استاناداعى «ۇلتتىق ءونىم» كورمەسىنە 5 مىڭنان استام تاۋار قويىلعان
شاراعا 350 كاسىپورىن قاتىسىپ جاتىر. بيىل 4-مارتە ۇيىمداستىرىلىپ جاتقان كورمە شاعىن جانە كاسىپكەرلىككە قولداۋ كورسەتۋدى كوزدەيدى. سونىمەن قاتار وتاندىق تاۋار وندىرۋشىلەردىڭ ءونىمىن تانىستىرۋعا مۇمكىندىك جاسايدى.
«ۇلتتىق ءونىم» كورمەسى كاسىپكەرلىكتىڭ كوكجيەگىن كەڭەيتۋدى كوزدەيدى. جىل ساناپ وعان قاتىسۋشىلار سانى دا، تاۋار ءتۇرى دە ارتىپ كەلەدى. بيىل كەلۋشىلەر 5 مىڭنان استام تاۋار قويىلعان 350-دەن اسا كاسىپورىننىڭ ءونىمىن ءبىر جەردەن تابا الادى. كاسىپكەرلەردىڭ ايتۋىنشا، مۇنداي شارا كوپكە تانىلۋمەن قاتار باسەكەگە قابىلەتتىلىكتى ارتتىرا تۇسپەك. بۇل ساپالى ءونىم شىعارۋعا نەگىز بولادى.
بيزنەس يەلەرىنىڭ كوپشىلىگى كورمەنىڭ تۇراقتى قاتىسۋشىلارى. ال بۇل قاتارعا جاڭادان قوسىلىپ جاتقان كاسىپكەرلەر جيىننىڭ ماڭىزى مەن ءتيىمدى تۇستارى جەتەرلىك ەكەنىن ايتىپ وتىر.
باقىتجان سەرىك، كومپانيا وكىلى:
- ءبىز جىلۋ پانەلدەرىن وندىرەمىز. ءبىزدىڭ ءوندىرىس الماتى وبلىسىندا ورنالاسقان. ءوندىرىستى ەۋروپا مەن جاپون تەحنولوگيالارىمەن جاسايمىز. ءبىز بۇل كورمەگە العاش رەت قاتىسىپ جاتىرمىز. بۇل قۇرىلىس ماتەريالدارى فاسادتا قولدانىلادى. بىزدە دەكور ەلەمەنتتەرى مەن جىلۋ پانەلدەرى فاسادتا قولدانىلادى.
قازاقستاندا جاسالعان ءونىمدى ءوز ەلىمىزبەن قاتار حالىقارالىق نارىققا شىعارۋ، ۇلتتىق برەندتى قالىپتاستىرۋ - مەملەكەت باسشىسىنىڭ باستى تالابى. بۇل ماقساتتا ەلىمىزدە شاعىن جانە ورتا كاسىپكەرلىكتى دامىتۋعا بارىنشا قولداۋ كورسەتىلىپ جاتىر. «ۇلتتىق ءونىم» كورمەسى دە سونىڭ ءبىر كورىنىسى.
اباي سارقۇلوۆ، شارانى ۇيىمداستىرۋشى:
- وسى جىلى بۇكىل قازاقستاننان كاسىپكەرلەر كەلۋدە. وسىنى استانادا وتكىزىپ جاتىرمىز. سەبەبى لوگيستيكالىق جاعىنان وڭىرلەرگە وتە ءتيىمدى بولىپ تۇر. كاسىپكەرلەردەن ۇسىنىستار بار باسقا قالالاردا وتكىزەيىك دەگەن. وتاندىق ەكونوميكانى دامىتاتىن باستى شارا دەپ ويلايمىز.
شارا بارىسىندا كاسىپكەرلەر تەحنولوگيانى جەتىلدىرۋ، شيكىزات الماسۋ، مامانداردى وقىتۋ سياقتى ماسەلەلەر بويىنشا كەلىسىمشارت جاساۋدى جوسپارلاعان. ولارعا ارناپ شەبەرلىك ساباقتارى دا وتكىزىلەدى.
ايتا كەتەيىك، كورمە ءۇش كۇنگە سوزىلادى. بارلىق تاۋار تۇرلەرى ءوندىرۋشىنىڭ باعاسىمەن ساتىلادى.
www.24.kz