يتاليالىق 52 گرادۋس ايازدا 40 شاقىرىمدى جاياۋ جۇگىردى
بىلتىر يتالياندىق ۋلترامارافونشى اۋا تەمپەراتۋراسى پليۋس 67 گرادۋسقا دەيىن جەتكەن يران ءشولىن جۇگىرىپ ءوتىپ، ءوز اعزاسىنىڭ مۇمكىندىكتەرىن تەكسەرىپ شىقتى. ياكۋتيانىڭ تايگاسى ارقىلى جەر بەتىندەگى ەڭ سۋىق ەكى جەر - ويمياكون مەن تومتور اۋىلدارىنىڭ اراسىندا 40 شاقىرىمدى جۇگىرىپ ءوتۋ پاولو ۆەنتۋريني ءۇشىن تاعى ءبىر سىناق بولدى.
50 جاستاعى يتالياندىق ازامات ءوز مانسابىنىڭ كوپ بولىگىن پادۋي پوليتسياسىنىڭ ارنايى بولىمشەسىنە ارناعان. ول تاۋلى جەرلەر، تەڭىزدە، دۇلەي اپاتتار كەزىندە تالاي كۇردەلى قۇتقارۋ وپەراتسيالارىنا قاتىسقان.
«تەك ءوزىڭدى ەمەس، باسقا ادامداردى دا ويلاۋىڭ قاجەت. وسىنداي جۇگىرۋ ماعان جانە باسقالارعا ەكسترەمالدىق جاعدايدا ادامداردىڭ ءومىرىن قۇتقارىپ قالۋعا دايىندىق، داعدىلارىمدى سىناقتان وتكىزۋگە كومەكتەسەدى» ، - دەيدى پ. ۆەنتۋريني.
ماكسيمالدى تومەن تەمپەراتۋرا جاعدايىندا كلاسسيكالىق مارافون بويىنشا رەكوردقا جەتۋ ءۇشىن جاتتىعۋعا شامامەن ءبىر جىل ۋاقىت جۇمسالدى. ءتيىستى شىنىقتىرسا، ادام اعزاسىنىڭ مۇمكىندىكتەرىنە شەك جوق، دەپ سەنىمدى ۆەنتۋريني.
«وسىنداي جۇكتەمەگە ءبارى بىردەي شىداي الماس. ارينە، ول ءۇشىن اعزانى شىنىقتىرىپ، ەرىك- جىگەرىڭ بولۋى ءتيىس» ، - دەپ اتاپ ءوتتى سپورتشى.