الماتى ماڭىندا بەلگىسىز بىرەۋلەر 50 گە جۋىق مىسىقتى تاستاپ كەتكەن - ۆيدەو
مارعاۋلار «التىن وردا» بازارى ماڭىنداعى ءشول دالادا تابىلعان. 26-شىلدەگە قاراعان ءتۇنى ولاردى جەرگىلىكتى تۇرعىنداردىڭ ءبىرى تاۋىپ العان. ەر ادام تاڭعالعانىن جاسىرماي، وقيعا ورنىنان ۆيدەو ءتۇسىرىپ، الەۋمەتتىك جەلىلەرگە تاراتقان ، - دەپ حابارلايدى Tengrinews.kz ءتىلشىسى.
كەيىن ول جەرگە ەرىكتىلەر مەن زووتەحنيكتەر كەلە باستاعان. ولار مىسىقتاردى تەكسەرىپ، الىپ كەتكەن. ولاردىڭ ايتۋىنشا، مىسىقتاردىڭ كوبى ينفەكتسياعا شالدىققان بولۋى مۇمكىن، ولاردىڭ جاعدايى ناشار.
«ادامنىڭ داۋىسىنا جۇگىرگەن مىسىقتار ەشكىمدى بەي-جاي قالدىرمادى. قالانىڭ ءار تۇكپىرىنەن ءارتۇرلى توپ وكىلدەرى تاڭەرتەڭگى ساعات ەكىدە بىرنەشە كولىكپەن كەلىپ، مىسقاتردى الۋعا اسىقتى. وقيعا ورنىنا كەلگەندەر تاڭعالعاندارىن جاسىرا المادى. ءارتۇرلى جاستاعى 40 مىسىق تابىلدى. ولاردان ءارتۇرلى ينفەكسيا تابىلدى. التى مىسىقتا پانليۋكوپەنيا، ال باسقالارىندا رينوتراحەيت راستالدى. ءۇش اۋىر جاعدايداعى مىسىق كلينيكاعا جەتكىزىلدى. قالعاندارىن تاڭەرتەڭگە دەيىن ەلميرا مۋللاحودجايەۆا پانالاتتى. باسقا باسپانالار دا كومەك كورسەتتى. مۇنشا كوپ مىسىقتى ەمدەۋ، ورنالاستىرۋ جانە ءتىپتى تاماقتاندىرۋ ءۇشىن كوپ اقشا قاجەت. دوستار، مىسىقتاردى قۇتقارايىق»، - دەدى ەرىكتىلەر.
كەيىن بۇل جاعدايعا بەلسەندى ءارى زووتەحنيك ەلميرا مۋللاحودجايەۆا پىكىر ءبىلدىردى. ونىڭ ايتۋىنشا، بارلىق مىسىقتىڭ جاعايى وتە اۋىر. سونداي-اق، ءۇي جانۋارلارىنىڭ اراسىندا جاڭا تۋعاندارى دا بار.
«وندا تاعى ادامدار جىبەرەمىز، ويتكەنى تۇندە بارلىق مىسىقتى تابۋ مۇمكىن بولمادى. كەيبىرى قاشىپ كەتكەن بولار. قازىر ءۇش مىسىقتى ەرىكتىلەر الدى. تورتەۋىن ەمحاناعا جىبەردىك، قالعاندارى مەنىڭ باقىلاۋىمدا، ولارعا پاتەر جالدادىق، نە بولارىن كورەمىز. مىسىقتار ءبىر اي كارانتيندە بولادى»، - دەدى ول.
ونىڭ ايتۋىنشا، بازار ساۋداگەرلەرى مىسىقتاردى لاقتىرىپ جىبەرگەن. مۇنىڭ سەبەبى - مىسىقتارعا كۇتىم جاساۋدىڭ قىمبات بولۋىنا بايلانىستى.