567 كۇدىكتىگە قاتىستى 300 دەن اسا ءىس سوتقا جولداندى – ءى ءى م
30 ماۋسىم 21:57

567 كۇدىكتىگە قاتىستى 300 دەن اسا ءىس سوتقا جولداندى – ءى ءى م

نۇر-سۇلتان. قازاقپارات - قاڭتار وقيعاسىنا قاتىسقان 567 كۇدىكتىگە قاتىستى 346 ءىس ايىپتاۋ اكتىسىمەن سوتقا جولداندى.

بۇل تۋرالى ق ر ءى ءى م تەرگەۋ دەپارتامەنتىنىڭ باستىعى سانجار ءادىلوۆ ايتتى، دەپ حابارلايدى قازاقپارات ءتىلشىسى.

«ىشكى ىستەر مينيسترلىگى قاڭتار وقيعاسى بويىنشا قىلمىستىق ىستەردى تەرگەۋدى جالعاستىرۋدا. بۇگىنگى تاڭدا ىشكى ىستەر ورگاندارى تەرگەۋشىلەرىنىڭ وندىرىسىندە 516 قىلمىستىق ءىس بار. ولار بويىنشا 14 ادام كۇزەتپەن ۇستالۋدا. 567 كۇدىكتىگە قاتىستى 346 ءىس ايىپتاۋ اكتىسىمەن سوتقا جولداندى. ولاردىڭ كوپشىلىگى جاپپاي تارتىپسىزدىك ۋاقىتىندا جاساعان ۇرلىق (424 ادام)، قارۋدى زاڭسىز ساقتاۋ (45)، قارۋدى ۇرلاۋ (38)، كولىك قۇرالدارىن ايداپ كەتۋ (10)، توناۋ (9) جانە بۇزاقىلىق (6) ءۇشىن جاۋاپكەرشىلىككە تارتىلۋدا»، - دەدى سانجار ءادىلوۆ ورتالىق كوممۋنيكاتسيالار قىزمەتىندەگى بريفينگ بارىسىندا.

ونىڭ دەرەگىنشە، سوتتار 388 ادامنىڭ ىشىنەن: باس بوستاندىعىن شەكتەۋگە - 334 ادامدى؛ قوعامدىق جۇمىستارعا - 4 ادامدى؛ ايىپپۇلعا - 4 ادامدى سوتتادى. 12 ادام تاتۋلاسۋىنا بايلانىستى قىلمىستىق جاۋاپكەرشىلىكتەن بوساتىلدى جانە 46 ادام اۋىر جانە اسا اۋىر قىلمىستاردى جاساعانى ءۇشىن باس بوستاندىعىنان ايىرىلدى.

«167 سوتتالۋشىعا قاتىستى 86 قىلمىستىق ءىس ءالى سوتتىڭ قاراۋىندا»، - دەدى ول.

دەپارتامەنت باستىعىنىڭ دەرەگىنشە، قابىلدانعان شارالاردىڭ ناتيجەسىندە ازاماتتار مەن بيزنەس سۋبەكتىلەرىنىڭ قۇنى 343 ميلليون تەڭگەدەن ارتىق ۇرلانعان مۇلكى الىندى. ونىڭ ىشىندە 12 اۆتوماشينا، تۇرمىستىق تەحنيكانىڭ 317 بىرلىگى، 189 زەرگەرلىك بۇيىم، 286 ۇيالى تەلەفون، 16 ميلليوننان استام تەڭگە، كيىمنىڭ 550 بىرلىگى بار.


جاڭالىقتار