جاسوسپىرىمدەر جولاقىنىڭ 50 پايىزىن عانا تولەيدى - زاڭ جوباسى

نۇر- سۇلتان. قازاقپارات – ق ر زاڭدارى مەن كودەكستەرىنە حالىقتىڭ الەۋمەتتىك وسال توپتارىنا قوعامدىق كولىكتە جۇرۋگە جەڭىلدىك بەرەتىن نورمالار ەنگىزىلەدى.

بۇل تۋرالى ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ماجىلىستە ايتتى، دەپ حابارلايدى قازاقپارات ءتىلشىسى.

ايتا كەتەيىك، ماجىلىستە «ق ر كەيبىر زاڭنامالىق اكتىلەرىنە كولىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمعا شىعارىلدى. زاڭ جوباسى قازاقستان رەسپۋبليكاسىنىڭ 4 كودەكسى جانە 16 زاڭىنا وزگەرتۋلەر مەن تولىقتىرۋلار ەنگىزۋدى كوزدەيدى.

«اتاپ ايتقاندا زاڭ جوباسى الەۋمەتتىك ماڭىزى بار، سونداي- اق قالالىق (اۋىلدىق)، قالا ماڭىنداعى قاتىناستا اۆتوموبيلمەن تۇراقتى تاسىمالداۋدا «التىن القا»، «كۇمىس القا» مەن ناگرادتالعان نەمەسە بۇرىن «باتىر انا» اتاعىن العان، 1 جانە Ⅱ دارەجەلى «انا داڭقى» وردەنىمەن ناگرادتالعان كوپبالالى انالاردىڭ، ءبىرىنشى توپتاعى مۇگەدەكتەردىڭ تەگىن جول ءجۇرۋ قۇقىعىن كوزدەيدى. 15 جاستان 18 جاسقا دەيىنگى جاستار بيلەت قۇنىنىڭ 50 پايىزىن تولەي الادى»، - دەدى قايىربەك وسكەنبايەۆ.

مينيسترلىك كەلتىرگەن دەرەكتەرگە سايكەس، قازاقستاندا 65 مىڭنان استام «التىن القا»، 137 مىڭنان استام «كۇمىس القا»، 15 مىڭنان استام «باتىر انا» يەگەرلەرى بار. 1 توپتا - 69444، Ⅱ توپتا - 280965 جانە Ⅲ توپتا - 264934 مۇگەدەكتىگى بار ادام تىركەلگەن.

7 جاسقا دەيىنگى بالالار سانى 2 ميلليوننان اسسا، 7-15 جاس ارالىعىنداعى 2,7 ميلليون بالا جانە 16-18 جاستاعى 724 مىڭ جاس بار.

ايتا كەتەيىك، ەلىمىزدە 14 جاسقا دەيىن بالالار جولاقىنىڭ 50 پايىزىن تولەيتىن، ال نۇر- سۇلتاندا 18 جاسقا دەيىنگى بۇكىل جەتكىنشەككە جولاقى تەگىن. دەپۋتاتتار اتالعان زاڭ جوباسىن ءبىرىنشى وقىلىمدا تەگىس ماقۇلدادى.

اۆتور: ايجان سەرىكجان قىزى