ەلوردادا 50 جىلدىق مەرەيتويعا جينالعاندار مەيرامحانادان قايتارىلدى

نۇر-سۇلتان. قازاقپارات - ەلوردا تۇرعىندارى كارانتين رەجيمىنىڭ شەكتەۋ شارالارىنا قاراماستان وتباسىلىق وتىرىستاردى وتكىزىپ جاتىر، دەپ حابارلايدى قازاقپارات ءتىلشىسى.

ماسەلەن، نۇر-سۇلتان قالالىق پوليتسيا دەپارتامەنتىنىڭ مالىمەتىنشە، كەشە، 18- قازان كۇنى ساعات 17:10 دا پوليتسيا قىزمەتكەرلەرى «QUMAN» مەيرامحاناسىندا باستالعان 50 جىلدىق مەرەيتويدى توقتاتقان.

وتىرىس ەندى قىزعان ساتتە مەيرامحاناعا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسى، اكىمدىك پەن نۇر-سۇلتان پوليتسياسى وكىلدەرىنەن تۇراتىن موبيلدى توپ كىرىپ كەلىپ، كوڭىلدى كەشتىڭ ودان ارى جالعاسۋىنا مۇمكىندىك بەرمەدى.

«مەيرامحانا يەسى مەن شارانى ۇيىمداستىرۋشى شەكتەۋلەردى ەلەمەي، ادامداردىڭ دەنساۋلىعىنا قاۋىپ ءتوندىردى. مەيرامحانا يەسى مەن مەرەكەلىك وتىرىستى ۇيمداستىرۋشىعا قاتىستى جينالعان ماتەريال ق ر اكىمشىلىك قۇقىق بۇزۋشىلىق تۋرالى كودەكستىڭ 424-بابىمەن اكىمشىلىك جاۋاپكەرشىلىككە تارتۋ ءۇشىن تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا جىبەرىلدى»، - دەپ اتاپ وتەدى ۆەدومستۆودان.

دەپارتامەنت اقپاراتىنا قاراعاندا، ءبىر تاۋلىكتىڭ ىشىندە موبيلدى توپ 132 كاسىپكەرلىك سۋبەكتىسىن تەكسەرىپ، كارانتين رەجيمىن بۇزۋدىڭ 36 فاكتىسىن انىقتاعان.