اقتاۋدىڭ 55 جىلدىعىنا وراي ۇيىمداستىرىلاتىن شارالار ەكى كۇنگە سوزىلادى
كاسپي جاعاسىندا ورنالاسقان اسەم قالا - گاز بەن مۇناي وندىرەتىن ونەركاسىپ ورتالىعى. ەل تۇرعىندارىنىڭ بەرگەن باعاسى بويىنشا، بۇل ەڭ تازا شاھار. سونداي- اق، كوشەسىنە اتاۋ بەرىلمەيتىن قازاقستاننىڭ ەرەكشە قالاسى سانالادى.
55 جىلدا شاعىن قالا سولتۇستىك باتىسقا قاراي كەڭەيىپ، ءتۇرلى ءزاۋلىم عيماراتتار بوي كوتەردى. دەموگرافيالىق كورسەتكىش تە قارقىندى دامۋدا. قازىر قالا حالقىنىڭ سانى - 200 مىڭعا جۋىق.
مەرەكەنى قالا تۇرعىندارى 2 كۇن قاتارىنان اتاپ وتپەك.
21 - قىركۇيەكتە ساعات 11.00-دە «اباي» اتىنداعى مادەنيەت كەشەنىندە اقتاۋ قالاسىنىڭ تاريحىنان سىر شەرتەتىن سۋرەتتەر كورمەسى وتەدى.
ساعات 15.00-دە «اباي» اتىنداعى مادەنيەت كەشەنى الدىندا اباي ەسكەرتكىشى اشىلادى. ال، كەشكى ساعات 17.00-دە 15-شاعىن اۋدانداعى تەڭىز جاعالاۋىندا سپورتتىق شارالار وتەدى.
ەرتەڭ «ءتۇپ- توركىنىن تورگە وزدىرعان ماڭعىستاۋ» تاقىرىبىندا ەتنوگرافيالىق فەستيۆال 15-شاعىن اۋدانداعى تەڭىز جاعالاۋىندا ساعات 18.00-دە باستالادى. مۇندا تۇرعىندار شۇبات ىشۋدەن جارىسىپ، كورمەنى تاماشالاي الادى. ساعات 19.00-دە 15-شاعىن اۋدانداعى امفيتەاتردا «تۋعان كۇنىڭمەن، سۇيىكتى قالام!» تاقىرىبىندا گالا- كونسەرت وتەدى.
ال، 22 - قىركۇيەك كۇنى ۇلتتىق سپورتتىڭ تورەسى - سايگۇلىكتەردىڭ الامان بايگەسى وتەدى. سونىمەن بىرگە قىز قۋۋ بولىپ، بىلەگى مىقتى جىگىتتەر بوز كىلەمدە بەلدەسەدى. ساعات 17.00-دە تەڭىز جاعالاۋىندا سپورتتىق شارالار ۇيىمداستىرىلادى. كەشكى ساعات 18.30-دا قازاقستان حالقى اسسامبلەياسى شىعارماشىلىق ۇجىمدارى كونسەرت قويادى، سونداي- اق قالانىڭ قۇرمەتتى ازاماتتارىمەن كەزدەسۋ وتەدى.
بۇل شارادان «نۇر شاح» ءسان ءۇيى دە قالىس قالمايدى. تەڭىز جاعالاۋىندا ءسان ءۇيىنىڭ توپتامالارىن كورسەتپەك.
سول كۇنى، كەشكى ساعات 20.00-دە ەسترادا جۇلدىزدارىنىڭ قاتىسۋىمەن «اقتاۋىم - ارۋ، ءاز مەكەن!» تاقىرىبىندا مەرەكەلىك كونسەرت بولادى. ال، 23.00-دە وتشاشۋمەن اياقتالادى.
اۆتور: ايگەرىم اشىقبايەۆا