كارانتين شارالارى كوروناۆيرۋستىڭ تارالۋىن 52 دەن 12 پايىزعا ازايتتى - ەلجان ءبىرتانوۆ

نۇر- سۇلتان. قازاقپارات – ق ر دەنساۋلىق ساقتاۋ ءمينيسترى ەلجان ءبىرتانوۆ توتەنشە جاعداي بويىنشا مەملەكەتتىك كوميسسيانىڭ سوڭعى شەشىمدەرىنە بايلانىستى اقپارات بەردى، دەپ حابارلايدى قازاقپارات ءتىلشىسى.

«ءبىزدىڭ ەلىمىزدە قابىلدانعان قاتاڭ كارانتيندىك شارالار 28 - ناۋرىز بەن كەشەگى تاۋلىكتى ەسەپتەگەندە كوروناۆيرۋس ينفەكسياسىنىڭ تارالۋ قارقىنىن 52-دەن 12 پايىزعا دەيىن تومەندەتۋگە مۇمكىندىك بەردى. بۇل وزگەرىس بىزگە سانيتارلىق جانە مەديتسينالىق قىزمەتتەردىڭ جۇمىس اۋىرتپالىعىن ازايتىپ، ناۋقاستار مەن بايلانىسقان ادامدارعا ءتيىمدى كومەك كورسەتۋگە مۇمكىندىك بەرەدى»، - دەپ جازدى ەلجان ءبىرتانوۆ Facebook پاراقشاسىندا.

ايتسە دە مينيستر اتاپ وتكەندەي قازاقستاندا كوروناۆيرۋس جۇقتىرعانداردىڭ سانى ارتىپ بارادى. باسقا ەلدەردىڭ تاجىريبەسى قازاقستاندا اۋرۋدىڭ نەگىزگى كەزەڭى ءساۋىر- مامىردا وتسە، ۆيرۋستىڭ شارىقتاۋ شىڭى - ءساۋىردىڭ ءبىرىنشى جارتىسىنا تۇسپا- تۇس كەلەتىنىن بولجاۋعا مۇمكىندىك بەرەدى.

«وسى كەزەڭدە ءبىز شامامەن 3500 جاعداي تىركەلەتىنىن (قازىر 551) بولجايمىز. ودان ارى، ياعني جاز ايلارىندا ەپيدەميولوگتار ەپيدەميا تولىعىمەن توقتاماسا دا باياۋلايتىنىن كۇتەدى. كەيبىر ساراپشى بيىلعى كۇزدە ىندەتتىڭ قايتالاناتىن جوققا شىعارمايدى»، - دەيدى ول.

مينيستر بەرگەن مالىمەتكە سايكەس، ەلىمىزگە بۇگىنگى تاڭدا كوروناۆيرۋس ينفەكسياسىنان ناۋقاستاردى ەمدەۋ ماقساتىندا 3920 ينفەكسيالىق، سونىمەن قاتار 7300 پروۆيزورلىق توسەك ورىن دايىندالعانىن ايتادى. بۇدان بولەك 180 اۋىر ناۋقاستى قابىلداۋعا قابىلەتتى جانساقتاۋ بولىمشەسى ءازىر ەكەنىن، وندا 170 جاساندى تىنىس الۋ اپپاراتى، قان وكسيگەناتسياسىنىڭ ەكستراكورپورالدى مەمبرانانالى 38 اپپاراتى بارىن جەتكىزدى.

«الايدا پاتسيەنتتەر جۇقپالى اۋرۋلار اۋرۋحاناسىندا ورتاشا ەسەپپەن 3-4 اپتا وتكىزەتىنىن، ەلدى مەكەندەردىڭ تىرشىلىگىن قامتاماسىز ەتۋمەن اينالىساتىن كاسىپورىندار مەن قىزمەتتەردىڭ كوماندالارىندا - مەديتسينا قىزمەتكەرلەرى، پوليتسيا، قارۋلى كۇشتەردە ينفەكسيانىڭ پايدا بولۋ قاۋپىن ەسكەرگەندە قازاقستاندا ازىرگە كوبىرەك توسەك ورىن مەن ارنايى اۋرۋحانا كەرەكتىگى بايقالادى. سونىمەن قاتار ول اۋرۋحانالار ينفەكتسيالىق قاۋىپسىزدىكتىڭ بارلىق تالابىنا ساي بولۋى كەرەك. وندا بوكستالعان پالاتالار، ۆەنتيلياتسيانىڭ ەرەكشە جۇيەسى، جانساقتاۋ بولىمىندەگى ورىندار بولۋى ءتيىس. مۇنداي تەز تۇرعىزىلاتىن ەمحانالاردىڭ قىتايدا قالاي پايداعا جاراعانىن كوردىك. اقش پەن يتاليا، وزگە دە ەۋروپالىق ەلدەردەگى قاراپايىم ەمحانالارعا قانداي جۇكتەمە ءتۇسىپ وتىرعانىنان دا حاباردارمىز. كوپتەگەن ەل ناۋقاستار مەن مەديتسينالىق پەرسونالدار ءۇشىن ينفەكسيالىق قاۋىپسىزدىك تەحنولوگيالارى ساقتالماعان نىساندار مەن سپورتتىق قۇرىلىمداردى پايدالانۋعا ءماجبۇر»، - دەيدى مينيستر.

اۆتور: ايان بەكەن ۇلى