جۇمىسقا ورنالاستىرعان ءبىر ادام ءۇشىن مەملەكەت 52,5 مىڭ تەڭگەگە دەيىن تولەيدى
«ەكى جىلدان بەرى مەملەكەت جۇمىس ىزدەۋ جانە جۇمىسسىزداردى ەڭبەككە ورنالاستىرۋ بويىنشا اۋتسورسينگتىك قىزمەت كورسەتەتىن جەكە HR- اگەنتتىكتەردى تارتۋدا. جۇمىسقا ءساتتى ورنالاستىرىلعان ءاربىر ادام ءۇشىن 35 مىڭ تەڭگەدەن 52,5 مىڭ تەڭگەگە دەيىن تولەنەدى. ءبىراق كوپتەگەن ادامدار ءتىپتى، جەكە تۇلعالار وسىلاي تابىس تابۋعا بولاتىنىن بىلمەيدى.
«حالىقتى جۇمىسپەن قامتۋ تۋرالى» زاڭعا سايكەس اۋتسورسينگتىك قىزمەت كورسەتۋگە قاتىساتىن ۇمىتكەرلەرگە بىردەي تالاپتار قويىلادى. زاڭدى جانە جەكە تۇلعالاردىڭ ءتيىستى جۇمىس تاجىريبەسى، سونداي- اق قاجەتتى ماتەريالدىق جانە ەڭبەك رەسۋرستارى بولۋى ءتيىس. ال، جەكە تۇلعالاردىڭ تەك ءبىر عانا جالدامالى قىزمەتكەرى جانە جەكە كاسىپكەرلىك تۋرالى تىركەۋى بولسا جەتكىلىكتى» ، - دەيدى «ەڭبەك رەسۋرستارىن دامىتۋ ورتالىعى» اق- دان. اۋتسورسينگ قاتىسۋشىلارى مەملەكەتتەن ءبىرقاتار ءتيىمدى ۇسىنىستار مەن ارتىقشىلىقتاردى الا الادى: - مەملەكەتتىك جۇمىسپەن قامتۋ ورتالىعىنىڭ ماماندارى جان- جاقتى قولداۋ كورسەتەدى؛ - حالىقتى جۇمىسپەن قامتۋ ورتالىعى جۇمىسسىزدار تۋرالى تولىق اقپارات بەرەدى؛ - ەلەكتروندى فورماتتا حالىقتى جۇمىسپەن قامتۋ ورتالىعىمەن اۋتسورسينگ تۋرالى شارتتى «ەلەكتروندىق ەڭبەك بيرجاسىندا» (www.enbek.kz) جاساي الادى؛ - اۋتسورسينگتىك قىزمەت كورسەتۋ اياسىندا جۇمىسسىزداردى جۇمىسقا ورنالاستىرۋ ءۇشىن كەپىلدى تولەم الادى؛ - «ەلەكتروندىق ەڭبەك بيرجاسى» پورتالىنداعى بوس جۇمىس ورىندارىن شەكسىز پايدالانا الادى. «حالىقتى جۇمىسپەن قامتۋ سالاسىندا اۋتسورسينگتىك قىزمەت كورسەتۋ جاڭا بيزنەستى باستاعىسى كەلەتىندەرگە تاماشا مۇمكىندىك. ويتكەنى قاتىسۋ ءۇشىن از قارجى جۇمسالادى. شارت بويىنشا اۋتسورسينگتىك قىزمەت كورسەتەتىن اگەنتتىك نەمەسە جەكە كاسىپكەر (ج ك) 30 جۇمىس كۇن ىشىندە بوس جۇمىس ورنىن ىزدەپ تابۋى كەرەك. اۋتسورسينگ ارقىلى جۇمىسقا ورنالاسقان ازاماتتار التى ايدان كەم ەمەس ۇزدىكسىز جۇمىس ىستەۋى ءتيىس»، - دەدى «ەڭبەك رەسۋرستارىن دامىتۋ ورتالىعى» ا ق جۇمىسپەن قامتۋ قىزمەتىن دامىتۋ دەپارتامەنتىنىڭ ديرەكتورى يرينا رۋباشينا.
ونىڭ ايتۋىنشا، ازاماتتاردى جۇمىسقا ورنالاستىرعانى ءۇشىن مەملەكەت اقى تولەۋگە كەپىلدىك بەرەدى. تاريف كولەمى 35000 تەڭگەدەن 52500 تەڭگە ارالىعىندا. قارجى كولەمى جۇمىسسىزدىڭ جۇمىسقا ورنالاسۋ قيىندىعىنا جانە ونىڭ قالا نەمەسە اۋىلدىق جۇمىسپەن قامتۋ ورتالىعىندا تىركەلگەن ورنىنا بايلانىستى بولادى.
«اۋتسورسينگتىك قىزمەت كورسەتەتىن كومپانيالار نە جەكە تۇلعالاردىڭ تىركەلۋ ورنىنا ەشقانداي تالاپتار قويىلمايدى. ياعني جەكە اگەنتتىكتەر بىرنەشە وڭىردە جانە اۋتسورسينگ تۋرالى بىرنەشە كەلىسىمشارت بويىنشا قىزمەت كورسەتە الادى»، - دەپ تولىقتىردى ي. رۋباشينا.
اۋتسورسينگ ماسەلەلەرى بويىنشا جاقىن جەردە ورنالاسقان حالىقتى جۇمىسپەن قامتۋ ورتالىعىنا نەمەسە «ەڭبەك رەسۋرستارىن دامىتۋ ورتالىعى» ا ق- عا حابارلاسۋعا بولادى.
ايتا كەتۋ كەرەك، «اۋتسورسينگ» ءسوزىن قاراپايىم تىلمەن تۇسىندىرەتىن بولساق، بۇل ءبىر فيرمانىڭ ءوز جۇمىسىن وزگە فيرمانى جالداپ، سولارعا تاپسىرۋى.