ناۋرىزدا بولاتىن تابيعاتتاعى 5 وزگەرىس

 استانا. قازاقپارات - ناۋرىز - كوكتەمنىڭ العاشقى ايى. بۇل ايدا اۋا رايى دا قۇبىلمالى بولادى.

ال ەرتەدە كوشپەلى جۇرتشىلىق ناۋرىزدىڭ كەلگەنىن تابيعاتتاعى وزگەرىستەرگە قاراپ بىلگەن. ول قانداي وزگەرىستەر ەكەنىن وقي وتىرىڭىزدار.

1. ناۋرىزدا كۇن مەن ءتۇن تەڭەلەدى، جۇلدىزدار تەڭەسەدى، ياعني سۇمبىلە، ءۇشارقار- تارازى، ۇركەر جانە سۇلۋ سارى ءبىر ءتۇزۋدىڭ بويىندا تىزىلە ورنالاسادى. ەسەپشىلەر جۇلدىزداردىڭ تەڭەسۋىنەن كۇن مەن ءتۇننىڭ تەڭەلۋىن بايقايدى.

2. ارىستان مەن وگىز شوقجۇلدىزدارى عارىش الاڭىندا شايقاسقا تۇسەدى. «اتاسى مەن اناسى، ءۇش ءجۇز الپىس بەس بالاسى، ون ەكى اۋىل شاماسى، وتىز ور دۋاداق، بەس بالاق سان، ەلۋ ەكى قاراقشى» دەگەن قازاقتىڭ جۇمباعى دا بار.

3. ەسەپشىلەر ءاز ناۋرىزدىڭ كەلگەنىن جان- جانۋارلاردىڭ قىلىعىنان دا بايقايدى. ناۋرىزدىڭ 14-دە سارىشۇناق ىنىنەن شىعادى. ناۋرىزدا كۇن سۋىق بولاتىن بولسا ءىن اۋزىنان ۇزامايدى، ال كۇن جىلى بولاتىن بولسا ۇزاعىراقتاۋ جەرگە شىعادى.

4. كۇن مەن ءتۇن تەڭەلگەندە تاسباقا ىنىنەن اۋزىنا ءشوپ تىستەپ شىعادى. ءشوپتىڭ اتى «ءماريام ءشوپ» دەپ اتالادى. ونى ەپپەن العان ادام باقىتتى، داۋلەتتى بولادى دەگەن سەنىم بار.

 5. كۇن مەن ءتۇن تەڭەلگەندە، بالىق اۋناپ تۇسەدى. كەيبىر ەلدەردە كۇن مەن ءتۇننىڭ تەڭەلگەنىن وسى قۇبىلىستان بايقايدى.

 

massaget.kz