11:46, 16 - قازان 2019 | GMT +6
يمپەراتوردىڭ تاققا وتىرۋىنا بايلانىستى 550 مىڭ ادامعا راقىمشىلىق جاسالماق
نۇر-سۇلتان. قازاقپارات - جاپونيا ۇكىمەتى ەلدىڭ جاڭا يمپەراتورى نارۋحيتونىڭ تاققا وتىرۋىنا بايلانىستى سوتتى بولعان 550 مىڭ ادامعا راقىمشىلىق جاريالاۋدى كوزدەپ وتىر، دەپ حابارلايدى قازاقپارات Yomiuri Shimbun باسىلىمىنا سىلتەمە جاساپ.
رەسمي دەرەككوزدەردىڭ مالىمدەۋىنشە، راقىمشىلىقتىڭ ەگجەي-تەگجەيى تۋرالى سوڭعى شەشىمدى ەل ۇكىمەتى وسى اپتانىڭ اياعىنا قاراي قابىلدايدى. سودان كەيىن ونى مونارح ماقۇلداۋى قاجەت.
بۇعان دەيىن جاپونيادا 1990 -جىلى - يمپەراتور اكيحيتو تاققا وتىرعاندا ءىستى بولعان 2,5 ميلليون ادامعا راقىمشىلىق جاسالعان. ەندى يمپەراتور تاقتى ءوز ەركىمەن ۇلى نارۋحيتوعا تاپسىردى.
يمپەراتور نارۋحيتو بيىل 1 -مامىردا تاققا وتىرعان. سول كەزدە وعان مەملەكەتتىڭ باس ءمورى مەن يمپەراتور ءمورى، مەملەكەتتىك سيمۆولدار تاپسىرىلعان.
ءبىراق جاڭا يمپەراتوردىڭ تاققا وتىرۋىنا بايلانىستى باستى سالتاناتتار 22 -قازان كۇنى جانە قاراشا ايىندا وتەدى.