باس جۇلدە - 5 ميلليون تەڭگە: استانادا حالىقارالىق اقىندار ايتىسى وتەدى
اقىندار ايتىسى تۋرالى ايتىلعان استاناداعى باسپا ءسوز ءماسليحاتىنا بۇگىن ق ر مادەنيەت جانە سپورت ءمينيسترى ارىستانبەك مۇحامەدي ۇلى، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت، قازاقستاننىڭ حالىق اقىنى ءاسيا بەركەنوۆا جانە قازاقستاننىڭ ەڭبەك سىڭىرگەن قايراتكەرى ءجۇرسىن ەرمان مەن «التىن دومبىرا» سىيلىعىنىڭ ەكى مارتە يەگەرى مۇحتار نيازوۆ قاتىستى.
«ەلوردا ولەڭ- جىرعا بولەنەر ەلەۋلى وقيعانىڭ الدىندا تۇرمىز. سەبەبى، استانانىڭ 20 جىلدىعى اياسىندا وتەتىن حالىقارالىق اقىندار ايتىسىنا موڭعوليا، قىرعىز رەسپۋبليكاسى مەن قىتاي حالىق رەسپۋبليكاسىنان اقىندار كەلەدى. بىرنەشە جىل بۇرىن ءجۇرسىن ەرمان اعامىز مۇنداي اۋقىمداعى ايتىستى وتكىزگەن بولاتىن. بۇل جولعىسى دا كەڭ اۋقىمدى ايتىس بولايىن دەپ تۇر»، - دەدى ارىستانبەك مۇحامەدي ۇلى.
حالىقارالىق اقىندار ايتىسى استانانىڭ 20 جىلدىعىنا ارنالىپ وتىر. ايتىسقا ميناتحان ۇلاربەك، ءجاميعا داۋلەت قىزى (ق ح ر)، ايدوس راشات، امانجول قۋانتقان (موڭعوليا)، اسىلبەك ماراتوۆ، ۋسۋپبەك ۋۋلۋ مۋندۋزبەك (قىرعىز رەسپۋبليكاسى) پەن قازاقستاننان رينات زايتوۆ، ەركەبۇلان قاينازاروۆ، سەرىك قويشىعۇلوۆ، ءبىرجان بايتۋوۆ، مۇحتار نيازوۆ قاتىسادى.
ايتىسقا مەملەكەتتىك سىيلىقتىڭ لاۋرەاتى ۇلىقبەك ەسداۋلەت (ءادىل قازىلار القاسىنىڭ ءتوراعاسى)، پروفەسسور ديحان قامزابەك ۇلى، تاريح عىلىمىنىڭ دوكتورى، تۇركيانىڭ ميمار سينان كوركەم ونەر ۋنيۆەرسيتەتىنىڭ پروفەسسورى ءابدىۋاقاپ قارا، اقىن، جازۋشى شىناي راحمەت ۇلى (موڭعوليا)، ايتىس اقىنى ءاسيا بەركەنوۆا تورەلىك ەتەدى. جىر دوداسىندا باس جۇلدە يەگەرىنە 5 ميلليون تەڭگە تابىستالسا، ءبىرىنشى ورىنعا 2,5 ميلليون تەڭگە، ەكىنشى ورىن 2 ميلليون تەڭگە، ءۇشىنشى ورىنعا (2 ادام) ميلليون تەڭگەدەن بەرىلەدى.