اقتوبەدە تۇرمىستىق نەسيەنى وتەي الماعان 55 مىڭ ادامنىڭ ءوسىماقىسى كەشىرىلدى
قازىرگى كەزدە الەۋمەتتىك جاعىنان قورعالعان ادامداردىڭ 4,6 ميلليارد تەڭگەسى وتەلدى، دەپ حابارلايدى قازاقپارات ءتىلشىسى.
اقتوبە تۇرعىندارى نەسيەنىڭ بەلگىلى ءبىر بولىگى وتەلگەنىن SMS حابارلاما ارقىلى ءبىلىپ وتىر. ماسەلەن، تۇرمىستىق، كەپىلسىز نەسيە العان 25 مىڭ ادامنىڭ 4,6 ميلليارد تەڭگەسى وتەلدى. قارىزى وتەلەتىن ادامدار ساناتىنا كوپبالالى، اسىراۋشىسىنان ايىرىلىپ، تولەم الىپ وتىرعان وتباسى، مۇگەدەك بالا اسىراپ وتىرعاندار، 18 جاستان اسقان مۇگەدەكتەردى باعاتىندار مەن مەملەكەتتىك اتاۋلى الەۋمەتتىك كومەك الاتىندار، اتا-انانىڭ قامقورلىعىنسىز قالعاندار كىرەدى.
«سونىمەن قاتار تۇرمىستىق نەسيە العان كەز كەلگەن ازاماتتىڭ ايىپپۇلى، ءوسىماقىسى كەشىرىلدى. قازىرگى كەزدە اقتوبە وبلىسى بويىنشا 55 مىڭ ادامنىڭ 1,3 ميلليارد تەڭگەسى شەگەرىلدى. ەكى جاعدايدا دا بانككە، باسقا مەملەكەتتىك ورگاندارعا بارۋدىڭ قاجەتى جوق. ءبارى ورتالىقتاندىرىلعان، بانكتەر ءوز كليەنتتەرىنە SMS جىبەرىپ جاتىر»، - دەدى ق ر ۇلتتىق بانكى اقتوبە وبلىستىق فيليالى ديرەكتورىنىڭ ورىنباسارى دانات سەيىلوۆ.
نەسيەنى وتەۋ تۋرالى ءبىلۋ ءۇشىن بانككە بارۋدىڭ قاجەتى جوق. تەك كۇتۋ قاجەت. ەگەر وتباسىنداعى اناسىنىڭ قارىزى وتەلىپ، اكەسىنىكى سول سول كۇيى قالسا، ا ح ا ج بولىمىنە نەمەسە ح ق ك و بارۋ كەرەك.
«ماجىلىستە «بانك جانە بانك قىزمەتى تۋرالى» زاڭ جوباسى جاتىر. الداعى ۋاقىتتا تابىسى كۇنكورىس دەڭگەيىنە جەتپەيتىن ادامدارعا نەسيە بەرىلمەيدى. سونىمەن قاتار نەسيە تولەنبەي قالعان كەزدە ءوسىماقى قوسۋ تەك 90 كۇنمەن شەكتەلەدى. سول 90 كۇننەن سوڭ ەشقانداي ءوسىماقى ەسەپتەلمەيدى»، - دەدى دانات سەيىلوۆ.
اۆتور: التىناي ساعىندىقوۆا