الەمدىك قارجى ورتالىقتارىنىڭ يندەكسى: نۇر- سۇلتان قالاسى 51-ورىندا

نۇر- سۇلتان. قازاقپارات - بريتاندىق Z / Yen Group عىلىمي- زەرتتەۋ ۇيىمى الەمدىك قارجى ورتالىقتارى يندەكسىنىڭ (GFCI 26) ناتيجەسىن جاريالادى. بۇل تۋرالى قازاقپارات ورتالىققا سىلتەمە جاساپ حابارلايدى.

يندەكس بيزنەس، ادامي رەسۋرستار، ينفراقۇرىلىم، دامۋ دەڭگەيى، بيزنەس بەدەلى جانە ينتەگراتسيا بويىنشا الەمدەگى باستى قارجى ورتالىقتارىنا باعالاۋ جۇرگىزدى.

بيىلعى رەيتينگتەگى العاشقى ۇزدىك 10 قارجى ورتالىعى بولىپ نيۋ- يورك، لوندون، گونكونگ، سينگاپۋر، شاڭحاي، توكيو، بەيجىڭ، دۋباي، شىنجىن، سيدنەي قالالارى تانىلدى.

اتالعان زەرتتەۋدىڭ TOP-100 قازاقستاننىڭ نۇر- سۇلتان قالاسى (استانا حالىقارالىق قارجى ورتالىعى) مەن الماتى كىردى. رەيتينگتە نۇر- سۇلتان 51-ورىنعا، ال الماتى 98-ورىنعا جايعاسقان.

يندەكس قورىتىندىسىمەن ەلوردا شىعىس ەۋروپا مەن ورتالىق ازياداعى قارجى ورتالىقتارى اراسىندا ۇزدىك ناتيجە كورسەتكەن.

«قارجى ورتالىعىنىڭ جاقىندا قۇرىلعانىنا قاراماستان، نۇر- سۇلتان قالاسى ءوز پوزيتسياسىن نىعايتتى»، - دەپ جازدى بريتاندىق Z /Yen Group زەرتتەۋ ورتالىعى.

اۆتور: مۇحتار مۇرات