڭ كوپ تاماقتانباڭىز. وسىعان دەيىن كوبىرەك جاتتىعۋ جاساپ، كالورياسى كوپ تاعامداردى تۇتىندىڭىز. ەندى جاتتىعۋ ازايعاننان كەيىن ءدال سولاي تاماقتانا بەرەتىن بولساڭىز، بىرەر كۇندە بىرنەشە كەلى سالماق قوسىپ الۋىڭىز مۇمكىن. ال مارافون كەزىندە بۇل سالماق سىزگە كەدەرگى بولادى.

 3. كيىمدەرىڭىزدى كيىپ دايىندالىڭىز جارىسقا بىرەر كۇن قالعاندا جۇگىرۋگە كيىپ شىعاتىن كيىمدەرىڭىز بەن اياق كيىمىڭىزدى دايىنداڭىز. دايىنداپ قانا قويماي، كوشەگە شىعىپ جۇگىرىڭىز دە. بۇل ءادىس مارافون كەزىندە كوبىرەك قوبالجىماۋ ءۇشىن كەرەك. پسيحولوگيالىق تۇرعىدان دايىن بولۋىڭىز دا ءتيىس. كيىمنىڭ جۇگىرۋگە ىڭعايلى، نە ىڭعايسىز ەكەنىن دە سەزىنەسىز.

 4. ۇيقىڭىزدى قالىپتى ۇستاڭىز مارافونعا از ۋاقىت قالعاندا ءبىر ۋاقىتتا تىنىعىپ، ءبىر ۋاقىتتا ويانۋدى ادەتكە اينالدىرىڭىز. مارافون باستالاتىن ۋاقىتتا كۇندە وياۋ بولىڭىز. اعزاڭىز سول ۋاقىتقا بەيىمدەلە باستايدى. ءارى مارافون كۇنى سەرگەك بولاسىز.

 5. 2-3 كۇن قالعاندا كومىرسۋى مول تاعامدار تۇتىنىڭىز كۇرىش، ماكارون، بوتقا، قارابيداي نانى، سپورتتىق سۋسىندار جانە جەمىس- جيدەك تۇتىنىڭىز. ءبىر كۇن بالىق جەۋ دە ارتىق ەمەس.

 6. تاڭعى استان باس تارتپاڭىز مارافونعا 2-3 ساعات قالعاندا مىندەتتى تۇردە كومىرسۋى مول تاعامدار ءىشىپ- جەپ، كۇش جيناپ الىڭىز. بۇل ءسىزدىڭ ۇزاق قاشىقتىقتى باعىندىرۋعا كوپ كومەگىن تيگىزەدى.

 دارىگەرلەر نە دەيدى؟

 "الماتى مارافونىن" ۇيىمداستىرۋشىلار ءاربىر قاتىسۋشىنىڭ دەنساۋلىعىنا بەي- جاي قارامايدى. جۋىردا عانا رەسمي سايتتارىندا سپورتتىق مەديتسينا سالاسىنداعى ساراپشىلار كەڭەستەرىن ۇسىندى. "اۋەسقوي سپورتشىلار كەشەندى تەكسەرىستەن ءوتىپ، جىلىنا ەكى مارتە اناليز تاپسىرۋى قاجەت. ال جۇگىرۋ جارىسىنا بىرنەشە كۇن قالعاندا دارىگەردەن كەڭەس الۋدى ۇمىتساڭىز، ءالى دە كەش ەمەس!

 تەراپيەۆت، كارديولوگقا بارىپ، جالپى قان اناليزىن تاپسىرىپ، گليۋكوزا دەڭگەيىن تەكسەرتىڭىز! جۇگىرۋ كەزىندە جۇرەككە قىسىم كورسەتۋ، جۇرەك اقاۋى بار ادامداردىڭ دەنساۋلىعىنا كەرى اسەرىن تيگىزۋى مۇمكىن. ال، قانت دەڭگەيى مولشەردەن جوعارى بولسا، مارافون جارىسىنا قاتىسۋعا مۇلدەم تىيىم سالىنىپ، ارنايى جەكە جاتتىعۋلار بەرىلەدى. سول سەبەپتى دارىگەرگە قارالۋ -  مىندەتتى شارت. سونىمەن قاتار، دارىگەر وسى سپورت تۇرىنە قارسى كورسەتىلىم بەرۋى مۇمكىن" - دەپ جازدى.

- جۇگىرۋ جۇرەك- قان تامىرلار اۋرۋلارى بار، اياق بۋىندارىنىڭ دەگەنەراتيۆتى جانە اسقىنعان وزگەرىستەرى، سوڭعى ايلارداعى جۇكتىلىك، سونداي- اق وستەوپوروزعا شالدىققان 60 جاستان اسقان ادامدار مەن وپەراتسيادان كەيىنگى كەزەڭدەگى ناۋقاستارعا قارسى كورسەتىلگەن. دەگەنمەن، فيزيكالىق بەلسەندىلىكتى شەكتەۋ -  شەشىم ەمەس. مۇمكىندىگىنشە ءوز كەستەڭىزگە دەنە جاتتىعۋلارىن قوسىپ، سكانديناۆيالىق جۇرىسپەن اينالىسىڭىز نەمەسە جاياۋ ۇزاق ۋاقىت بويى سەرۋەندەۋگە كوڭىل ءبولىڭىز. جاراقات العان جاعدايدا نەمەسە اۋرۋ كەزىندە جۇگىرۋ جارىسىنا قاتىسپاي، جانكۇيەر رەتىندە كەلگەن ءجون، - دەيدى فلەبولوگ- دارىگەر جانە انگيوحيرۋرگ، ەۋروپانىڭ انگيولوگتار قوعامىنىڭ مۇشەسى ءاليا باقىتجان قىزى جۇماتايەۆا. ايتا كەتەيىك، "الماتى مارافونى" سپورتتىق شاراسىنان تۇسكەن قارجى قايىرىمدىلىق ماقساتتا جۇمسالادى. قاتىسۋشىلارعا ساتتىلىك تىلەيمىز!

Massaget.kz