ۇماي ۇلتتىق سىيلىعىنىڭ جۇلدە قورى 54 ميلليون تەڭگە

استانا. قازاقپارات – ق ر مادەنيەت جانە سپورت ۆيتسە-ءمينيسترى نۇرعيسا داۋەشوۆ ورتالىق كوممۋنيكاتسيالار قىزمەتىندە وتكەن بريفينگىدە ونەر سالاسىنداعى Umai ۇلتتىق سىيلىعىنىڭ شارتتارىن تانىستىردى، دەپ حابارلايدى قازاقپارات ءتىلشىسى.

مينيستر ورىنباسارىنىڭ ايتۋىنشا، اتالعان سىيلىق ەلىمىزدە تۇڭعىش رەت تاعايىندالىپ وتىر.

«وتاندىق مادەنيەت جانە ونەر قايراتكەرلەرىنىڭ شىعارماشىلىق جەتىستىكتەرىن تانىتۋ، دامىتۋ جانە ناسيحاتتاۋ ماقساتىمەن قازاقستان رەسپۋبليكاسىنىڭ ونەر سالاسىنداعى Umai ۇلتتىق سىيلىعى تاعايىندالدى.

بۇل سىيلىق قازاقستاننىڭ شىعارماشىلىق ۇجىمدارى مەن جەكەلەگەن ونەر قايراتكەرلەرىنە ەلەۋلى شىعارماشىلىق تابىستارى مەن كاسىبي جەتىستىكتەرى ءۇشىن «تەاتر ونەرى»، «مۋزىكالىق ورىنداۋشىلىق ونەر»، «حورەوگرافيالىق ونەر»، «تەاترداعى بەينەلەۋ ونەرى» سياقتى 4 نوميناتسيا بويىنشا 19 پرەميا تابىس ەتىلەدى»، - دەگەن ۆەدومستۆو وكىلى سىيلىقتىڭ جۇلدە قورىن دا اتادى.

«سىيلىقتىڭ جالپى جۇلدە قورى 54 ميلليون تەڭگەنى قۇرايدى. ونىڭ ىشىندە 2022-جىل بالالار جىلى بولعاندىقتان، سىيلىق اياسىندا «ۇزدىك بالالار سپەكتاكلى» دەگەن ارنايى جۇلدە تاعايىندالىپ وتىر.

سىيلىق 2022-جىلى قازاقستاننىڭ شىعارماشىلىق ۇجىمدارىنا جانە جەكەلەگەن قازاقستاننىڭ ونەر قايراتكەرلەرىنە 2020-جىلعى قىركۇيەكتەن باستاپ 2022-جىلعى شىلدە ارالىعىنا دەيىنگى ەكى تەاترلىق، كونسەرتتىك، شىعارماشىلىق ماۋسىمداعى سپەكتاكلدەر، كونسەرتتەر، شىعارماشىلىق جوبالار، ونەر تۋىندىلارى ءۇشىن تابىستالادى»، - دەدى نۇرعيسا داۋەشوۆ.

بۇعان دەيىن Umai ۇلتتىق سىيلىعىنا ءوتىنىم قابىلداۋ باستالعانى تۋرالى حابارلاندى.