قازاقستان تۋماسى ا ق ش-تا كيبەرشابۋىلدار جاساعانى ءۇشىن 5 جىلعا سوتتالدى
23 جاستاعى قازاقستان تۋماسى، سونداي-اق 250 مىڭ دوللار كولەمىندە ايىپپۇل تولەۋگە مىندەتتەلدى. بۇل تۋرالى كانادانىڭ CBC جاڭالىقتار اگەنتتىگى حابارلادى.
بىلتىر باراتوۆ ايىپ تاعىلعان 9 تارماق بويىنشا ءوز كىناسىن مويىندادى. وعان قاماۋعا الىنعانعا دەيىن جەتى جىل بويى Yahoo ينتەرنەت-سەرۆيسى قولدانۋشىلارىنىڭ ەسەپ جازباسىن بۇزدى دەگەن ايىپ تاعىلدى.
كانادالىق حاكەر مەن ونىڭ بىرنەشە سىبايلاسى رەسەي ارنايى قىزمەتىنىڭ تاپسىرىسىمەن ەسەپ جازبالارىن بۇزۋمەن اينالىسقان. باراتوۆتىڭ ادۆوكاتى ونىڭ كليەنتىنىڭ ناقتى كىمگە جۇمىس ىستەگەنىن بىلمەيتىنىن ءمالىم ەتتى.
العاشقىدا پروكۋراتۋرا باراتوۆتى 7 جىل ون ايعا باس بوستاندىعىنان ايىرۋدى سۇرادى. باراتوۆتىڭ ادۆوكاتتارى جازالاۋ مەرزىمىن 3 جىل ون ايعا قىسقارتۋعا تىرىستى.
ولار باراتوۆتىڭ Yahoo قولدانۋشىلارى ەسەپ جازبالارىن بۇزعاندا 19 جاستا ەكەندىگىن، بۇل قىلمىسقا اۋەستىكپەن بارعاندىعىنا سەندىردى.
ونىڭ ادۆوكاتتارى ەندريۋ مانچيللا مەن روبەرت فەنتون سوتتا كليەنتىنىڭ ەشكىمگە زيان كەلتىرگىسى كەلمەگەندىگىن، ىستەگەن ارەكەتىنە وكىنەتىنىن مالىمدەدى.
دەرەكتەر بويىنشا، باراتوۆ 2010 -جىلدان بەرى 11 مىڭنان استام قولدانۋشىنىڭ ەسەپ جازباسىن بۇزىپ، ولاردىڭ جەكە دەرەكتەرىن ساتۋمەن اينالىسقان. ولاردىڭ ىشىندە مەملەكەتتىك قىزمەتشىلەر، ديپلوماتتار، قارجى قۇرىلىمدارىنىڭ قىزمەتكەرلەرى، كوممەرتسيالىق كومپانيالاردىڭ اككاۋنتتارى بار.
باراتوۆ تۇتقىندالعان كەزدە كانادانىڭ ونتاريو پروۆينسياسىندا انكاستەرا قالاسىنىڭ سىرتىنداعى قۇنى 650 مىڭ دوللار تۇراتىن ۇيدە تۇرعان. ول قىمبات كولىكتەردى تىزگىندەگەن. ونىڭ كوللەكسياسىندا Lamborghini, Porsche, Aston Martin, Mercedes جانە BMW ماركالى كولىكتەر بولعان. جاس جىگىت الەۋمەتتىك جەلىگە ءجۇز دوللارلىق اقشا بۋمالارىن ۇستاپ تۇسكەن سۋرەتتەرىن سالعان.
23 جاستاعى قازاقستان تۋماسى 2017 -جىلدىڭ تامىزىندا ءوز كىناسىن تولىقتاي مويىندادى. بۇعان دەيىن ول وزىنە تاعىلعان ايىپتى تەرىسكە شىعارىپ، كانادادان ا ق ش-قا ەكستراديتسيالانۋدان باس تارتقان ەدى.