نۇر-سۇلتاندا الداعى بەس جىلدا 50 مەكتەپ سالىنادى

نۇر-سۇلتان. قازاقپارات - نۇر-سۇلتاننىڭ اكىمى التاي كولگىنوۆ مەكتەپ ديرەكتورلارىمەن كەزدەستى، دەپ حابارلايدى قازاقپارات.

«ۇستازداردىڭ ەڭبەگى زور! ولار ءبىر ەمەس بىرنەشە بۋىنعا ءبىلىم بەردى. ءبىز ءوز تاراپىمىزدان ودان ءارى قولداۋ كورسەتىپ، قولايلى جاعداي جاسايمىز. بۇگىن وقۋ ورىندارى ديرەكتورلارىمەن ءبىلىم سالاسىنداعى وزەكتى ماسەلەلەردى تالقىلاپ، كەلەسى جىلعا جۇمىس جوسپارىن بەكىتتىك» دەپ جازدى التاي كولگىنوۆ ءوزىنىڭ Instagram پاراقشاسىندا.

قالا اكىمى وسى سالادا اتقارىلىپ جاتقان شارالارعا جان-جاقتى توقتالدى.

ءبىرىنشى. وقۋ ورىندارى قۇرىلىسى. مۇعالىمدەر ءبىلىم ساپاسىن عانا ويلاۋى ءۇشىن وقۋ ورىندارىن جۇيەلى تۇردە سالۋ كەرەك. بيىل مەكتەپ قۇرىلىسى قارقىنىنىڭ ارتۋىنا بايلانىستى ءۇش اۋىسىمدى مەكتەپتەر سانىن 8 دەن 4 كە دەيىن، تولى رەجيمدەگى مەكتەپتەردى 22 دەن 14 كە دەيىن ازايتا الدىق.

5 جىلعا ارنالعان كەشەندى جوسپار اياسىندا 50 مەملەكەتتىك مەكتەپ قۇرىلىسىن جوسپارلاپ قويدىق. بۇعان قوسا قوسىمشا وقۋ ورىندارى جەكەمەنشىك ينۆەستيتسيالار ەسەبىنەن سالىنىپ جاتىر. شاعىن مەكتەپتەر سالۋدان باس تارتىپ، ءىرى مەكتەپتەر سالۋعا كوشتىك.

ەكىنشى. باسپانا جاعدايى. سىياقى. مەملەكەت باسشىسى «پەداگوگ مارتەبەسى تۋرالى» زاڭ قابىلدادى. بيىلعى 1- قاڭتاردان باستاپ مۇعالىمدەردىڭ جالاقىسى %25 ءوستى، الداعى جىلدارى دا ەڭبەكاقى ارتادى. تۇرعىن ءۇي سەرتيفيكاتتارى تەگىن بەرىلەدى. قازاقستان يپوتەكا كومپانياسىمەن بىرلەسىپ، ءبىر مىڭ الەۋمەتتىك پاتەر تاپسىرامىز. ونى الۋشىلار قاتارىندا ءبىلىم سالاسىنىڭ ماماندارى دا بار.

2019 -جىلى مۇعالىمدەرگە جاتاقحانا سالىپ بەردىك. بيىلعى كۇزدە «نۇر-سۇلتان قالاسىنىڭ قۇرمەتتى پەداگوگى» مەدالى يەگەرلەرىنە دە العاش رەت اقشالاي تولەم ەنگىزدىك. ءار يەگەرگە 830 مىڭ تەڭگەدەن استام قارجى بەرىلەدى.

ءۇشىنشى. گرانتتار. بىلىكتىلىكتى ارتتىرۋ. تۇلەكتەرىمىزدى قولدايمىز. «مۇعالىم» ماماندىعى بويىنشا گرانتتار سانىن كوبەيتتىك. تەگىن بىلىمگە شامامەن 900 گرانت ءبولىندى. «سونىمەن قاتار مۇعالىمدەردىڭ بىلىكتىلىگىن ارتتىرۋمەن اينالىسۋ قاجەت. ونداعان مەكتەپ سالۋعا بولادى، ءبىراق بالالاردى قابىرعا ەمەس، ءوزىمىزدىڭ پەداگوگتەر وقىتادى. بىلىكتىلىكتى ارتتىرىپ، تاجىريبە الماسۋ ءۇشىن سەمينارلار، شەبەرلىك ساباقتارىن وتكىزەمىز.

كەمبريدج ۋنيۆەرسيتەتىمەن بىرلەسىپ، بەس مەكتەپتە «Share « باعدارلاماسىن ىسكە قوستىق. مۇعالىمدەر بۇل باعدارلاما بويىنشا شەتەلدە دە جاڭا قاجەتتى بىلىممەن سۋسىنداۋعا مۇمكىندىك الدى. باعدارلامانى كەلەسى جىلى دا جالعاستىرامىز» دەپ اتاپ ءوتتى شاھار باسشىسى.

بيىلعى جىل پەداگوگتەر ءۇشىن وڭاي بولمادى. مۇعالىمدەر قىسقا مەرزىمدە وقىتۋ فورماتىن وزگەرتىپ، وقۋشىلارعا ونلاين رەجيمدە ءبىلىم بەرىپ جاتىر. 9 - جانە 11 - سىنىپ وقۋشىلارى ءۇشىن بيىلعى وقۋ جىلى بىتىرەتىن جىل ەكەنىن ەسكەرىپ، ولار 3 - توقساننان باستاپ ارالاس وقىتۋ فورماتىنا كوشەتىن بولدى.