جامبىل وبلىسىندا 54 مەديتسينا قىزمەتكەرى كوروناۆيرۋس جۇقتىرعان
وڭىردەگى كوروناۆيرۋس ينفەكسياسىنىڭ ەپيدەميولوگيالىق جاعدايى تۋرالى جامبىل وبلىسى اكىمىنىڭ ورىنباسارى ەرجان جىلقىبايەۆتىڭ توراعالىعىمەن كەڭەس وتىرىسى ءوتىپ، وندا قالىپتاسىپ وتىرعان احۋال سارالاندى.
وكىنىشكە قاراي، بۇگىندە وبلىستاعى قورداي، جۋالى اۋداندارى مەن تاراز قالاسىندا ىندەت جۇقتىرعاندار ازايماي تۇر. سوندىقتان تالاپتى كۇشەيتۋ جايى قارالدى.
«مەديتسينا سالاسىنىڭ قىزمەتكەرلەرى، مۇعالىمدەر مەن وقۋشىلاردىڭ سىرقاتتانىپ جاتقانى جانعا باتادى. ناقتى ساندارعا جۇگىنسەك، ەلىمىزدە كوروناۆيرۋس ينفەكسياسى تارالعالى بەرى وبلىس بويىنشا - 411، ونىڭ ىشىندە بيىل 54 مەديتسينا قىزمەتكەرى ىندەت جۇقتىرىپ الدى. سىرقاتتانعان ازاماتتاردىڭ 70 پايىزى جۇمىس ورنىنان تىس جەردە جۇقتىرعان. دەسە دە، دەنساۋلىق ساقتاۋ سالاسى ماماندارىن قاجەتتى قورعانىس كيىمدەرىمەن قامتۋعا باسا نازار اۋدارۋ قاجەت. بۇل ماقساتتا رەسپۋبليكالىق بيۋدجەتتەن 2 ميلليارد 735 ميلليون تەڭگە ءبولىنىپ، وعان ماسكا، ارنايى كيىمدەر سەكىلدى كەرەك- جاراقتىڭ بارلىعى الىندى. بۇل قور كۇن وتكەن سايىن تولىعىپ كەلەدى. ماسەلەن، سوڭعى ەسەپ بويىنشا ايماقتا اتالعان زاتتاردىڭ 77 كۇنگە جەتەتىن مولشەرى بار»، - دەپ جازدى ەرجان جىلقىبايەۆ ءوزىنىڭ فەيسبۋك الەۋمەتتىك جەلىسىندەگى جەكە پاراقشاسىندا. سونداي-اق، وبلىس اكىمىنىڭ ورىنباسارى ىندەتكە قارسى تۇرۋدىڭ ەڭ ءتيىمدى جولى - ۆاكسينالاۋ ەكەنىن ايتادى. اسىرەسە، ەكپە اۋرۋدىڭ وشاعىندا جۇرگەن مەديتسينا قىزمەتكەرلەرى ءۇشىن اسا قاجەتتىگىنە ايرىقشا توقتالعان.
«جەلتوقسان مەن قاڭتار ايلارىندا ءبىرقاتار دەنساۋلىق ساقتاۋ سالاسى قىزمەتكەرلەرى ەرىكتى تۇردە ەكپە سالدىرعان بولاتىن. بۇدان بولەك، جىل باسىنان بەرى اق حالاتتىلارعا 850 دوزا ۆاكسينا تاعى ەگىلدى. ناتيجەسىندە ايماقتا 1180 مامان ۆاكسينامەن قامتىلدى. بۇل جۇمىستاردى جالعاستىرۋ ماقساتىندا كۇنى كەشە قوسىمشا 5250 دوزا ەكپە تاعى جەتكىزىلدى. جالپى 13870 دەنساۋلىق ساقتاۋ قىزمەتكەرىن ۆاكسينامەن قامتۋ كوزدەلگەن»، - دەدى ە. جىلقىبايەۆ.
سونىمەن قاتار، وبلىستا ءبىلىم سالاسى قىزمەتكەرلەرىن ۆاكسينالاۋ جۇمىستارى دا باستالدى. ەكپە سالۋ ەڭ اۋەلى باستاۋىش سىنىپ مۇعالىمدەرىنە جۇرگىزىلەدى. ول ءۇشىن ايدىڭ سوڭىنا دەيىن تاعى 6 مىڭ دوزا ۆاكسينا الۋ جوسپارلانعان. ال ەكپە ەگۋدىڭ ءۇشىنشى كەزەڭىندە ستۋدەنتتەردى قامتۋ كوزدەلىپ وتىر. بۇل شارۋالار دەنساۋلىق ساقتاۋ سالاسىنىڭ ماماندارى مەن مۇعالىمدەردىڭ اراسىندا اۋرۋ تارالۋىن تەجەۋگە ءوز اسەرىن تيگىزبەك. جيىن بارىسىندا ايماقتاعى كوروناۆيرۋس ينفەكسياسىنىڭ ەپيدەميولوگيالىق احۋالى جانە تاراز قالاسى مەن اۋداندارداعى مونيتورينگتىك توپتاردىڭ جۇمىستارىن دا تالقىلادى.
اۆتور: سايا سەمباي