بولگارياداعى تۋرنيردە 5 قازاقستاندىق بوكسشى «التىن» ءۇشىن تالاسادى

استانا. قازاقپارات - بولگاريا استاناسى سوفيادا ءوتىپ جاتقان «ستراندجا» حالىقارالىق تۋرنيرىندە بەس قازاقستاندىق بوكسشى فينالعا شىقتى، دەپ حابارلايدى قازاقپارات ءتىلشىسى.

قازاقستاننان جارتىلاي فينالعا بەس بوكسشى شىقسا، سولاردىڭ ءبارى تۇگەلدەي قارسىلاستارىن جەڭدى.

قازاقستاننىڭ بەس دۇركىن چەمپيونى تەمىرتاس ءجۇسىپوۆ (49 كەلى) برازيليالىق لەاندرو حوسە بلانكتى ايقىن باسىمدىلىقپەن ۇتتى. 60 كەلى سالماقتا زاكىر سافيۋللين وزبەكستاندىق شۋنكور ابدۋراسۋلوۆتى تىزە بۇكتىردى.

بولاشاعىنان ۇلكەن ءۇمىت كۇتتىرەتىن جاس بوكسشى ءساناتالى تولتايەۆ (64 كەلى) تارتىستى باسەكەدە برازيليالىق ۆاندەرسون وليۆەيرانى قاپى الدىردى. «قازاقتاردىڭ ءوز سالماعى» اتانىپ كەتكەن 69 كەلىدە ابىلايحان ءجۇسىپوۆ ۋكراينالىق ەۆگەني بارابانوۆتى 5:0 ەسەبىمەن جەرگە قاراتتى. 91 كەلى سالماقتا ۆاسيلي لەۆيت تاعى ءبىر برازيليالىق ابنەر جۋنيوردان ايلاسىن اسىردى.

وسىلايشا قازاقستاندىق بەس بوكسشى التىن جۇلدە ءۇشىن تالاسادى. فينالدا قازاقستاننان بەس، رەسەي مەن وزبەكستاننان ءتورت بوكسشىدان رينگكە شىعادى. بۇل جونىنەن قازاقستان قۇراماسى الدا تۇر.

سونىمەن، بۇگىن فينالدا تەمىرتاس ءجۇسىپوۆ پەن ءۇندىستاندىق اميت (49 كەلى) ، زاكىر سافيۋللين مەن رەسەيلىك ارتۋر سۋبحانكۋلوۆ (60 كەلى)، ءساناتالى تولتايەۆ پەن رەسەيلىك الەكسەي مازۋر (64 كەلى)، ابىلايحان ءجۇسىپوۆ پەن وزبەكستاندىق بوبو-ۋسمون بوتۋروۆ (69 كەلى) جانە ۆاسيليي لەۆيت پەن تاعى ءبىر رەسەيلىك سادام ماگومەدوۆ (91 كەلى) باس جۇلدەنى ساراپقا سالادى.

ەسكە سالا كەتەيىك، بۇدان بۇرىن التى قازاقستاندىق بوكسشىنىڭ شيرەك، كەيىن بەسەۋىنىڭ جارتىلاي فينالعا شىققانىن جازعان بولاتىنبىز.