ەل تاريحىنداعى ەڭ ءىرى پارادقا 5 مىڭ اسكەري قىزمەتشى قاتىستى - فوتو
وندا 5 مىڭنان استام اسكەري قىزمەتشى، 300 اسكەري تەحنيكا مەن 70 اسكەري اۆياتسيا ۇشاعى قازاقستان قارۋلى كۇشتەرى قول جەتكىزگەن ەرەن جەتىستىكتەردى كورسەتتى، دەپ حابارلايدى «قازاقپارات» ح ا ا ءتىلشىسى.
سالتاناتتى شەرۋدى قازاقستان رەسپۋبليكاسى اۋە قورعانىسى كۇشتەرىنىڭ تىكۇشاقتار توبى اشتى. ولار بەلگىلەنگەن تارتىپتە جىلجي وتىرىپ، اۋەدە 25 مەرەكەلىك داتاسىنىڭ بەينەسىن جاسادى. جاياۋ اسكەر لەگىن «جاس ۇلان» اسكەري مەكتەپتەرىنىڭ تاربيەلەنۋشىلەرى - بارابانشىلار روتاسى باستادى.
بارابانشىلار ساپىندا استانا، الماتى، قاراعاندى جانە شىمكەنت قالالارىنداعى رەسپۋبليكالىق «جاس ۇلان» مەكتەپتەرىنىڭ ۇزدىك وقۋشىلارى بار. بارابانشىلاردان كەيىن شەرۋدى ق ر قورعانىس مينيسترلىگىنىڭ وفيتسەرلەر توبى جالعاستىردى. ءارى قاراي قۇرلىق اسكەرى، اۋە قورعانىسى كۇشتەرى، اسكەري-تەڭىز كۇشتەرى، «وڭتۇستىك»، «شىعىس»، «استانا، «باتىس» وڭىرلىك قولباسشىلىقتارى، دەسانتتىق-شابۋىلداۋشى اسكەرلەر، بارلاۋشىلار روتاسى، ارنايى وپەراتسيالار كۇشتەرى، اسكەري پوليتسيا، «قازبات» بىتىمگەرشىلىك روتاسى جانە ق ر ۇ ق ك شەكارا قىزمەتى «بوران» ارنايى روتاسىنىڭ پارادتىق ەسەپتوپتارى ءجۇرىپ ءوتتى.
سونىمەن بىرگە، پارادقا راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ، تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىنىڭ، شوقان ءۋاليحانوۆ اتىنداعى كادەت كورپۋسىنىڭ، ۇلتتىق قاۋىپسىزدىك كوميتەتى شەكارا قىزمەتى اكادەمياسىنىڭ كۋرسانتتارى، ق ر تۇڭعىش پرەزيدەنتى اتىنداعى ۇلتتىق قورعانىس ۋنيۆەرسيتەتىنىڭ وفيتسەرلەرى، ق ر ۇلتتىق ۇلان اسكەري ينستيتۋتىنىڭ تۇلەكتەرى، ۇلتتىق گۆارديا اسكەريلەرى قاتىستى.
جاياۋ اسكەر لەگىن قازاقستان رەسپۋبليكاسى مەملەكەتتىك كۇزەت قىزمەتىنىڭ روتاسى تۇيىندەدى. مەحانيكالاندىرىلعان لەك باسىندا قازاقستاندىقتار 2016-2017-جىلدارى ساتىپ الىنعان زاماناۋي اسكەري تەحنيكا مەن جاڭا قارۋ-جاراق تۇرلەرىن تاماشالادى.
اۋە قورعانىسى كۇشتەرىنىڭ ەڭ ۇزدىك ۇشۋ اپپاراتتارى استانا اسپانىندا ءوز شەبەرلىكتەرىن كورسەتتى. «رومب» جاۋىنگەرلىك تارتىبىندە ساپ تۇزەگەن «جەتىسۋ» پيلوتتىق توبى سۋ-27 اۋىر جويعىش ۇشاقتارىمەن استانا اسپانىندا «بايتەرەك» اتتى جوعارى پيلوتاج فيگۋراسىن جاسادى.
سالتاناتتى شارانى ق ر قورعانىس مينيسترلىگىنىڭ، ۇلتتىق ۇلان جانە مەملەكەتتىك كۇزەت قىزمەتىنىڭ مۋزىكانتتارىنان قۇرالعان اسكەري قۇراما وركەسترى اياقتادى. وعان پرەزيدەنت وركەسترىنىڭ باسشىسى، ق ر ەڭبەك سىڭىرگەن ونەر قايراتكەرى پولكوۆنيك تالعات بەردىعۇلوۆ جەتەكشىلىك ەتتى.
ەسكە سالا كەتسەك، وسىدان 25 جىل بۇرىن 1992-جىلدىڭ 7- مامىرىندا ەل پرەزيدەنتى نۇرسۇلتان نازاربايەۆ قازاقستان رەسپۋبليكاسىنىڭ قارۋلى كۇشتەرىن قۇرۋ تۋرالى جارلىققا قول قويدى.
شيرەك عاسىردا قازاقستان قارۋلى كۇشتەرىنىڭ جاڭا بەينەسى قالىپتاستى. سانى از بولسا دا، كاسىبي بىلىكتىلىگى جوعارى، جيناقى، زاماناۋي قارۋ-جاراقتارمەن، جاڭا اسكەري تەحنيكالارمەن جاراقتاندىرىلعان ارميا قۇرىلدى.
اۆتور: ايجان سەرىكجان قىزى