ينتەرنەتتەن يت- مىسىق ساتىپ العان استانالىقتار 540 مىڭ تەڭگەگە الداندى
الاياق ايەل «Olx.kz» سايتىنا اسىل تۇقىمدى كۇشىكتەر مەن مارعاۋلار نارىقتاعى باعادان ارزانعا ساتىلاتىنى تۋرالى جالعان حابارلاندىرۋ جاريالاعان. سولاي 11 ادامنان ءتۇرلى كولەمدە اقشا الداپ العان. اقشانىڭ جيىنتىق سوماسى 540 مىڭ تەڭگەگە جۋىق.
«سوتتا ازامات م. - ءنىڭ كىناسى زارداپ شەككەندەردەن الىنعان جاۋاپپەن، «بەرەكە بانك» جانە «Kaspi Bank» ءۇزىندى كوشىرمەلەرى ارقىلى، «وەليكس» ج ش س مەن «كاسپي بانك» جولداعان جاۋاپتار نەگىزىندە، تەلەفون قوڭىراۋلارى مەن حات الماسۋ سكرينشوتتارى ارقىلى، وزگە دە قۇجاتتاردىڭ كومەگىمەن دالەلدەندى. ايىپتالۋشىنىڭ ءوزى دە كىناسىن مويىندادى»، - دەپ جازىلعان ەرسمي سايتتا.
سوت كۇدىكتىنىڭ كىناسىن مويىنداپ، قاتتى وكىنەتىنىن ەسكەرگەن.
«سوت ۇكىمىمەن ازامات م. الاياقتىق ارەكەت ءۇشىن ايىپتى دەپ تانىلىپ، 4 جىلعا باس بوستاندىعىنان ايىرىلدى.
سوت ونىڭ بۇعان دەيىن قاراعاندى وبلىسىنداعى تەمىرتاۋ قالالىق سوتىنىڭ ۇكىمىمەن جازاعا تارتىلعانىن ەسكەرىپ، 4 جىل 8 اي مەرزىمگە باس بوستاندىعىنان ايىرۋ تۋرالى جازا تاعايىندادى.
سوتتالۋشىعا مۇلكىن تاركىلەۋ جازاسى قولدانىلعان جوق. سوتقا دەيىنگى تەرگەپ- تەكسەرۋ كەزىندە ودان قىلمىستىق جولمەن تاپقان مۇلىك تابىلمادى. جاپا شەگۋشىلەردىڭ ازاماتتىق شاعىمى تولىعىمەن قاناعاتتاندىرىلدى. سوت ۇكىمى كۇشىنە ەنگەن جوق»، - دەپ جازىلعان استانا قالالىق سوتىنىڭ رەسمي سايتىندا.