تاريحي «الماس قىلىش» فيلمىن تۇسىرۋگە 5 ميلليون دوللار جۇمسالدى

None
None
الماتى. قازاقپارات - «الماس قىلىش» تاريحي فيلمىن (العاشقى اتاۋى - «قازاق ەلى» ) ءتۇسىرۋدىڭ ەكىنشى ماۋسىمى 2017 -جىلى باستالادى.  

بۇل تۋرالى الماتىدا فيلمنىڭ پرەمەرالىق كورسەتىلىمىندە بەلگىلى بولدى، دەپ حابارلايدى «قازاقپارات» ح ا ا ءتىلشىسى. فيلم رەجيسسەرى رۇستەم ابدىراشەۆ كوركەم فيلم قالاي تۇسىرىلگەنىن بايانداپ بەردى. ونىڭ ايتۋىنشا، «الماس قىلىشتى» تۇسىرۋگە ەكى جىل ۋاقىت كەتكەن. فيلمگە 500 ادام تارتىلعان. ونىڭ 200 ى ءتۇسىرىلىم توبىنىڭ مۇشەلەرى. ناقتى ءتۇسىرۋ جۇمىستارى 30 عا جۋىق نىساندا بەس اي بويى جۇرگەن. فيلم سەناريىن جازۋشى سماعۇل ەلۋباي ءىلياس ەسەنبەرليننىڭ «الماس قىلىش» رومانىنىڭ جەلىسى بويىنشا دايىنداعان. ءتۇسىرۋ جۇمىستارى الماتى قالاسى جانە الماتى وبلىسى اۋماعىندا، جارتى بولىگى «قازاق فيلم» كينوستۋدياسىندا جاسالعان دەكوراتسيادا وتكەن. وندا سۋرەتشىلەر شايبانشاحتىڭ سارايىن جاساعان.

فيلمنىڭ نەگىزگى ءتۇپنۇسقاسى تولىعىمەن قازاق تىلىندە، اراسىندا جوڭعار تىلىندە جانە سولتۇستىك موڭعول ديالەكتىسى بويىنشا سوزدەر ەنگەن. 2017 -جىلدىڭ 4 -قاڭتارىندا كارتينانىڭ ورىس تىلىندەگى نۇسقاسى جارىققا شىعادى. رەجيسسەردىڭ ايتۋىنشا، قازىر دۋبلياج جۇمىستارى جۇرگىزىلىپ جاتىر. وندا سۋبتيتر ەۋروپالىق كورەرمەن ءۇشىن اعىلشىن تىلىندە بەرىلەدى.

«بۇل العاشقى قارلىعاشى. ەگەر كورەرمەن كوڭىلىنەن شىعىپ جاتسا، ەكىنشى ماۋسىمى بولادى. ءبىزدىڭ تاريحىمىز باي. ءبىز اتا- بابالارىمىز الدىندا قارىزدارمىز. تاريحىمىزدىڭ اقتاڭداق بەتتەرىن كورسەتۋگە جول اشقان تاۋەلسىزدىككە مىڭ العىس»، - دەدى رۇستەم ابدىراشەۆ. رەجيسسەر ءوز سوزىندە فيلمگە جۇمسالعان قاراجاتتى دا ايتىپ ءوتتى.

ونىڭ ايتۋىنشا، فيلم بيۋدجەتى 2 ميلليارد تەڭگەگە جەتكەن. سالىقتارىمەن ەسەپتەگەندە 5 ميلليون دوللار جۇمسالعان. «الدا كەلەسى ماۋسىمدار تارتىمدى، قۇندى بولادى دەپ ۇمىتتەنەمىن. جاڭا ماۋسىمعا جاڭا جىل مەرەكەسىنەن كەيىن كىرىسۋىمىز مۇمكىن. تۇسىرىلگەن ماتەريالداردان 2-3 سەرياعا قور بار. كەلەسى جىل سوڭىندا تاعى ءبىر ماۋسىم بولادى»، - دەدى رەجيسسەر. ەسكە سالايىق، بۇعان دەيىن رۇستەم ابدىراشەۆ «الماس قىلىش» فيلمىنە بىردە-ءبىر ۇلتتىق كومپانيا كومەكتەسپەدى، ەشبىر تەلەارنا ۇسىنىس جاساعان جوق» دەپ ءۋاج ايتقان بولاتىن.

اۆتور: الماس مۇقاش ۇلى

سوڭعى جاڭالىقتار