11:11, 23 - ناۋرىز 2019 | GMT +6
سەمەيدە ناۋرىز مەرەكەسىندە 5 مىڭ باۋىرساق تەگىن تاراتىلدى
سەمەي. قازاقپارت - سەمەي حالقى ناۋرىز مەرەكەسىن كەڭىنەن اتاپ ءوتتى. مەرەكەلىك ءىس- شارالار قالانىڭ بەس بىردەي الاڭىندا ءوتىپ، 20-عا جۋىق كيىز ءۇي ورناتىلدى، دەپ حابارلايدى قازاقپارات سەمەي قالاسىنىڭ اقپاراتتىق ورتالىعىنا سىلتەمە جاساپ.
مەرەكە كوركەم ۇجىمدار دايىنداعان مەرەكەلىك كونتسەرتپەن باستالدى. ونەر ۇجىمدارى وزدەرىنىڭ قازاق حالقىنىڭ سالت- داستۇرلەرىنە نەگىزدەلگەن قويىلىمدارىن كورسەتتى. قالا تۇرعىندارى قويىلىم بارىسىندا بۇركىتشىلەر مەن اڭشىلاردىڭ ونەرىن دە تاماشالاي الدى.
مەرەكە بارىسىندا قالا تۇرعىندارى ناۋرىز كوجەدەن ءدام تاتىپ، 5 مىڭعا جۋىق باۋىرساق تەگىن تاراتىلدى. ۇلكەن كولەمدەگى ۇلتتىق قازاق تاعامىن 150 اجە ازىرلەگەن.
«جاڭارۋ مەن جاسامپازدىق باستاۋى، ىرىس پەن ىنتىماقتىڭ ارقاۋى بولعان ناۋرىز مەرەكەسى بارشامىزعا قۇتتى بولسىن!. دانا حالقىمىز بۇل كۇنى ءبىر- بىرىنە اماندىق تىلەپ، كەلەر كۇنگە زور ءۇمىت ارتقان. جاڭا كۇن ەلىمىزگە تەك جاقسىلىق اكەلسىن»، - دەدى قالا اكىمى ەرماك ءسالىموۆ.