قىلمىستىق توپقا كىرگەن پوليتسەيلەر قامالدى - 53 كولىك زاڭسىز تىركەۋگە قويىلعان

شىمكەنت. قازاقپارات - شەتەلدەن اكەلىنگەن كولىكتەردى قازاقستان رەسپۋبليكاسىندا تىركەۋگە زاڭسىز قويىپ كەلگەن قىلمىستىق توپ اشكەرەلەندى. ولاردىڭ ىشىندە پوليتسيا دەپارتامەنتىنىڭ 2 قىزمەتكەرى بار، دەپ حابارلايدى قازاقپارات.

Polisia.kz مالىمەتىنشە، شىمكەنت قالاسىنداعى ءى ءى م ورتالىق اپپاراتىنىڭ قىزمەتكەرلەرى قىلمىستىق سحەمانى ارنايى وپەراتسيا بارىسىندا انىقتادى. ماسەلەن، تاياۋ شەت مەملەكەتتەردەن اكەلىنگەن كولىكتەر كەدەندىك تولەمدەر، ۋتيلالىم جانە مەملەكەتتىك باجدار تولەنبەستەن قازاقستان رەسپبليكاسىندا تىركەۋگە قويىلىپ كەلگەن.

«قالالىق پوليتسيا دەپارتامەنتى پروتسەسسينگ ورتالىعىنىڭ ەكى قىزمەتكەرى سوت سانكسياسىمەن قاماۋعا الىندى. شىمكەنتتە وسى سحەما بويىنشا قازاقستاندا ەسەپكە قويىلعان 53 اۆتوكولىك بويىنشا عانا مەملەكەتكە 320 ميلليون تەڭگەدەن استام زالال كەلتىرىلدى»، - دەلىنگەن حابارلامادا.

ءمالىم ەتىلگەندەي، قىلمىستىق توپ قۇرامىنا پروتسەسسينگ ورتالىعىنىڭ قىزمەتكەرلەرىنە جاقىن جۇرگەن ادامدار، حالىققا قىزمەت كورسەتۋ ورتالىقتارىنداعى «كومەكشىلەر»، سونداي- اق جالعان سەنىمحاتتار جازىپ بەرىپ وتىرعان نوتاريۋستار كىرگەن.

قازىرگى ۋاقىتتا ق ر ءى ءى م وزىندىك قاۋىپسىزدىك دەپارتامەنتى وسىعان ۇقساس فاكتىلەر بويىنشا 7 وڭىردە قىلمىستىق ىستەر تەرگەپ جاتىر. سوڭعى ءۇش جىلدا 2 مىڭنان استام كولىك زاڭسىز ەسەپكە قويىلعان. مەملەكەتكە 10 ميلليارد تەڭگەدەن استام شىعىن كەلتىرىلدى.

گۇلميرا الياكپاروۆا