وتىرىكتى داۋىستان تانۋدىڭ 5 ءتۇرلى ءادىسى
ال ەڭ ماڭىزدىسى - داۋىس پەن سويلەۋ ەرەكشەلىكتەرى. اقپاراتتىڭ بەلگىلى ءبىر فراگمەنتتەرىنە اكتسەنت جاساۋ (كىدىرىس، ەكپىن، داۋىس تەمبرى، ينتوناتسيا) شىندىقتى جاسىرۋعا نەمەسە بۇرمالاۋعا باعىتتالادى. ەندەشە، وتىرىكتى قالاي انىقتاۋعا بولاتىنىن ۇعۋ ءۇشىن، وسىنداي ساتتەردى قاراستىرا كەتەيىك.
شىن - ءبىر ءسوز،
وتىرىك - مىڭ ءسوز.
ماقال
كىدىرىس
ادامنىڭ جالعان سويلەپ تۇرعانىن داۋىسى ارقىلى قالاي انىقتاۋعا بولادى؟ اڭگىمە بارىسىندا كەنەتتەن پايدا بولعان كىدىرىس - ونىڭ سوزدەرىن ويلاستىرىپ جاتقانىن نەمەسە وتىرىك ايتۋ ءۇشىن قاجەتتى كۇش- جىگەر جيناۋىن (ءوز-وزىمەن ىشتەي كۇرەس) كورسەتەدى. سونداياق، ءبىر بۋىننىڭ بىرنەشە رەت قايتالانۋىن، داۋىستاعى ءدىرىلدى جاتقىزۋعا بولادى. جوتەل دە وتىرىك سويلەۋدىڭ وزىندىك ءبىر بەلگىسى ىسپەتتەس: شىندىق بەينە ءبىر تىلگە جەتپەي، ادامنىڭ تاماعىندا تۇرىپ قالعانداي اسەردە بولادى. قاراپايىم عانا سۇراققا جاۋاپ بەرۋ كەزىندەگى كىدىرىستەن سەزىكتەنۋ كەرەك. الايدا كەيدە كەرىسىنشە، ويلانۋعا ءماجبۇر بولاتىن جاعدايلاردا تەز جاۋاپ قايتارۋ دا وتىرىكتى تانۋعا كومەكتەسە الادى. سونىمەن قاتار، كىدىرىس شەشەندىك ونەردىڭ ءتيىمدى ءتاسىلى، سوندىقتان وتىرىكتەگى كىدىرىس پەن اسەر ءۇشىن جاسالعان كىدىرىستىڭ ارا- جىگىن اجىراتا بىلگەن ءجون.
جىلدام سويلەۋ
جالعان سويلەپ تۇرعان ادام وتىرىگىنىڭ اشكەرە بولاتىنىنان قورقادى، ءارى ءوزىنىڭ پوزيتسياسىنىڭ تۇراقسىز ەكەنىن بىلگەندىكتەن، قوسىمشا سۇراقتاردىڭ پايدا بولۋىنا جول بەرمەۋگە تىرىسادى. ول اڭگىمەلەسۋشىگە ويلانۋعا ۋاقىت بەرمەۋ ءۇشىن تەز سويلەۋگە تىرىسادى. ءبىراق، اڭگىمە باسقا ارناعا اۋىسقان كەزدە، ول بوساڭسىتىپ، وزىنە ۇيرەنشىكتى سويلەسۋ مانەرىنە بىردەن كوشە قويادى. ول تاقىرىپتىڭ اۋىسقانىنا قۋانىپ، الدىنداعى ماسەلەگە قايتا ورالماۋعا تىرىسادى.
داۋىستى جوعارلاتۋ
تەك كىدىرىس قانا ەمەس، ينتوناتسيا، سويلەۋ قارقىنى، داۋىس تەمبرى وتىرىكتىڭ بولۋىن ايقىندايتىن بەلگىلەردىڭ ءبىرى بولۋى مۇمكىن. وتىرىگىنىڭ اشكەرە بولۋىنان قورىققان جاعدايىندا ادام داۋىسىن كوتەرىڭكىرەپ، ءارى تەز سويلەي باستايدى. ال ادەتتەگى جاعدايدا داۋىستاپ سويلەيتىن ادام، جالعان فاكتىلەردى حابارلاعاندا كەنەتتەن داۋىسى باسەڭدەي قالادى. جايباراقات، ءبىر قالىپتى سويلەۋ اڭگىمەلەسۋشىنى قىراعىلىعىنان ايىرۋى مۇمكىن. وتىرىكتى ءجيى سويلەيتىن جاندار بۇل ءادىستى جاقسى بىلەدى، ءارى ءجيى قولدانادى.
ايلا- شارعىمەن قۇتىلۋ
وقيعا مەن جاعدايدىڭ ءمان- جاعدايى تۋرالى حاباردىڭ سيپاتىنىڭ دا ماڭىزى زور. ەگەر اڭگىمە كومەسكى، تۇسىنىكسىز بولسا، ال ناقتىلايتىن سۇراقتارعا كەلگەندە جاۋاپتان جالتارىپ، قۇتىلۋعا ايلا ىزدەسە، وندا حابارلانعان اقپاراتتاعى وتىرىكتىڭ ىقتيمالدىعى ايتارلىقتاي جوعارى بولعانى. ادام اڭگىمەنىڭ وزىنە جاعىمسىز تۇسىن اينالىپ وتكىسى كەلەدى. بۇعان سەبەپ ونىڭ اقپاراتىنىڭ بولماۋى نەمەسە سول مەزەتتە ءبىر نارسە ويلاپ تابۋعا قيالى جەتپەيتىن شىعار، قالاي دەگەنمەن، ول تىكەلەي جاۋاپ بەرۋدەن باسىن الا قاشادى.
اڭگىمە بارىسىندا قاجەتسىز، ەلەۋلى ەمەس جانە ىسكە ەش قاتىسى بولماعان نارسەلەردىڭ كوپ بولۋى، ادامنىڭ ءوز سوزدەرىنە سالماق بەرۋگە، ياعني وسىنداي سوزدەر ارقىلى الدەقايدا سەنىمدى كورىنۋگە تىرىساتىنىن اڭعارتادى. ءبىراق، مۇنداي نەگىزسىز اقپاراتتار اڭگىمەلەسۋشىنىڭ كۇمانىن تۋدىرارى انىق.
وزگەشە مىنەز- قۇلىق
سونداي-اق اڭگىمەدە ءازىلدى كوپ قولدانۋ نەمەسە مىسقىلداۋ دا وتىرىكشىلەرگە ءتان نارسە. سونىمەن قاتار، ولار تولىققاندى، انىق جاۋاپ بەرمەيدى، «مەن الاياقتىق ەمەسپىن» دەۋدىڭ ورنىنا «مەن ەمەس» دەيدى، نەمەسە كەرىسىنشە، جاعىمسىز شىندىقتى انىقتاۋعا مۇمكىندىك بەرمەستەن، جاعدايدى شاتاستىرىپ، شۇبالاڭقى جاۋاپ بەرۋگە تىرىسادى.
وتىرىكتى انىقتاۋدىڭ جولدارى كوپ، ءبىراق ەشقايسىسى دە ءجۇز پايىز انىقتاي المايدى. بارلىق فاكتورلاردى كەشەندى تالداۋ كەرەك جانە ادامنىڭ ادەتتەگى مىنەز- قۇلقىمەن سالىستىرا وتىرىپ ناتيجە شىعارعان ابزال.