تۇركىستانعا كەلەتىن ساياحاتشىلاردىڭ سانىن 5 ميلليونعا جەتپەك
ارنايى تۇزىلگەن 2018-2025 -جىلدارعا ارنالعان تۋريستىك يندۋستريانى دامىتۋ تۇجىرىمداماسى اياسىندا وبلىسقا كەلەتىن تۋريستەردىڭ سانىن 5 ميلليونعا جەتكىزۋ مەجەلەنىپ وتىر. بۇل تۋرالى كەشە تۇركىستان قالاسىندا ەلباسىنىڭ جولداۋىن تالقىلاۋعا ارنالعان جيىندا ايتىلدى، دەپ حابارلايدى قازاقپارات ءتىلشىسى.
وبلىس اكىمى جانسەيىت تۇيمەبايەۆ مەملەكەت باسشىسىنىڭ اتالعان ساياسي قۇجاتتا تۋريزم سالاسىن دامىتۋعا ەرەكشە نازار اۋدارعانىنا توقتالىپ، بۇل جۇمىستاردىڭ بۇرىننان- اق قولعا الىنعان جوسپارلارىمەن ءبولىستى.
«مەملەكەت باسشىسى: «باي تابيعاتىمىز بەن مادەني الەۋەتىمىزدى پايدالانۋ ءۇشىن سىرتتان كەلەتىن جانە ىشكى تۋريزمدى دامىتۋعا ەرەكشە كوڭىل ءبولۋ قاجەت. ۇكىمەت قىسقا مەرزىمدە سالالىق مەملەكەتتىك باعدارلاما قابىلداۋعا ءتيىس» دەدى. مۇنداي شەشىم وبلىسىمىزعا كەلەتىن شەتەلدىك تۋريستەردىڭ سانىن ەسەلەپ ارتتىرۋعا مۇمكىندىك بەرەدى. بيىلعى جارتى جىلدىڭ وزىندە تۇركىستانعا 720 مىڭعا جۋىق ادام ساپارلادى. بۇل كورسەتكىش وتكەن جىلمەن سالىستىرعاندا 57,2 پايىزعا ءوستى. جاقىن ارادا وبلىس ورتالىعىنا كەلەتىن 1 ميلليونىنشى تۋريستى كۇتەتىن بولامىز»، - دەدى جانسەيىت تۇيمەبايەۆ.
ايماق باسشىسىنىڭ سوزىنشە، تۇركىستان وبلىسىندا تۋريزمدى كەشەندى دامىتۋ ماقساتىندا 2018-2025 -جىلدارعا ارنالعان تۋريستىك يندۋستريانى دامىتۋ تۇجىرىمداماسى ازىرلەندى.
تاياۋدا تۇركىستان قالاسىندا ءبىرىنشى «كونە تۇركىستان - جاڭا مۇمكىندىكتەر» اتتى حالىقارالىق ينۆەستيتسيالىق جانە تۋريستىك فورۋمى ءوتتى. اتالعان فورۋمعا 19 شەتەل جانە قازاقستاندىق 500-گە جۋىق ادام قاتىستى. ناتيجەسىندە، 1,7 ميلليارد ا ق ش دوللارىن قۇرايتىن 19 قۇجاتقا قول قويىلعان. بۇل تۇركىستانداعى تۋريزمدى دامىتۋعا باعىتتالعان مىسالداردىڭ بىرەۋى عانا.
ال جالپى، جان- جاقتى قولعا الىنىپ، ءتۇرلى جۇمىستاردى جۇزەگە اسىرۋدىڭ ناتيجەسىندە وبلىسقا كەلەتىن تۋريستەردىڭ سانىن ارتتىرۋ كوزدەلىپ وتىر. ماسەلەن، وبلىس ورتالىعىندا تاريحي ءەتنوتۋريزمدى دامىتۋعا بارلىق مۇمكىندىكتەر بار.
ول ءۇشىن تۇركىستان قالاسىنداعى «ازىرەت سۇلتان» قورىق- مۋزەيىنىڭ دامۋ جوسپارى تۇزىلگەن. جوسپارعا سايكەس، ءبىرىنشى كەزەكتە تۇركىستاننىڭ ەجەلگى قونىستارىنىڭ ءبىرى - كۇلتوبە قالاشىعى قايتا جاڭعىرتىلادى. ابىلمامبەت حان مەن تاۋكە حاننىڭ وردالارى، ولاردىڭ جانىنداعى ورتاعاسىرلىق ۇلگىدەگى مەشىتى جانە باسقا دا ءبىرقاتار نىساندار تولىق قايتا قالپىنا كەلتىرىلەدى.
تۇركىستاننىڭ تاريحي قۇندىلىقتارىن ساقتاۋ، ودان ارى كوركەيتۋ، قوجا احمەت ياسساۋي كەسەنەسى نەگىزىندە مادەني- رۋحاني ورتالىقتى ساقتاۋ جانە اكىمشىلىك- ىسكەرلىك ورتالىقتى قۇرۋعا ەرەكشە كوڭىل بولىنۋدە.
الداعى ۋاقىتتا تۇركىستان قالاسىندا حالىقارالىق تالاپتارعا ساي كەلەتىن اۋەجاي، تەمىرجول ۆوكزالى مەن اۆتوۆوكزال سالۋ جوسپارلانىپ وتىر. تۋريستەرگە سەرۆيستىك قىزمەتتى جەتىلدىرۋ ماقساتىندا تۇركىستاندا زاماناۋي قوناق ۇيلەر مەن دەمالىس ورىندارىن اشۋعا ينۆەستورلار تارتۋ جۇمىستارى بەلسەندى تۇردە جۇرگىزىلۋدە.
