مينيستر ءابىلقاسىموۆا كىمدەر زەينەتكە 53 جاسىندا شىعاتىنىن ايتتى
بۇل تۋرالى Sputnik قازاقستان اگەنتتىگى حابارلايدى.
مينيستر بۇگىنگى ۇكىمەت وتىرىسىندا كوپبالالى انالارعا مەملەكەت تاراپىنان قانداي كومەك پەن جەڭىلدىك قاراستىرىلعانىن اتاپ ءوتتى.
ونىڭ ايتۋىنشا، ۇكىمەتتىڭ قولداۋى ءسابي ومىرگە كەلگەن كەزدەن باستالادى.
«جىل سايىن ەلىمىزدە 400 مىڭ نارەستە دۇنيە ەسىگىن اشادى. مىسالى، بىلتىر 391 مىڭ بالا ومىرگە كەلدى. ءبىرىنشى، ەكىنشى جانە ءۇشىنشى بالا تۋعاندا بەرىلەتىن ءبىر جولعى جاردەماقى 95950 تەڭگەنى قۇرايدى. وتباسىندا ءتورتىنشى جانە ودان دا كوپ بالا دۇنيەگە كەلەتىن بولسا، بۇل جاردەماقىنىڭ مولشەرى 159 مىڭ تەڭگەگە ۇلعايادى»، - دەدى ءابىلقاسىموۆا ۇكىمەت وتىرىسىندا.
مينيستر الەۋمەتتىك جاردەماقىنىڭ ەكىنشى ءتۇرى ءبىر جاسقا دەيىنگى بالا كۇتىمىنە سايكەس تولەنەتىنىن جەتكىزدى.
«ولارعا ءبىر جىلعا دەيىن ايىنا ورتاشا 14,5 مىڭنان 20,5 مىڭ تەڭگەگە دەيىن تولەنەدى. اناسى نەمەسە اكەسى جۇمىس جاساپ، ولاردىڭ اتىنا مىندەتتى مەديتسينالىق ساقتاندىرۋ قورىنا الەۋمەتتىك اۋدارىم تولەنگەن بولسا، ولارعا قوردان ورتاشا ەسەپپەن 32 مىڭ تەڭگە بەرىلەدى»، - دەپ ءتۇسىندىردى ول.
ءابىلقاسىموۆانىڭ ايتۋىنشا، قازىرگى ۋاقىتتا ەلىمىزدەگى 300 مىڭنان استام كوپبالالى انا زەينەتكە ەرتە شىعىپتى.
«ماتەريالدىق كومەكتەن بولەك، بىزدە كوپبالالى انالار ءۇشىن زەينەتكە ەرتە شىعۋ مۇمكىندىگى ويلاستىرىلعان. ياعني، ولار زەينەتكە 53 جاسىندا شىعۋ قۇقىعى بار از ساناتتاردىڭ ءبىرى. بۇگىندە 332 مىڭ كوپبالالى انا وسى قۇقىقتى پايدالانعان»، - دەدى مينيستر.
سونداي-اق، انالاردىڭ ەڭبەك قۇقىعى قورعالعانى اتاپ ءوتىلدى.
ونىڭ ايتۋىنشا، جۇكتى ايەلدىڭ، ءۇش جاسقا دەيىنگى جانە سەگىز جاسقا دەيىنگى بالاسىن تاربيەلەپ وتىرعان جالعىزباستى انانىڭ ەڭبەك شارتىن بۇزۋعا جۇمىس بەرۋشىنىڭ قۇقىعى جوق.