اكە-شەشەنىڭ اقىلىنسىز العا باسپايتىن 5 ءىس

 استانا. قازاقپارات - قامشىنىڭ سابىنداي عانا ءومىر انە-مىنە دەگەنشە وتە شىعادى. سوندىقتان ۋاقىتتى دۇرىس جۇمساپ، وكىنبەستەي قادامدارمەن العا جول باستاۋ كەرەك.

ول ءۇشىن اتا- انانىڭ ماڭىزى زور. قاربالاسقان تىرشىلىكتە بىزگە قامقورشى دا، جاناشىر دا - سولار. ولاردان ارتىق جاقىن ادام بولمايدى دا! اتا-انانىڭ ءبىزدىڭ ىسىمىزگە ارالاسىپ، ءبىز ءۇشىن شەشىم قابىلداۋىن دۇرىس ءتۇسىنۋىمىز كەرەك. ويتكەنى ولار ءبىزدىڭ جاعدايىمىزدى ءوزىنىڭ جاعدايىنان دا بيىك قويادى. ومىردە اتا- انانىڭ شەشىمى مىنا جاعدايلاردا وتە كەرەك:

ماماندىق تاڭداعاندا. ءومىردى كورگەن ورتا جاستاعى اكە-شەشەمىز بولسىن، كوپ جاساعان اتا- اجەمىز بولسىن، ولاردىڭ ءبىزدىڭ ماماندىق تاڭداۋىمىزداعى پىكىرى ماڭىزدى. بولاشاق ماماندىعىمىز - ءبىزدى ەرتەڭگى نانىمىز. سول ءۇشىن جان- جاعىنان حابارى بار ۇلكەندەردىڭ پىكىرىنە قۇلاق اسىپ، شەشىمىنە قۇرمەتپەن قاراۋعا تىرىسۋ كەرەك.

جار تاڭداعاندا. اتا-انالار ءوز ۇلدارىنا قانداي قىزدىڭ مىنەزى ساي كەلەتىنىن، كىممەن سىيىسىپ وڭاي وتباسىن قۇرىپ كەتە الاتىنىن جاقسى بىلەدى. ءبىز سەزىممەن عانا ۇيلەنۋگە شەشىم قابىلداساق، ولار اقىل مەن جاعدايعا جۇگىنەدى. ويتكەنى ۇيلەنۋ ءۇشىن تەك سەزىمنىڭ عانا كۇشى جەتپەيدى. جار تاڭداعاندا مىندەتتى تۇردە اتا- انامىزبەن كەلىسكەنىمىز دۇرىس. جوعارىدا ايتقانىمداي، ولار بىزگە جاقسى جاعىن عانا ويلايدى.

دوس تاڭداعاندا. ادامنىڭ ارالاساتىن دوسىنا قاراپ، ءوزىن تانۋعا بولادى. ويتكەنى ادامدى ورتاسى وزگەرتەدى. نەمەسە ادام ورتاسىن وزگەرتە الادى. جانىمىزداعى دوسىمىزدىڭ قانداي ەكەنىن اكە- شەشەمىز ۇيدە وتىرىپ- اق ءبىلىپ وتىرادى. ويتكەنى ولار ءبىز ءالى وتپەگەن ءومىر ساباقتارىنان ەرتە ءوتىپ قويعان. ولار تالاي دوستىڭ ساتقىندىعى مەن ادالدىعىن كورگەن. ادامدى جاقسى تانيدى جانە زيانى كوپ دوسسىماقتاردان ۇلىن ساقتاندىرعىسى كەلەدى.

ۇرپاق وسىرگەندە. بالا تاربيەسىندە اتا مەن اجەنىڭ ماڭىزى ەرەكشە. اكە مەن شەشە بەرگەن ماحابباتتان بولەك، اتا مەن اجەنىڭ نەمەرەسى مەن شوبەرەسىنە دەگەن سۇيىسپەنشىلىگى ءتىپتى بولەك. ولار ءۇشىن بالا بالدان ءتاتتى، ال نەمەرە جاننان ءتاتتى. ولار دا تاربيە بەرە الادى، ولار دا ۇلگى- ونەگە كورسەتە الادى. بالانىڭ ءوسىپ- جەتىلۋىنە، ادامگەرشىلىگى بار ادال ازامات بولىپ وسۋىنە اكە- شەشەدەن باسقا، اتا-اجە دە ات سالىسۋى كەرەك.

جاڭا ءىس باستاعاندا. قارتايعان سايىن ۇلكەن كىسىلەر بالا سەكىلدى بولماشىعا رەنجىپ، بولماشىعا قۋانا سالادى. سوندىقتان قانداي دا ءىس باستاردا، ءوزىمىز مىڭ جەردەن دۇرىس ەكەندىگىن ءبىلىپ تۇرساق تا، اتا-انانىڭ پىكىرى مەن ويىن سۇراۋدى ادەتكە اينالدىرايىق. ولار بالاسىنىڭ وزىنەن اقىل سۇراي كەلگەنىنە ەرەكشە ءماز- مەيرام بوپ قالادى. ونىڭ ۇستىنە، ولاردىڭ بەرەر اقىلى قارتايعان سايىن قازىناعا اينالا باستايدى.