جىل باسىنان بەرى سىبايلاس جەمقورلىق بويىنشا 570 ادام سوتتالدى

None
None
نۇر- سۇلتان. قازاقپارات - سىبايلاس جەمقورلىققا قارسى قىزمەت جىل باسىنان بەرى 772 ءىستى سوتقا جولداعان. سونداي- اق كىناسى دالەلدەنگەن 570 ادام سوتتالعان، دەپ حابارلايدى قازاقپارات ءتىلشىسى.

سىبايلاس جەمقورلىققا قارسى ءىس- قيمىل اگەنتتىگىنىڭ اسا ماڭىزدى ىستەر بويىنشا تەرگەۋشىسى دانيار بەگايداروۆ Antikor اقپارات الاڭىندا وسىنداي مالىمەت كەلتىردى.

«سىبايلاس جەمقورلىققا قارسى قىزمەت 2021 -جىلدىڭ وتكەن كەزەڭىندە 1038 سوتقا دەيىنگى تەرگەپ- تەكسەرۋدى تىركەدى، ونىڭ 772- ءسى سوتقا جىبەرىلدى. اتالعان قىلمىستىق ىستەر بويىنشا 135 لاۋازىمدى تۇلعا ۇستالدى، 122 ادامعا قاتىستى «كۇزەتپەن ۇستاۋ» جانە 29 ادامعا قاتىستى «ءۇيقاماق» بۇلتارتپاۋ شارالارى قولدانىلدى»، - دەدى اگەنتتىكتىڭ اسا ماڭىزدى ىستەر بويىنشا تەرگەۋشىسى.

ونىڭ سوزىنە قاراعاندا، جىل باسىنان بەرى سىبايلاس جەمقورلىق قىلمىستىق ىستەر بويىنشا 570 ادام سوتتالعان. ونىڭ ىشىندە 138 ادام پارا العانى ءۇشىن، 237 ادام پارا بەرگەنى ءۇشىن، 12 ادام دەلدالدىق ءۇشىن، 78 ادام الاياقتىق ءۇشىن، 42 ادام ۇرلىق ءۇشىن، 42 ادام لاۋازىمدىق وكىلەتتىكتەرىن تەرىس پايدالانعانى ءۇشىن، 11 ادام بيلىكتى نەمەسە لاۋازىمدىق وكىلەتتىكتەرىن اسىرا پايدالانعانى ءۇشىن جاۋاپقا تارتىلعان.

«باس بوستاندىعىنان ايىرۋعا - 172 ادام، باس بوستاندىعىن شەكتەۋگە - 56 (قالعاندارى شارتتى مەرزىمگە جانە جازاسىن وتەۋدى كەيىنگە قالدىرا وتىرىپ - 8)، پارا سوماسىنان بىرنەشە ەسەلەنگەن ايىپپۇلدارعا 330 ادام تارتىلدى. ايىپپۇلداردىڭ جالپى سوماسى شامامەن 1,9 ميلليارد تەڭگە بولدى»، - دەدى دانيار بەگايداروۆ.

سوڭعى جاڭالىقتار