قاراعاندى وبلىسىندا كۇن سايىن كوروناۆيرۋس بەلگىسى بار 50 ادام اۋرۋحاناعا جاتقىزىلادى

قاراعاندى. قازاقپارات - قاراعاندى وبلىسى دەنساۋلىق ساقتاۋ باسقارماسىنىڭ باسشىسى ەرجان نۇرلىبايەۆ كوروناۆيرۋس ينفەكتسياسىنىڭ العاشقى بەلگىلەرى كەزىندە دەرەۋ كومەككە جۇگىنۋگە شاقىردى.

ول ءوز بەتىنشە ەمدەلۋ اۋىر اسقىنۋعا اكەلۋى مۇمكىن ەكەنىن اتاپ ءوتتى، دەپ حابارلايدى قازاقپارات ءتىلشىسى.

ەرجان نۇرلىبايەۆ ەپيدەميولوگيالىق جاعداي جانە مەديتسينالىق مەكەمەلەردىڭ جۇمىسى تۋرالى Zoom پلاتفورماسىنداعى ونلاين-بريفينگتە اڭگىمەلەپ بەردى.

بۇگىنگى كۇنى قاراعاندى وبلىسىندا COVID-19 جۇقتىرعان بەس ادام ءوز بەتىنشە دەم الا المايدى جانە وكپەنى جاساندى جەلدەتۋ اپپاراتىنا قوسىلعان. ونىڭ ۇشەۋى مەديتسينالىق كومەككە تىم كەش جۇگىنگەن.

«ادامدار ۇيدە ەمدەلۋگە تىرىسقان. قازىر بۇل پاتسيەنتتەر دارىگەرلەردىڭ تاۋلىك بويى قاداعالاۋىندا جانساقتاۋ بولىمىندە اۋىر كۇيدە جاتىر. بارلىق تۇرعىنداردى مەديكتەردىڭ ۇندەۋىنە قۇلاق اسۋعا شاقىرامىن. بۇل - وتە ماڭىزدى. جەدەل جاردەم شاقىرۋدان قورىقپاۋ كەرەك، كەرىسىنشە دەرت سالدارىنان قورقۋ كەرەك»، - دەدى ول.

باسقارما باسشىسى وبلىستا كۆي جۇقتىرعان ناۋقاستارعا كومەك كورسەتۋ ءۇشىن رەسۋرستار مەن جابدىقتار جەتكىلىكتى ەكەنىن اتاپ ءوتتى.

كارانتين باستالعانعا دەيىن وڭىردە 28 ءو ج ج اپپاراتى بولعان. قوسىمشا 44 ساتىپ الىندى، ونىڭ 22 ءى جەتكىزىلدى.

«ءبىز كۆيمەن اۋىراتىن ناۋقاستاردى ەمدەۋ ءۇشىن توسەك قورىن كوبەيتەمىز. بۇگىن اۋرۋحانالاردىڭ ءبىرىنىڭ بازاسىندا قوسىمشا 100 ينفەكتسيالىق باعىتتاعى توسەك اشىلدى. كەلەسى اپتانىڭ باسىندا تاعى كەرەۋەتتەر ورناتىلادى»، - دەدى ەرجان نۇرلىبايەۆ.

- قاراعاندىدا ءقازىر 647 توسەكتىڭ 66-سى بوس. كۇنىنە ءبىز شامامەن كۆي بەلگىلەرى بار 50 ادامدى اۋرۋحاناعا جاتقىزامىز. جاعداي باقىلاۋدا. ءبىز الدىن الۋ شارالارىن قابىلدايمىز. ءبىزدىڭ مىندەتىمىز - بارلىعىن دەر كەزىندە مەديتسينالىق كومەكپەن قامتاماسىز ەتۋ».

وبلىستا كۆي انىقتاۋ بويىنشا زەرتحانالار سانى دا ارتىپ كەلەدى. وبلىس ستاتسيونارلارى جوسپارلى ەمدەۋگە جاتقىزۋدى ءىشىنارا توقتاتتى. ينفاركت، ينسۋلت جانە جاراقاتتان كەيىن كومەك كورسەتۋ ءۇشىن وڭالتۋ ورتالىقتارى جۇمىسىن جالعاستىرۋدا. ەمحانالاردا ۋاقىتشا سكرينينگ جانە ديسپانسەرلەۋ جۇرگىزىلمەيدى. ەمحاناعا بارۋدى ازايتۋ ءۇشىن قاۋىپ توبىنداعى پاتسيەنتتەرگە ءدارى-دارمەك ۇيگە جەتكىزىلەدى.

ەرجان نۇرلىبايەۆ قاراعاندىلىقتاردى سانيتارلىق تالاپتاردى ساقتاپ، ءوز دەنساۋلىعى مەن جاقىندارىن ساقتاۋعا شاقىردى. قاراعاندى وبلىسى بويىنشا بۇگىنگى كۇنى كۆي اۋرۋىنىڭ 1624 جاعدايى تىركەلگەن. 716 ادام ساۋىعىپ كەتتى. 9 ناۋقاس قايتىس بولدى.