قۇقىق بۇزعان 50 شەتەلدىك ەلدەن شىعارىلدى
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جىل باسىنان بەرى اكىمشىلىك جاۋاپكەرشىلىككە تارتىلعان شەتەلدىكتەرگە ودان ءارى شارالار قابىلداۋ ءۇشىن كوشى-قون قىزمەتى بولىمدەرىنە 70 تەن استام قۇجات تۇسكەن.
«قىلمىستىق، اكىمشىلىك قۇقىق بۇزۋشىلىقتاردىڭ الدىن الۋ ءۇشىن جۇرگىزىلگەن شارالار كەزىندە انىقتالعان شەتەلدىكتەردىڭ اراسىندا وزبەكستان ازاماتتارى دا بار. شەتەل ازاماتتارى تاراپىنان ىشىمدىك ءىشۋ، قوعامدىق ورىنداردا ماس ءجۇرۋ، اۆتوكولىكتى ماس كۇيدە جۇرگىزۋ، قوعامعا قاۋىپ توندىرەتىن باسقا دا قۇقىق بۇزۋشىلىقتار جاسالعان. ازاماتتىق تارتىپتە قاراۋ ءۇشىن جيناقتالعان قۇجاتتار اتىراۋ قالالىق سوتىنا جولداندى»، - دەپ حابارلادى دەپارتامەنتتىڭ باسپا ءسوز قىزمەتى.
سوت شەشىمىمەن 50 شەتەلدىك ازامات قازاقستان اۋماعىنان شىعارىلدى.
«قۇقىق بۇزعان شەتەلدىكتىڭ ءبىرى - 29 جاستاعى ازامات جۇرگىزۋشى كۋالىگىنسىز، ماس كۇيىندە كولىك جۇرگىزگەن. وزبەكستان ەلىنىڭ بۇل ازاماتى ق ر اكىمشىلىك قۇقىق بۇزۋشىلىق تۋرالى كودەكسىنىڭ 608-بابىنىڭ 6-بولىگىنە سايكەس 20 تاۋلىككە قاماۋعا الىندى. وسى ازاماتقا قاتىستى جيناقتالعان قۇجاتتارمەن تانىسقان اتىراۋ قالالىق سوتى 13- قازاندا دەپورتاتسيالاۋ تۋرالى شەشىم قابىلدادى. وزبەكستان ەلىنىڭ تاعى ءبىر ازاماتى جاقىندا قوعامدىق جەردە ماس كۇيىندە جۇرگەنى ءۇشىن ۇستالدى. 1986-جىلى تۋعان ازاماتقا ق ر اكىمشىلىك قۇقىق بۇزۋشىلىق تۋرالى كودەكسىنىڭ 440-بابىنىڭ 1-بولىگىنە ساي، اكىمشىلىك ايىپپۇل سالىنىپ، ەلدەن شىعارۋ تۋرالى شەشىم شىعارىلدى»، دەلىنگەن حابارلامادا.
اتىراۋ قالالىق پوليتسيا باسقارماسىنىڭ قىزمەتكەرلەرى شەتەلدىكتەردى تۇركىستان وبلىسىنىڭ سارىاعاش اۋدانىندا ورنالاسقان «جىبەك جولى» باقىلاۋ-وتكىزۋ پۋنكتىنە دەيىن جەتكىزىپ، قازاقستان تەرريتورياسىنان شىعارۋ ءۇشىن شەكارا قىزمەتىنىڭ قىزمەتكەرلەرىنە تاپسىرعان.