ا ق ش پەن كانادادا وسى دەمالىستا 50 گرادۋسقا دەيىن اياز بولادى
سولتۇستىك امەريكا كونتينەنتىنىڭ كەي اۋداندارىنا اركتيكادان سۋىق جەل كەلەدى، كەي جەردە اۋا تەمپەراتۋراسى -50°C سياقتى سەزىلەدى، دەپ ەسكەرتەدى مەتەورولوگتار، دەپ حابارلايدى قازاقپارات BBC گە سىلتەمە جاساپ.
ولار مۇنداي اۋا رايىندا 10 مينۋتقا جەتەر- جەتپەس ۋاقىتتا ءۇسىپ قالۋ مۇمكىن ەكەنىن ەسكەرتىپ، ورتالىق كانادا مەن امەريكانىڭ سولتۇستىك- شىعىسىنداعى كوپتەگەن شتاتتاردىڭ تۇرعىندارىنا ۇيدە وتىرۋعا كەڭەس بەردى.
دۇيسەنبىدەن بەرى ا ق ش- تا قولايسىز اۋا رايىنان كەم دەگەندە 11 ادام قايتىس بولدى.
اتاپ ايتقاندا، اپتا باسىندا مۇزدى داۋىل سالدارىنان تەحاستا سەگىز ادام، وكلاحومادا ەكەۋى جانە اركانزاستا بىرەۋى قازا تاپتى.
وسى اپتانىڭ كۇرت سالقىنداۋى كانادانىڭ شىعىسىنداعى تەڭىز پروۆينتسيالارىنان ا ق ش- تىڭ ورتالىعىنا دەيىن سوزىلعان قۋاتتى اركتيكالىق فرونتتارعا بايلانىستى.
جالپى سانى 82 ميلليون ادام تۇراتىن بىرنەشە شتاتتا تەمپەراتۋرا -17°C گرادۋستان تومەن تۇسەدى.
اتاپ ايتقاندا، نيۋ- گەمپشير شتاتىنداعى ۆاشينگتون تاۋىنىڭ باسىندا اۋا تەمپەراتۋراسى -79°C گرادۋس سەكىلدى سەزىلىپ، جەلدىڭ جىلدامدىعى 160 ك م/س ا ع جەتۋى ىقتيمال.
«بۇل جولى شىنىمەن دە قاتتى سۋىق بولادى دەپ تولىق سەنىممەن ايتىپ وتىرمىز. بۇگىن مۇندا تەمپەراتۋرا -15°C، ءبىراق اياز تەز كۇشەيەدى»، - دەدى جەرگىلىكتى مەتەورولوگ فرانسيس تاراسيەۆيچ Reuters اگەنتتىگىنە.
مەين شتاتىنىڭ كەي اۋداندارىنا 1971 -جىلدان بەرگى ەڭ سۋىق اۋا رايى كەلۋى كەرەك. مىسالى، پورتلەند قالاسىندا جەلدىڭ اسەرىنەن تەمپەراتۋرا -40°C گرادۋس سياقتى سەزىلەدى.
كورشىلەس ۆەرمونت شتاتىنىڭ بەرلينگتون قالاسىندا تەرمومەتر باعاناسى -20°دەيىن تومەندەيدى.
بوستوندا دا ايازدى جەل، قازىرگى ۋاقىتتا قالا قىزمەتتەرى توتەنشە جاعداي رەجيمىندە جۇمىس ىستەپ تۇر. اتاپ ايتقاندا، قالادا مەملەكەتتىك مەكتەپتەر جابىلىپ، جەرگىلىكتى بيلىك ادامدار جىلىنۋعا كەلەتىن ارنايى ورتالىقتار اشتى.
نيۋ- يوركتە تەمپەراتۋرا سەنبىگە قاراي -17°C دەيىن تومەندەۋى مۇمكىن، دەگەنمەن مەتەورولوگتار تەرمومەتر باعاناسى دەمالىس كۇندەرىنىڭ سوڭىنا قاراي قايتادان كوتەرىلەتىنىنە سەندىرەدى.
كانادانىڭ بىرنەشە ايماعىندا تەمپەراتۋرا -38 گرادۋس ايازدان -50 گرادۋسقا دەيىن تومەندەۋى مۇمكىن.
ەلدىڭ ۇلتتىق اۋا رايى قىزمەتى جۇما كۇنى تاڭەرتەڭ تەڭىز شتاتتارىنا، كۆەبەكتىڭ كوپ بولىگىنە، بۇكىل ونتاريوعا جانە ءىشىنارا مانيتوبا شتاتىنا قاتتى سۋىق كەلەتىنىن ەسكەرتتى.
كانادا استاناسى وتتاۆادا ايازدىڭ سالدارىنان شاڭعى مەن كونكي تەبۋ جولدارى جابىلدى. تورونتودا جۇما كۇنى تەمپەراتۋرا -29°دەيىن تومەندەدى.
اپتانىڭ باسىندا مۇزدى داۋىل سوعىپ، جولدار مۇز ايدىنىنا اينالعان تەحاستا جۇما كۇنى اۋا رايى جىلىنىپ، مۇز ەرۋى كەرەك.
بۇعان دەيىن شتاتتىڭ قۇتقارۋ قىزمەتى دۇيسەنبىدەن بەرى تىركەلگەن جۇزدەگەن اپات جايىندا حابارلادى، بىرنەشە كىسى كوز جۇمعان.
جۇما كۇنى تەحاس، اركانزاس جانە ءميسسيسيپيدىڭ 309 مىڭنان استام تۇرعىنى ەلەكتر قۋاتىنسىز قالدى.