جاراپازان ايتىپ جۇرگەن 57 جاس ءوسپىرىم انىقتالدى

استانا. قازاقپارات - جەرگىلىكتى پوليتسيا قىزمەتى باسقارماسىنىڭ قىزمەتكەرلەرى قالا اۋماعىندا كامەلەتكە تولماعانداردىڭ قاداعالاۋسىز ءجۇرۋىنىڭ الدىن الۋ بويىنشا ءىس-شارا وتكىزدى.

ءتارتىپ ساقشىلارى تۇنگى ۋاقىتتا كامەلەتكە تولماعاندارعا قاتىستى نەمەسە ولار تاراپىنان جاسالاتىن قۇقىق بۇزۋشىلىقتىڭ الدىن الۋ جانە جولىن كەسۋ ماقساتىندا جاستار كوپ شوعىرلاناتىن ورىندارعا رەيد جۇرگىزدى.

شارا بارىسىندا جەرگىلىكتى پوليتسيا قىزمەتى باسقارماسىنىڭ قىزمەتكەرلەرىمەن تۇنگى ۋاقىتتا اتا-اناسىنىڭ باقىلاۋىنسىز جۇرگەن 140 جاس ءوسپىرىم انىقتالدى.

اتاپ ايتقاندا: ق ر ا ق ب ت ك-نىڭ 442-بابى (كامەلەتكە تولماعانداردىڭ زاڭدى وكىلدەرىنىڭ ەرىپ ءجۇرۋىنسىز تۇنگى ۋاقىتتا ويىن-ساۋىق مەكەمەلەرىندە نەمەسە تۇرعىنجايدان تىس جەردە بولۋى) بويىنشا 83 بالانىڭ اتا-اناسىنا اكىمشىلىك حاتتاما تولتىرىلدى.

ءدىني ءداستۇردىڭ ءتىنىن جالعاعان جاسوسپىرىمدەر بۇگىندە كەشكى ۋاقىتتا جاراپازان ايتىپ، جارىسىپ ءجۇر. ارينە اتا-انانىڭ قاداعالاۋىنسىز جۇرگەن جاسوسپىرىمدەدىڭ ءتۇرلى قۇقىق بۇزۋشىلىققا بوي الدىرۋى دا بەك مۇمكىن.

سونداي-اق، ساعات 20:00 مەن 23:00 ارالىعىندا ءدامحانا، مەيرامحانا اۋماقتارىندا جانە كوشە قيىلىستارىندا جاراپازان ايتىپ جۇرگەن 57 جاس ءوسپىرىمنىڭ اتا-اناسى شاقىرتىلىپ، پروفيلاكتيكالىق تۇسىندىرمە جۇمىستارى جۇرگىزىلدى. قاداعالاۋسىز جۇرگەن 9 جاس ءوسپىرىم بەيىمدەۋ ورتالىعىنا ورنالاستىرىلدى.

وسى ورايدا، شىمكەنت قالاسى پوليتسيا دەپارتامەنتىنىڭ قىزمەتكەرلەرى ءبىلىم بەرۋ ۇيىمدارىندا وقۋشىلارمەن كەزدەسۋ وتكىزىپ، تۇنگى ۋاقىتتا ءدامحانا، مەيرامحانا اۋماقتارىندا جانە كوشە قيىلىستارىندا جاراپازان ايتۋ بالانىڭ ءومىرى مەن قاۋىپسىزدىگىنە قاۋىپتى ەكەندىگى تۋرالى تۇسىندىرمە جۇمىستارىن جۇرگىزۋدە. الداعى ۋاقىتتا اتالمىش باعىتتاعى وقيعالاردىڭ قايتالانباۋى ءۇشىن قاتاڭ ەسكەرتۋ بەرىلدى. بۇدان بولەك، اتا-انالارمەن دە تۇسىندىرمە جۇمىستارى جالعاسۋدا.