ەلگە جەتۋ ءۇشىن 55 قازاقستاندىق لۆوۆتاعى كونسۋلدىق الدىنا جينالدى - ايبەك سمادياروۆ
رەسمي وكىلدىڭ ايتۋىنشا، اتالعان ازاماتار پولشا ارقىلى ەلگە قايتارىلماق، دەپ حابارلايدى قازاقپارات ءتىلشىسى.
«ءبىزدىڭ مينيسترلىك پولشا ارقىلى رەپاترياتسيالىق اۋە رەيسىن ۇيىمداستىرۋعا رۇقسات الدى. لۆوۆتاعى جاعدايعا كەلسەك، ەلگە جەتۋ ءۇشىن قازاقستاننىڭ سونداعى كونسۋلدىعى عيماراتىنىڭ الدىنا 55 وتانداسىمىز جينالدى. ولار پولشا ارقىلى كەلمەك. بۇل ازاماتتار جاقىن ماڭداعى مەكتەپ اۋماعىن پانالاعان ەدى. الايدا نىساندى اتۋ مۇمكىندىگىنە بايلانىستى ازاماتتار ول جەردەن شىعارىلدى. ءبىزدىڭ كونسۋلدىڭ ايتۋىنشا، كولىكپەن قامتاماسىز ەتۋدە قيىندىق تۋىنداپ جاتىر. شەكارادا جىبەرىلگەن العاشقى رەيس ءالى لۆوۆقا ورالمادى، ولار كەپتەلىستە تۇر»، - ا. سمادياروۆ مينيسترلىكتە وتكەن بريفينگتە.
رەسمي وكىلدىڭ مالىمدەۋىنشە، ازاماتتاردى جەتكىزۋدە كولىكتىڭ باعاسى ايتارلىقتاي وسكەن. «كەيبىر اۆتوبۋستار بىرنەشە كۇن كەپتەلىسكە تۇرىپ قالۋى مۇمكىن ەكەنىن ءبىلىپ، جول جۇرۋدەن باس تارتىپ جاتىر. بەيبىت ۋاقىتتا كولىكتىڭ قۇنى قولجەتىمدى بولسا، قازىر ءبىر اۆتوبۋس ءۇشىن 20 مىڭ دوللارعا دەيىن سۇراپ وتىر. سوندىقتان بۇل ماسەلەنى ءبىز كونسۋلدىق ماماندارىمەن بىرلەسىپ شەشەتىن بولامىز. ازاماتتارىمىزدى شىدامدىلىققا شاقىرامىز»، - دەيدى ول.