نەگىزسىز قۋدالانعان 52 ادامنىڭ ءىسى توقتاتىلدى - باس پروكۋراتۋرا
بۇل تۋرالى قازاقپارات اتالعان ۆەدومستۆونىڭ باسپا ءسوز قىزمەتىنە سىلتەمە جاساپ حابارلايدى.
بيىلعى جىلى پروكۋرورلاردىڭ كومەگىمەن 2800 جۇمىسكەردىڭ قۇقىقتارى قورعالىپ، ولارعا 800 ميلليون تەڭگە كولەمىندە جالاقى تولەندى.
ەلەكتر جانە جىلۋ تاريفتەرى تومەندەتىلىپ، تۇتىنۋشىلاردىڭ 30 ميلليارد تەڭگە قاراجاتىنىڭ ورنى تولتىرىلدى.
مەملەكەتكە پايدالانىلماعان 11 مىڭ جەر ۋچاسكەلەرى قايتارىلدى.
ع. نۇرداۋلەتوۆ اتقارىلعان جۇمىستاردى اتاپ ءوتىپ، وبلىس پروكۋرورلارىنا حالىقتىڭ الاڭداۋشىلىعىن تۋدىراتىن ماسەلەلەردى شەشۋگە ءوز كۇشتەرىن باعىتتاۋدى تاپسىردى.
«ءبىز كەز كەلگەن زاڭ بۇزۋشىلىقتى قاتاڭ تۇردە توقتاتۋعا مىندەتتىمىز. ازاماتتاردىڭ قۇقىقتارىن قورعاۋ ءبىزدىڭ باستى باسىمدىلىعىمىز»، - دەپ تالاپ ەتتى.
باس پروكۋرور سونداي-اق، قىلمىستىق پروتسەستە پروكۋراتۋرا ورگاندارىنىڭ قۇقىق قورعاۋشىلىق الەۋەتى ءتيىمدى تۇردە اشىلعانىن اتاپ ءوتتى.
ىقپال ەتۋ شارالارىمەن 52 ادامدى نەگىزسىز قۋدالاۋ توقتاتىلدى. 414 زاڭسىز ۇستالعاندار قىزمەتتىك جايلار مەن يزولياتورلاردان بوساتىلدى.
پروكۋرورلاردىڭ باستاماسىمەن سوتتار 655 ازاماتقا قاتىستى ۇكىمدى قايتا قارادى، 195 سوتتالعان ادامنىڭ جاعدايى جاقسارتىلدى.
قاۋىپتى ەمەس، ونىڭ ىشىندە ەكونوميكالىق قىلمىستاردى قىلمىس دەپ تانىماۋ جانە بالاما جازالاردى ەنگىزۋ، جازالاۋ پراكتيكاسىن تومەندەتتى.
سوتتالعانداردىڭ تورتتەن ءبىر بولىگىنە عانا (13622-نىڭ 3289-نا) ناقتى باس بوستاندىعىنان ايىرۋ مەرزىمدەرى تاعايىندالدى.
بۇل رەتتە، قىلمىستىق زاڭنامانى گۋمانيزاتسيالاۋ قىلمىس جاعدايىن ناشارلاتپادى. قىلمىس دەڭگەيى %12 عا تومەندەدى.
ءماجىلىس جۇمىسىنىڭ قورىتىندىسى بويىنشا قاداعالاۋ ورگانىنىڭ جەتەكشىسى پروكۋرورلاردىڭ الداعى كەزەڭگە ارنالعان ناقتى مىندەتتەرى مەن نەگىزگى باعىتتارىن بەلگىلەدى.
ولاردىڭ قاتارىندا زاڭنىڭ ۇستەمدىگىن قامتاماسىز ەتۋدى، ازاماتتار قۇقىقتارىنىڭ كەپىلدىگىن نىعايتۋدى، قوعام مەن مەملەكەتتىڭ مۇددەلەرىن قورعاۋدى قامتاماسىز ەتۋگە باعىتتالعان ستراتەگيالىق جانە باعدارلامالىق قۇجاتتار جانە ەلباسى مەن پرەزيدەنت تاپسىرمالارى بار.