اپتا سايىن اقتوبەلىك «جەدەل جاردەمنىڭ» 50 قىزمەتكەرى دەمالىس ورتالىعىندا تىنىعىپ قايتادى

اقتوبە. قازاقپارات - اقتوبە قالاسى الماتى اۋدانى اكىمدىگىنىڭ باستاماسىمەن «جەدەل جاردەم» قىزمەتكەرلەرىنە اپتا سايىن قاۋىپتى دە ادال ەڭبەگىنە وراي قۇرمەت كورسەتىلىپ كەلەدى، دەپ حابارلايدى قازاقپارات.

اۋدان اۋماعىندا ورنالاسقان دەمالىس ورتالىقتارى بارلىق كارانتين ەرەجەلەرىنە ساي سانيتارلىق نورمالاردىڭ تالاپتارىن ساقتاي وتىرىپ، كۇندىز- ءتۇنى ءۇي كورمەي، ناۋقاستارعا قىزمەت ەتەتىن دارىگەرلەرگە ەسىكتەرىن اشتى.

«جەدەل جاردەمنىڭ» قىزمەتكەرلەرى كەزەكشىلىكتەن بوساعان كۇندەرى 50 ادامنان 6 ساعاتقا دەمالىپ قايتادى. وتكەن اپتادا «كوك جايلاۋ» ساۋىقتىرۋ- دەمالىس ورتالىعى 50 ادامدى قابىلداسا، بۇل جولى «Green Land» دەمالىس بازاسى 50 قىزمەتكەردى قارسى الدى. وسىلايشا، ەكى ايدىڭ ىشىندە 500 مەديتسينا مامانى قامتىلماق. دارىگەرلەردى دەمالىس ورنىنا جەتكىزۋ ءۇشىن «اۆتوپارك» مەكەمەسى ەكى اۆتوبۋسپەن بولگەن.

«ءبىر تاۋلىككە دەيىن كەزەكشىلىككە شىعاتىن دارىگەرلەردىڭ ەڭبەگىن باعالاۋ كەرەك. بۇگىنگى كۇننىڭ قاھارماندارى مەديتسينا قىزمەتكەرلەرى ەكەنى ءسوزسىز. ونىڭ ىشىنە دارىگەرلەردەن بولەك، فەلدشەرلەر دە، جەدەل جاردەم جۇرگىزۋشىلەرى دە، ديسپەتچەرلەر دە كىرەدى. كۇنى- ءتۇنى ولار ءوز جاندارىن اياماي، وزگەلەردىڭ ءومىرىن ساقتاپ قالۋعا ەڭبەك ەتىپ كەلەدى. وسىنداي قۇرمەتكە بۇل توپ وكىلدەرى ابدەن لايىق»، - دەدى الماتى اۋدانىنىڭ اكىمى ادىلكەرەي اۋەلبايەۆ.

ايتا كەتەلىك، دەمالىس بازاسىندا دارىگەرلەرگە تازا اۋادا شيپالى سۋسىن - ساۋمال مەن قىمىز ۇسىنىلدى. كارانتين رەجيمىنە بايلانىستى سانيتارلىق تالاپتار قاتاڭ ساقتالدى. سونداي- اق، توتەنشە جاعداي ۋاقىتىندا ەرەن ەڭبەگىمەن كوزگە تۇسكەن اق حالاتتى ابزال جاندارعا اۋدان اكىمى وبلىس جانە قالا باسشىلىعىنىڭ اتىنان العىس حاتتار تابىستادى.