+7 (701) 759 90 19 Лента
26 °С : استانا
20 °С : الماتى
USD 328.31 EUR 386.62
RUB 5.27 CNY 51.49
جاڭالىقتار

باس پروكۋراتۋرا مەملەكەت جەرىن ءوز بەتىمەن باسىپ الۋدىڭ 514 فاكتىسىن انىقتاعان

18 مامىر 11:59 277
:ءبولىسۋ
باس پروكۋراتۋرا مەملەكەت جەرىن ءوز بەتىمەن باسىپ الۋدىڭ 514 فاكتىسىن انىقتاعان

استانا. قازاقپارات - باس پروكۋراتۋرادا يگەرىلمەگەن جەرلەردى قايتارۋ، ولاردى اينالىمعا تارتۋ، جەردى ءوز بەتىمەن باسىپ الۋ جانە كەڭ تارالعان پايدالى قازبالاردى زاڭسىز تابۋعا جول بەرمەۋ ماسەلەلەرى بويىنشا جينالىس ءوتتى، دەپ حابارلايدى قازاقپارات باس پروكۋراتۋرانىڭ باسپا ءسوز قىزمەتىنە سىلتەمە جاساپ.

شارا ەلوردانىڭ ودان ءارى دامۋى بويىنشا 2018-جىلدىڭ 5- ءساۋىرى كۇنگى جينالىستا مەملەكەت باسشىسى الدىعا قويعان تاپسىرمالاردى ورىندالۋىن تالقىعا سالۋ.

جينالىسقا استانا قالاسىنىڭ پروكۋرورى، استانا قالاسى اكىمىنىڭ ورىنباسارلارى، سونداي-اق قالالىق ورتا ساپاسىن باقىلاۋ باسقارماسىنىڭ جانە ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىلارى قاتىستى.

ايتا كەتەتىن جايت، 2012-جىلدان 2017-جىلعا دەيىن اكىمشىلىكپەن، قالالىق پروكۋراتۋرامەن بىرلەسىپ 16 مىڭ گەكتار كولەمدە 1084 يگەرىلمەگەن جەرلەر انىقتالدى.

بىرلەسكەن جۇمىستاردىڭ ناتيجەسىندە ونداي جەرلەردىڭ مولشەرى 202 تەلىمگە دەيىن تومەندەتىلدى.

سونداي-اق يگەرىلمەگەن جەرلەردى تارتىپ الۋ تۋرالى 12 ارىز سوتقا ەنگىزىلدى.

بۇگىندە تالاپ-ارىزداردى قاناعاتتىرۋ تۋرالى 2 شەشىم شىقتى.

بۇدان بولەك، 514 مەملەكەتتىك جەردى ءوز بەتىمەن باسىپ الۋ فاكتىلەرى انىقتالىپ، 201 تۇلعاعا قاتىستى زاڭسىز قۇرىلىستاردى بۇزۋ تۋرالى سوتتاردىڭ شەشىمدەرى شىعارىلدى.

سونىمەن قاتار استانادا كەڭ تارالعان پايدالى قازبالاردى زاڭسىز تابۋدى جۇزەگە اسىرعان جالپى كولەمى 216 گەكتار قۇرايتىن 54 كارەر بار.

قالالىق پروكۋراتۋرا مەن اكىمشىلىكتىڭ بىرلەسكەن جۇمىسىنىڭ ناتيجەسىندە 183 بىرلىك تەحنيكا ۇستالىپ، سوتقا دەيىنگى تەرگەۋدىڭ ءبىرىڭعاي تىزىلىمىنە 85 كەڭ تارالعان پايدالى قازبالاردى زاڭسىز تابۋ فاكتىلەرى تىركەلدى.

اكىمشىلىك جاۋاپكەرشىلىككە 13 تۇلعا تارتىلدى. ولاردان سوت تارتىبىندە 4 ميلليون تەڭگەدەن استام ەكولوگيالىق زارداپ ءوندىرىلدى.

بۇگىنگى تاڭدا يگەرىلمەي قالعان جەرلەر سانىن قايتارۋ، ولاردى اينالىمعا تارتۋ، جەردى ءوز بەتىمەن باسىپ الۋ جانە كەڭ تارالعان پايدالى قازبالاردى زاڭسىز تابۋعا جول بەرمەۋ سۇراقتارى كۇردەلى ماسەلە بولىپ قالادى.

جينالىستىڭ قورىتىندىسى بويىنشا كۇردەلى ماسەلەلەردى شەشۋگە باعىتتالعان ءبىرقاتار ناقتى ۇسىنىستار مەن تاپسىرمالار بەرىلدى.

وسى باعىتتاعى جۇمىس باس پروكۋراتۋرانىڭ باقىلاۋىندا.


:ءبولىسۋ
ونلاين قىزمەتكەرلەر
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049
مۇراعات